Ads by Google Ads by Google

Pu’e faapagota faia o uiga mataga i se tamaitai e 14 tausaga ae maua ai aisa


[ata: foa'i]
Ausage@samoanews.com

Pago Pago, AMERIKA SAMOA

 

Ua maitauina le faatupulaia i le atunuu i lenei vaitau o solitulafono e aafia ai fanau tamaitai laiti, lea ua to’atele i latou ua pu’e faapagota e Leoleo ma molia e le malo i le faia o uiga mataga faasaga i fanau e laiti i lalo o le tulafono.

 

E le i leva atu i ni nai masina ua tuana’i atu le mataupu faasaga i se ali’i e 55 tausaga le matua lea ua fa’asala i le Toese i Tafuna ona o uiga mataga sa ia faia i se tama’ita’i e 16 tausaga le matua, a o lea fo’i ua molia mai se ali’i e 43 tausaga le matua i lona faia o uiga mataga i se tama’ita’i e 14 tausaga le matua e aiga i ai.

 

Ae ina ua pu’e faapagota e Leoleo le ua molia, na maua i ai ma vaega o le fualaau faasaina o le aisa.

 

E pei ona taua. e le malo i le latou tagi e fa’apea, o le uncle o le tama’ita’i o lo o a’afia i lenei mataupu. O le a le mafai e le Samoa News ona faalauiloa le suafa o le ua molia, ona o puipuiga lava i le ono mafai lea ona alia’e ai le suafa o le tama’ita’i o lo o a’afia i lenei mataupu.

 

O le 2 vaiaso talu ai na pu’e fa’apagota ai e Leoleo le ali’i ua molia, ma molia ai loa o ia i tagi e lua.

 

I le tagi muamua ua molia ai e le malo le ali’i ua molia i moliaga e 4, lea e aofia ai le moliaga mamafa e 2 o lona tagofia lea o itutinosa o se teneititi e laititi i lalo o le tulafono, atoa ai ma moliaga mama e 2 o le faaoolima i le tulaga tolu, atoa ai ma le faia o gaioiga e ono lamatia ai le saogalemu o fanau laiti.

 

I le tagi loa lua, ua molia ai e le malo le ali’i ua molia i le moliaga o le umia faasolitulafono o vaega o le pauta faasaina o le aisa.

 

Na teena e le ua molia moliaga ina ua tula’i i luma o le fa’amasinoga fa’aitumalo i le vaiaso na te’a nei. I lona teena ai o moliaga faasaga ia te ia, na talosagaina ai loa e lana loia fautua ina ia faatulaga loa se aso e faia ai le ulua’i iloiloga o lenei mataupu.

 

O le aso Tofi o le vaiaso fou i le itula e 1:00 i le aoauli lea ua fa’atulaga e faia ai le ulua’i iloiloga o le mataupu a  i luma o le afioga i le ali’i Fa’amasino ia Elvis P. Patea, e sailia ai pe lava mau a le malo e lagolagoina ai le faia o se solitulafono.

 

E $35,000 le tupe lea ua fa’atulaga e totogi ona fa’atoa mafai lea ona tatala le ua molia i tua mai le toese i Tafuna. 

 

E ui na finau malosi le loia a le itu tete’e i le fa’amasinoga ina ia fa’aitiitia le tupe e tatala ai le ua molia i tua, pe tatala fo’i o ia e aunoa ma se tupe e totogi, ae na lagolagoina e le fa’amasinoga le fa’afinauga a le loia mo le malo, ina ia taofia pea o ia i le toese se’i vagana ua totogi le $35,000.

 

Na taua e le loia fautua e fa’apea, o le ulua’i taimi lenei ua molia ai e le malo le ua molia i se solitulafono, e leai fo’i ni solitulafono na ta’usala pe na molia muamua ai o ia i tausaga ua mavae. Sa ia finau e fa’apea, afai e tatala i tua le ua molia, e le sola ese o ia ma le atunu’u, ae o le a la galulue fa’atasi ina ia mautinoa e auai o ia i soo se taimi e valaau ai lana mataupu. 

 

Na finau atili fo’i le ali’i loia fautua o loo tula’i mo le ali’i ua molia e fa’apea, e ui i tu’uaiga fa’asaga i le ua molia, ae o le mea moni e ao ona silafia e le fa’amasinoga, e le o ia o se tagata leaga e ono lamatia ai le saogalemu o tagata lautele pe afai ae tatala o ia i tua.

 

Na finau malosi le loia al e malo ina ia fa’atumau le tupe ua mae’a ona fa’atulaga e le fa’amasinoga e tatala ai i tua le ua molia, ona o puipuiga lava mo le saogalemu o fanau teine a le atunu’u. Na taua e le loia a le malo e fa’apea, e ui o le ulua’i taimi lenei ua tu’uaia ai le ua molia i se solitulafono, ae foliga mai i le siosiomaga o le mataupu e pei ona tula’i mai, e fai lava si matuia o gaioiga sa faia e le ua molia. 

 

Na fa’ailoa e le loia a le malo i le fa’amasinoga e faapea, e le tatau ona tatalaina i tua le ua molia e aunoa ma se tupe e totogi, e pei ona finau mai i ai lana loia. Afai fo’i e tatala o ia i tua, e tatau ona mautinoa e le sola ese o ia ma le atunu’u.

