Ads by Google Ads by Google

Osofa’i e se ali’i le faatauoloa i le po ae gaoi tupe o le faleoloa

ausage@samoanews.com

O le ali’i lea na tu’uaia i lona osofaia o se faatau oloa i totonu o se faleoloa i Amaluia i le po ae fao faamalosi tupe sa i ai, na pu’e faapagota e Leoleo i le vaiaso na te’a nei i lalo o se poloaiga mai le Fa’amasinoga.

 

O le vaiaso na te’a nei na tula’i ai Tauilevanu Mose i luma o le Fa’amasinoga Faaitumalo. O le ali’i loia fautua lagolago ia Bob Stuart lea o lo o tula’i mo Mose, ae o le tama’ita’i loia sili lagolago ia Laura Garvey o lo o tula’i mo le itu a le malo i lenei mataupu.

 

E 3 moliaga ua molia ai e le malo le susuga a Mose. O ia moliaga e aofia ai le moliaga e tasi o le faomea i le tulaga muamua; faapea ai ma le moliaga o le gaoi; o moliaga mamafa uma ia; ma le moliaga mama e tasi o le faaoolima i le tulaga tolu.

 

E $25,000 le vaega tupe lea ua fa’atulaga e le afioga i le ali’i Fa’amasino ia Elvis P. Patea e totogi ona fa’atoa mafai lea ona tatala Mose i tua mai le toese i Tafuna.

 

Na talosaga e Stuart i le Fa’amasinoga ina ia faaitiitia le tupe e tatala ai Mose i tua mai le $25,000 i le $5,000, peita’i na teena e le faamasinoga, ina ua mae’a ona faafofoga le faamasinoga i le faafinauga a le loia mo le malo.

 

Na taua e Stuart e fa’apea, o Mose, o se tagata e faigaluega malosi mo le tausiga o lona aiga, o ia fo’i e faalagolago i ai lona aiga i le itu tau tupe. E ui i le faalavelave e pei ona tula’i mai i Amaluia, o le mea moni lava e pei ona taua e Stuart, o nei fa’amatalaga uma ua na o ni tuuaiga e le o mafai ona fa’amaonia.

 

Ae na taua e le loia a le malo e fa’apea, e ui o le ulua’i taimi lenei ua aafia ai Mose i le tulafono, e fai lava si matuia o le gaioiga sa ia faia. O lona faaoolima lea i le tama’ita’i faatauoloa atoa ai ma lona fao faamalosi o tupe o le faleoloa. Sa taua fo’i e le malo e fa’apea, e i ai popolega i le ona sola ese lea o Mose pe afai ae tatala o ia i tua.

 

TAGI A LE MALO

 

E pei ona taua e le malo i le latou tagi e fa’apea, o le po o le aso 12 o Tesema i le itula e 9:03 na telefoni atu ai le pule o le Faleoloa Asia i Amaluia ma talosaga i Leoleo mo se fesoasoani, ona o se ali’i na ia osofaia lona faleoloa ma osofa’i atu ai ma ia.

 

E lei umi se taimi ae taunu’u loa Leoleo ma amata a latou suesuega e tusa ai o lenei mataupu. Na taua e le tama’ita’i faatauoloa na a’afia, o ia fo’i lea o le to’alua o le pule o le faleoloa e fa’apea, o le faalavelave na tula’i mai ina ua sauni e tapuni lona faleoloa i le po na tula’i mai ai le fa’alavelave.

 

A o ia faitauina tupe mai totonu o le masini tupe, sa faafuase’i ona ulufale atu i totonu o le faleoloa se alii talavou, ma aga’i sa’o lava i tua o le pusa aisa ma uu mai se faguinu, ona toe savali mai lea ma totogi lana apa inu ma toe aga’i atu ai i fafo.

 

Sa fa’aauau pea ona faitau lana tupe i le po lea mai totonu o le masini tali tupe. E le i umi ona aga’i atu i fafo le ali’i lea, ae ona toe vaaia fo’i ua toe ulufale atu le alii lea i totonu o le faleoloa ma toe savali sa’o lava i tua o le pusaaisa ma toe uu mai le isi apa inu, ona toe savali mai lea ma ia i luma i le vaega e totogi ai faatau.

