Pago Pago - AMERIKA SAMOA

TU’UAIA SE FAIAOGA I LONA SASAINA O TAMAITI AOGA I SE LAAU

Ua molia nei se faiaoga mai i le aoga tulaga muamua a Tafuna ina ua ia fa’aaogaina se la’au e sasa ai nofoi o ni fanau aoga se toatolu.  O nei moliaga e mafai ona faafalepuipui ai se tagata i le tausaga atoa, pe sala tupe e $1,000 ia po o faasalaga uma foi e lua.

O le aso 18 o Oketopa, 2023 na o’o atu ai le tina o Sili Siua i le ofisa o leoleo i Tafuna ma si ona alo e 11 tausaga le matua, ma talosagaina le faia o sana tagi e faasaga i le faiaoga a lona alo, ona o le sasaina o lona alo e le faiaoga, i se la’au.

Na faamatalaina e le tamaititi aoga e 11 tausaga e faapea, i le aso Gafua, Oketopa 16, 2023, i le taimi o faia aoga, sa ita ai lona faiaoga o Asomalu Lavasi’i, ia te ia ma nisi o le latou vasega ona o le pisa tele, a’o talanoa le faiaoga ma le sui pule.  Ina ua alu ese le sui pule mai i le latou potu aoga, sa valaau atu loa le faiaoga i fanau aoga e auaua’i mai i luga, ma amata loa ona sasa o latou nofoi i le la’au.

O lo o ta’ua i faamaumauga a le malo e faapea, na manu’a le tino o le alo a lenei tina ma ua fefe foi lenei alii 11 tausaga e toe alu i le aoga ona o le mea sa faia e le faiaoga ia te ia ma nisi o lana vasega.

Na mafai ona o’o atu leoleo i le aoga i le aso 19 o Oketopa, 2023 ma talatalanoa i nisi o fanau aoga faapea ma le faiaoga.

E tusa ai ma le faamatalaga a nisi o fanau aoga e toalua, sa faamanu’alia foi o latou tino i le ta a le faiaoga ma sa ta’ua e nei fanau aoga, e le o se mea fou le mea na tupu ia i latou, ona e fa’aaoga lava e le latou faiaoga, le susuga Lavasi’i, ia le la’au e sasa ai latou pe a pisa pe tupu se mea i totonu o le vasega.  Sa ta’ua foi e fanau aoga le palauvale o le faiaoga ma o le toatele o fanau aoga e fefefe i le alii faiaoga.

O le susuga ia Lavasi’i, na faatalanoaina e leoleo i totonu o le ofisa a le aoga ma sa ia ta’ua e faapea, e sese lana mea sa fai, ae ua avea lona ita ma fa’alavelave i le faatinoina o lona tiute fa’afaiaoga, o le a’oa’o lea o le fanau, ae le o le sasaina o i latou.  Sa ia ta’ua foi e fa’apea, i lona sasaina o le fanau, o lo o iai sona manatu o lo o ia a’oa’ia i latou, ae peitai, atonu ua mamafa lona lima, ua faamanu’alia ai nisi o le fanau.  Na fa’aalia e le alii faiaoga lona salamo e tusa ai ma le mea ua tupu.

O fanau aoga e to’atolu o lo o a’afia i lenei mataupu, e 11 tausaga.  O Lavasi’i o se tagatanu’u o Amerika Samoa ma e 25 tausaga o lona soifua.

E le i ta’ua i faamaumauga a le malo pe na lokaina le alii faiaoga, ae o le 3 o Novema lea ua faatulagaina ai lana uluai iloiloga i luma o le faamasinoga faaleitumalo.  

MOLIA SE ALII FA’ASUAVA MA FAATUPU VEVESI I TOTONU O SE FALEOLOA

Na lokaina mai ma molia i le tulafono ia le alii o Steve Pati, i le aso 3 o Novema, 2023 ina ua valaau e le pule o le faleoloa o le Lucky 7, i Nu’uuli, ia le ofisa a leoleo ona o le faatupu vevesi o lenei alii i totonu o le faleoloa.

E tusa ai ma faamaumauga a le faamasinoga, ae e le i taunuu leoleo i le nofoaga na tupu ai le faalavelave, sa vaaia e leoleo se alii o savalivali i tafatafa o le faleoloa ma sana apa pia ma sa valaau atu iai leoleo e sau latou te talanoa i luma o le faleoloa.  Na maitauina e leoleo le savali tautevateva o lenei alii ma toeitiiti pa’u i lalo.  Na lagonaina foi e leoleo le manogi pia o lenei alii.  Ina fesiligia o ia e leoleo po o ia lea na valaau atu ai le faatau oloa i lona faatupu vevesi i totonu o le faleoloa, ae na tali Pati, sa alu e faatau mai sana meaai.

I se talanoaga a leoleo ma le pule o le faleoloa, na faamatala e le pule o le faleoloa le faia e lenei alii o ni uiga ma ni faaupuga i le tamaitai faatau oloa e le tusa ai ma tulaga o le tulafono.

Ina ua mae’a ona faia e le tamaitai faatau oloa sana faamatalaga tusia, na faapea loa ona aveina e leoleo ia Pati i le ofisa a leoleo.

E tusa ai ma le faamatalaga a le pule o le faleoloa, na faafa ona alu atu le ua molia, i le latou faleoloa i lea aso, ma faia ni faamatalaga le talafeagai i le tamaitai faatau oloa.  Ae ina ua taumafai le pule o le faleoloa e ave le ua molia, i fafo ma le faleoloa, sa tete’e o ia, ma o lea na valaau ai loa e le pule o le faleoloa ia leoleo.

Na faamaonia e le tamaitai faatau oloa ia le faamatalaga a lana pule ma sa ta’ua foi e le na a’afia i lenei mataupu, le aisi tupe a le ua molia, i tagata faatau na o atu i le faleoloa.  Sa ta’ua foi e le tamaitai faatau oloa, na alu atu foi le ua molia i le po ma ave ni oloa, fa’aleaga falaoa e aunoa ma le totogia.  Sa faapea foi ona augani lenei alii i le tamaitai faatau oloa e fia faatau ni ana pia, ae sa te’ena e le tamaitai faatau oloa, ona o le tulafono lea ua faatapula’a ai taimi e mafai ona faatau ai pia i le po.

Na ta’ua e leoleo le tete’e o le ua molia a’o latou taumafai e aveina atu o ia i le ofisa a leoleo, ona ua le toe aoga lana ID.  O Steve Pati o se tagatanu’u a le malo o Samoa, ma e 48 tausaga o lona soifua, ma o lo o faamautu nei i Nu’uuli.

O lo o ua molia nei o ia i se solitulafono e ono faafalepuipui ai i le ono masina, po o se sala tupe e $500 po o faasalaga uma e lua.

E $300 le tinoitupe ua faatulagaina e mafai ona tatala ai o ia mai i le falepuipui.