 

O tuutuuga ua tuuina atu e tatala ai le ua molia i tua, o le faasa lea ona ia taumafai e faafesootai le teineititi na a’afia i soo se auala, auai i soo se taimi e valaau ai lana mataupu, ma ia tuuina atu lona tusi folau e taofi e le malo. Ua fautuaina fo’i o ia e aua ne’i ona taumafai e tuua le atunuu e aunoa ma se fa’atanaga a le fa’amasinoga.

 

TAGI A LE MALO

 

O lenei mataupu na tofu atu i le Ofisa o Leoleo i Tafuna i le taeao o le aso 20 o Aperila, 2021, ina ua talosagaina e se Tina se fesoasoani a Leoleo, fa’asaga i  ni uiga mataga sa taumafai le ua molia e faia i lana tama teine e 16 tausaga le matua.

 

Na aga’i atu Leoleo i le fale o le aiga na aumai le teineititi na a’afia ma lona Tina, ma aga’i atu loa i le Ofisa o Leoleo mo le fa’atalatalanoaina o lenei mataupu.

 

Na taua e le teineititi na a’afia i Leoleo e fa’apea, na fa’ateia o ia ao taoto i lona moega i se tasi o vaveao ina ua ia faalogoina se tagata ua tago atu i lona fatafata. Sa i ai lona manatu o sana miti o loo fai, peita’i ina ua ia faalogoina le mamafa atu o le lima o le tagata i lona fatafata, na mafua ai loa ona te’i i luga, ae na fa’ateia o ia ina ua pupula atu ona mata, ae tau lana vaai i le ua molia o loo tootuli i luma o lona ulu ma tago atu i lona tafatafa.

 

Na musumusu atu le ua molia i le teineititi na a’afia ma fai atu i ai, e soia le pisa ina ne’i lagona mai laua e le latou aiga, ae sa e e i luga le teineititi i lona Tama, ma fa’afuase’i ai loa ona tu i luga le ua molia ma alu i le atoa i fafo ma le latou fale. Na vaaia e le teineititi na a’afia le aga’i atu o le ua molia ma faaola lana pasi o loo paka mai i le isi itu ma al ese loa.

 

Na taua atili e le teineititi na a’afia i Leoleo e fa’apea, e le o se taimi muamua lea ua faia ai e le ua molia uiga mataga ia te ia, e ala i lona tago atu i ona itutinosa ma le manatu ina ia fa’amalie ai lagona tu’inanau o le tino.

 

Na taua e le Tina i Leoleo, sa molimauina fo’i e lona atali’i (le tuagane o le tama’ita’i na a’afia) gaioiga sa faia e le ua molia. Na maua le avanoa e fesiligia ai e Leoleo le tuagane o le tama’ita’i na a’afia e uiga i lenei mataupu.

 

Na taua e le tuagane o le teineititi na a’afia i Leoleo e fa’apea, i se tasi o po, na ala ai i luga ma alu e fa’aaoga le fale taele (tulou). Ina ua mae’a, sa ia aga’i atu ai loa i totonu o le latou fale, ae na matua fa’ateia o ia ina ua ia vaaia le ua molia o loo tootuli i luma o le moega a lona tuafafine. 

 

Na avea le tatala e le tuagane o le teineititi o le faitoto’a o le potu a lona tuafafine ma itu na te’i ai le ua molia, ma fa’ataga tago atu ai loa i le laulau ma fa’afoliga ana gaioiga o loo saili lana CD. 

 

Na taua e le ali’i lea i Leoleo e fa’apea, sa oso lava ona manatu leaga i le taimi na ia iloa ai lea vaaiga, e foliga mai sa taumafai le ua molia e fai ni uiga mataga i lona tuafafine, peita’i sa ia toe manatu ane fa’apea, ai loga e sa’o lea manatu. 

 

O le mae’a ai ona fesiligia e Leoleo o le teineititi na a’afia ma lona tuagane, na aga’i atu ai loa e saili le ua molia, ma latou maua atu ai lana pasi o loo paka mai i se vaega o le Lyons Park i Tafuna, ma pu’e fa’apagota mai ai loa o ia.

 

Ina ua fesiligia e Leoleo le ua molia e uiga i lenei mataupu, sa ia ioeina ai lona faia o uiga mataga i lenei tama’ita’i e aunoa ma se fa’atanaga. E le gata sa ia tagofia o ona itutinosa, ae na ia ulufale faamalosi fo’i i totonu o le fale i le leva o le po e aunoa ma se fa’atanaga ona o le manatu e fa’atino ai se solitulafono.

 

Pau le itu na ese mai ai le fa’amatalaga a le ua molia ma le fa’amatalaga a le tama’ita’i na a’afia, ona sa taua e le ua molia i Leoleo e fa’apea, na fa’atonu e le tama’ita’i na a’afia o ia e alu atu i lona potu i le po la te talatalanoa ai.

 

Ao le i auina atu le ua molia i le Ofisa o Leoleo i Tafuna mo suesuega, na saili e Leoleo lona tino ma maua ai se paipa tioata o loo i ai vaega o le pauta faasaina o le aisa. Ina ua fesiligia le ua molia e faatatau i le paipa tioata sa i ai vaega o le aisa na maua ia te ia, sa ia taua i Leoleo e faapea, o le paipa ma faatau mai i le isi alii i le $20.