 

Na taua e le tama’ita’i faatauoloa le faateia o ia ina ua faafuase’i ona tu’i e le alii lea o ia ma pau atu ai i lalo o le fola o le fale. O le taimi lea na tago ai loa lea alii lea ua lulu atu tupe sa i totonu o le masini tupe ma tamo’e loa ma ia i fafo ma alu i le atoa. Na valaau le tama’ita’i faatauoloa i lona to’alua ma la taumafai ai loa e tuli le ua molia peita’i e le i maua.

 

Na taumafai le ulugalii e fesiligia nisi o tupulaga o le nu’u sa latou fetaui i luga o le alatele mo se fesoasoani, peita’i e leai se isi o i latou nei na iloa le tagata na tamo’e ese mai i le faleoloa.

 

Na maua le avanoa e iloilo ai e Leoleo le ata sa mafai ona pu’eina i totonu o le masini pu’eata a le faleoloa, ma faamaonia ai gaioiga uma sa faia e le ali’i na faatinoina lenei osofaiga.

 

Na mafai ona fesiligia e Leoleo tupulaga o le afioaga o Amaluia ma faaali i ai le ata sa pu’eina e le masini pu’eata, ma faamaonia ai e tupulaga i Leoleo, o le alii o lo o i totonu o le ata o Tauilevanu Mose, e faigaluega fo’i o ia i le kamupani i’a. Na faia fesootaiga a Leoleo ma le pulega a le kamupani i’a ma faamaonia mai ai, o lo o i ai Mose i totonu o le lotoa a le kamupani i le taimi lava lea.

 

Ina ua mae’a ona pu’e faapagota e Leoleo ia Mose, sa auina atu loa o ia i le Ofisa o Leleo i Tafuna mo le faatalatalanoaina o le mataupu.

 

Na taua e Mose i Leoleo e fa’apea, o le faalavelave e pei ona tula’i mai i le faleoloa i Amaluia, o se mea sa ia fuafuaina lelei lava, ina ua ia vaaia le faatauoloa o lo o faitau ana tupe i luga o le laulau.

 

Ina ua ia ulufale atu i totonu o le faleoloa e fai lana faatau, sa ia vaaia le tama’ita’i faatauoloa o loo faitau ana tupe i luga o le laulau. Sa oso a’e se manatu leaga ia te ia, na te fia maua lenei vaega tupe tele se’i fa’aaoga e fa’atau ai se mea’ai mo lona aiga aemaise ai fo’i le fa’atinoina o mea e mana’o i ai.

 

Na uma ona totogi lana faatau ona alu lea i fafo ma inu ai lana apa. Ao tutu i fafo o le faleoloa, sa oso atu se manatu leaga ia te ia, ua tatau ona alu e osofa’i le tama’ita’i faatauoloa ae gaoi ana tupe. Sa le’i toe faatali i se isi lea mea e tasi, ae ua ia manatu e talia le leo o loo musumusu atu ia te ia, ma ia toe savali atu ai loa ma toe uu mai le isi apa mai totonu o le pusa aisa ma savali mai loa e totogi.

 

Ina ua latalata mai i le faatauoloa, sa faafuase’i ona ia oso atu ma tu’i o ia ma palasi ai i lalo, ona ia aapa atu loa lea ua se’i mai le faaputuga tupe sa tatao i lalo o le masini tupe ma alu loa ma ia i fafo. Na taua e Mose lona alu atu ma nana le $380 i le togavao, ae faaaoga le $120 e faatau ai mea’ai ma fo’i loa i le fale.

 

Na taua atili e le ua molia i Leoleo e fa’apea, na mafua ona ia manatu e faatino lenei gaioiga, o lona mana’omia lea o se tupe e faatino ai manaoga i lona aiga, aemaise ai o lona naunau e fa’atau ai mea o loo ia mana’o i ai ae paga lea e leai sana tupe.

 

Na aga’i atu Leoleo i le togavao lea na taua e Mose na ia nana ai le isi vaega o le tupe, peita’i na latou fiu e su’e e le i maua.