Ads by Google Ads by Google

Tala I Vaifanua

ATOA LE VAIASO MASAGA 4 I LE LATOU AIGA

 

Ua atoa nei le vaiaso e tasi talu na te’a i tua le masaga tama’ita’i e to’a 4 i lo latou aiga i Iliili, ae o se ulua’i masaga 4 fo’i lenei ua fananau i Amerika Samoa ia Filomena ma Sokimi Sokimi o Ili’ili.

 

E leai se faigofie o i ai e amata mai lava i le taimi o le ma’itaga se’ia o’o i le taimi na fananau ai. Fa’aila e le tina ia Filomena,“Sa ou manatu lava o lo’u ma’itaga o le a maua mai se isi e fa’aopoopo i le to’a fitu o le fanau ua i ai, ae na iloga le faigata ona ua afuafua le ma’i e tele atu le faigata nai lo mea masani e iloga ai lota ma’i mai le amataga.”

 

“Ina ua faia talavai ma iloa ai e masaga sa fa’apea fo’i e to’alua. O le matou aiga e i ai i matou masaga, ae leai ma se masaga o sao. O le masaga to’alua ma le masaga toatolu sa maua i suli o le matou aiga, ae loto fa’atasi uma masaga na, ma e tai ono masina le tasi ua maliliu, ua ta’i lima masina le isi masaga ua maliliu fo’i. O aga ia e iloa ai e loto fa’atasi masaga, ona a ma’i le isi e ma’i fo’i le tasi o le masaga,” o se tala lea a le tina.

 

Ia Sokimi le tama taule’ale’a, o se taimi muamua lea ua mana’omia e ai e si ona to’alua lana fesoasoani, ma ua augani ane i le tausiga o ia i le fale, ina ua mamafatu le manava, jua to’atele na’ua le to’atolu o pepe ua fa’ailoa mai e le falema’i o lo’o ia tauavea.

 

Mai sailiga ale falema’i, sa fa’ailoa ane ai e tolu pepe i lona manava, ma ua faufautua fo’i foma’i i le tausiga lelei o lona soifua maloloina , ina ia sao uma le to’atolu o le masaga. Peita’i ina ua o’o ina soifua mai le fanau, ua matua fa’ate’ia foma’i ina ua fanau a’e o lo’o to’afa i latou.

 

“E leai ma se taimi ua ou mafaufauina ai o le a ou mauaina se masaga fa. Ae o tama’ita’i uma lava. O se mea taua ua ou maua, ae ou te tatalo lava i le Atua ia alofagia, ia sao ma uli la’u tausiga i si a’u fanau, tusa lava pe utiuti le fa’asoa tau le tamaoaiga, ae ia taga’i le Atua i lou agaga atoa, ou te le fa’asili se tasi o i latou, ou te fia tausia tutusa i latou uma i o’u lima e lua, ia ola lava i latou. O le vi’iga ma le fa’afetai i le Atua, ina ua ia tofia a’u e avea ma tina o lenei ulua’i masaga fa o tama’ita’i lalelei i Amerika Samoa nei,” o se tala lea ma loimata o le fiafia o le tina.

 

Ua popole fo’i le tina, aua e fua ane pepe, e ta’i fa lava pauna o i latou uma, ae a taga’i fo’i i o latou fofoga, e tutusa lelei, tauau fo’i e loto fa’atasi i latou nei e to’afa.

 

O se mea fiafia e le auuso o le tina, ua tau fai o ane e tofu ma le pepe, ae o le loto lava o Filomena, “O o’u lima ma lou alofa, ou te tausia ai i latou uma.”

 

I lona ma’itaga ua tulata i lona masina, e le’i faigofie, sa tau fa’anofo o ia i luga, e le mafai ona moe taliaga sa’o, e puni ai lana manava, ona fa’atafa lea, a suia fo’i le itu e faatafa i ai, e fafagu le tama o le aiga e fuli lona tino. E mamafa fa’asoloatoa, e le mailoa se taga e toe maua ai le tulaga nofo filemu. E le umi ona tu pe nofo ae fa’alogoina le mamafatu o lona manava e pei a pa’u aga’i i luma.

 

“Ou te fa’afetai i le Atua ina ua mafai ona oo mai i lo’u masina, ae ua ou mafaia ona tau’ave le manava ma le tiga ma le mamafa aua sa tuu mai i o’u luma ina ia ola mai i latou uma, e ui ina ua i ai le fa’asili a le Atua, sa ou le iloa,” o le tala lea a Filomena.

 

Na vave te’a Filomena i le fale, lua aso i le falema’i, ae nonofo ai pepe i le Nursery se’ia mae’a lelei siakiga ma va’aia toto’a i latou uma ia mautinoa o atoatoa ona lelei lo latou ola eseese mai lo latou tina, ma isi fo’i o i latou e to’afa.

 

Ua i ai nisi sa foa’i mo le ulua’i masaga fa. O le tina o Paeuli “La” Malauulu, sa soifua a’e le tama a si ana tama o le tama’ita’i o Miracle Vaki i le ulua’i aso o le 2020, na ia sagisagi fiafia ane e fa’aalia lona fo’i fia tausoa i le ulugali’i ua fa’amanuiaina i le masaga ma le Ato Tele o Oloa pepe, ofu ma lavalava ma tapenaga o napekini ma oloa pepe eseese.

 

“O lota lava ma’ema’e i lenei fo’i ulua’i masaga 4 ua maua e le tatou atunu’u, ae o lo’o soifua  ae i le manuia ona o le alofa o le Atua. E mautinoa e manaomia e Filomena lo tatou tau’au i lenei fa’amanuiaga ua ia maua.”

 

E le gata i lea, i le aso na te’a ai i latou i tua, ua toe foi mai Paeuli La ma le nofoa ta’avale o pepe e fa’aatoa ai le sailiga a nai matua ona e fa lelei nofoa o pepe i ta’avale e ao ina fa’ate’a ai pepe nei. “Se ua tatou masani lava, a i ai se mea e toe mana’omia, o la’u telefoni lea. Ua toe vala’au atu, o se fa’amanuiaga lenei vala’au ma ua fa’aigoaina fo’i le tasi o le masaga ia Miracle, o lea la ua masaga atu ai ma si a’u tama pepe aua na fanau fo’i o ia i le masina e tasi, Ianuari 2020.”

 

A fia foai mo le masaga fa, feso’ota’i 770-9567, ma fesiligia pea mo Filomena poo Sokimi

 

FUAFUA NOFOGA FOU TAOFIA MO SUESUEGA FA’AMA’I PIPISI

 

Ua amata tapena ai e le fa’atonusili o le Matagaluega a le Soifua Maloloina, Motusa Tuileama Nua ma le afioga le Kovana Sili Lolo Moliga, se isi nofoaga e fou e taofia ai nisi pe a silia ma le to’a 10 sui o le a taofia mo suesuega faapitoa nei.

 

“O le falema’i i Leone lea ua fa’avasega mo suesuega faapitoa nei, e na’o le 10 moega, peita’i a malaga mai le Hawaiian Air ae silia la i le to’a 10 i latou e taofia ai mo ni suesuega fa’apenei, ua le agava’a lea nofoaga mo nisi e sili atu i lea faitauga. Ae ese mai i lena, e le mafai ona tatala mai i latou i tua i o latou aiga, pe afai o le a mae’a suesuega i le aso lava lea e taofia ai lava se’ia mae’a le 14 aso. O le isi lea tulaga e ao ina va’ai toto’a la i ai i tatou, ona o le 10 moega e matua le lava lea mo le fa’amoemoe, ia le sao i tua fa’amai pipisi nei i le atunuu pe a masalomia o maua ai se tasi o pasese femalaga’i i le va o Amerika Samoa ma isi atunuu uma lava,” o se tala lea a Motusa.

 

Ua mae’a le talanoaga a sui o le Kapeneta ma le kovana ua fa’ataga nei ona fausia se nofoaga fa’apitoa mo lea fa’amoemoe i Tafuna.

 

Ua tuu i le Matgaluega o Galuega Lautele e saunia le ata o lea fale e tatau ona amata galuega fausia i lenei vaiaso.

 

TOE ASIASI “COCONUT MUTS” TOGAFITIGA MEAOLA TAUSI

 

O le vasega o Foma’i Manu a le Coconut Mutts lea ua toe fa’ailoa mai e to’ai taunu’u mai mo le togafitia o tatou meaola fa’afagafao, o se latou galuega e faia fua mo tatou tagata ma latou meaola, e amatalia latou galuega i le aso Lua o le vaiaso nei i le Matagaluega o Fa’ato’aga i Tafuna se’ia o’o i le aso Lulu, ona si’itia lea i le afio’aga o Leone e tau fa’alatalata ai i nisi o lea fo’i itu o le atunuu.

 

E to’alima foma’i manu ua malaga mai ai, ae toe tu’ua le atunu’u ia Fepuari 24. Ua oo lava i le aso Malolo o le Peresetene - Fepuari 17 - o le a faia lava galuega ma togafitiga o meaola.

 

O se tasi o foma’i manu o malaga mai ai o le tamaita’i sa galue i le Matagaluega o Fa’ato’aga i lea lava tofiga, Kristen Jensen, ae ua toe malaga mai fo’i le ali’i foma’i manu o Dr Bret Grover, lea sa ia asia i tatou ia Iuni 2019.

 

A maea talavai i Leone i le aso Tofi ma le aso Faraile o le vaiaso nei, ona toe taliu mai lea o talavai i le tatou Ofisa o Fa’ato’aga i Tafuna mo le aso malolo o le Peresetene, e oo atu ia  Fepuari 24.