Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA - 

 

2 ALO O AMERIKA SAMOA I LE ‘AU VOLLEYBALL USA

 

I lipoti fa’asalalau o lo’o fa’ailoa ai e e to’alua alo o Amerika Samoa - Garret Muagututi’a ma Josh Tuaniga - ua iloga le la’ua taumafaiga ma le ta’a’alo lelei i le ‘au Volleyball fa’avaomalo a le Iunaite Setete.

 

O Muagututi’a mai le afio’aga o Vatia lona aiga, ua ta’uta’ua tele lona tau’au i le tu’i masau ma le vave, e matele ina vave maua ai malo o le ‘au fili a Amerika i filigamaea i lea fo’i fa’atama fa’avaomalo. I le ta’amilosaga a le World Cup  o le Volley Ball a le FIVB ia Oketopa 2019 i Hiroshima i Iapani,  na iloga ai le ta’a’alo lelei o ia.

 

Ua tapena le fa’amoemoe o le ‘au FIVB a Amerika mo le ta’amilosaga 2020 FIVB World Cup i Tokyo, Iapani ia Iulai 2020, ua  filifilia ai alo nei o Amerika Samoa. 

 

O Muagututi’a, 32 tausaga o lona soifua, ua ia mauaina konekarate fa’apitoa, e ala i fa’asalalauga ma ituaiga oloa e fa’aaogaina mo e ta’a’alo i lea fa’agatama. E le gata i lea, i taimi uma lava ua avea ai o ia ma tama ta’alo Volleyball, e piki lava o ia ae le’i atoa le ‘au e to’aono. O le ‘au flli atoa e piki mo koleniga fa’atasi e to’a 12 i latou. O ia lava le ulua’i tu’i e muamua lava piki ma e le fesiligia le lelei o lana ta’alo, ma lona fa’alogo e usita’i i fa’atonuga mai ona ali’i fautautua ma fa’atonu o le ‘au fili a Amerika.

 

O Tuaniga, o lona aiga mai Poloa, ua alaala nei nai ona matua i Long Beach Kalefonia, sa a’oga ai ma fa’ai’u ai fo’i i lana Kolisi. O ia o le seti mata’utia, e leai se polo e le ola mo le sipaika i ana seti, po’o fea lava le itu e seti mai ai, ae lelei fo’i ma le kuiki i taimi e va’aia ai le avanoa ua maua.

 

Fa’ailoa e Allen Allen, se tasi na oo mai ona o le Troy Polamalu Initiative i le 2015 ma fesoasoani ia tatou au Volleyball, o se tasi fo’i na oo muamua ai le igoa o Amerika Samoa i le ‘au Volleyball i le Olimipeka i Barcelona, sa ia fa’aali, “O alo nei o Samoa o lo’o saunia e malaga mai e avea ma nisi o tama ta’a’alo mo Amerika Samoa i le ta’aloga a le Pacific Games. Ua mae’a tuuina mai o la’ua igoa ina ia auai mai mo lea fa’amoemoe.”

 

AUMUA AMATA - TATALIA PEA SUIGA O AGAVA’A 

 

Ua tatalia pea se suiga talileleia e tagata lautele o e na faigaluega i pisinisi tau femalaga’iga, faletalimalo, fale’aiga,  faletifaga, ave ta’avale i ta’avale la’u pasese o pasi ma ta’avale laiti, fa’atasi ai ma isi tagata faigaluega uma na vaea mai a latou galuega ona o le a’afiaga ona o le fa’asa o le COVID-19 na fa’amalosia i le tatou atunu’u.

 

Peitai ua fa’ailoa mai e le tatou Faipule i le Konekeresi, Aumua Amata, “I le taimi nei e le’i taunuu mai se tala fiafia mo i tatou uma sa faigaluega ae ua le mafai ona agava’a ona o le ituaiga o ID o lo’o umia ma fa’ataga e faigaluega ai i latou i Amerika Samoa, ua le o se tagata na soifua a’e i Samoa, pe o se tasi o tagatanuu o Amerika po’o se tasi o umia se green card e alaala ma faigaluega ai so’o se setete o Amerika.”

 

Ona o lo’o fa’atalia pea se tali mai le talosaga na toe fa’aulu ia talia i latou nei mo le fa’atupega i Amerika Samoa nei, ae ua iloga fo’i le tele na’ua o talosaga ua toe fa’aulu atu mai isi setete ma teritori uma o le Malo tele, ma ua fai ai lava si tuai mai.

 

Ua tima’i pea Aumua Amata, ia le so’ona atuatuvale i tatou uma, ae talosia le talosaga ua fa’aulu ia talileleia mai, ona fa’amanuia lea o i tatou uma i talosaga ua fa’aulu ma taofia se’i tatalia le talosaga ia tatala mai.

 

O le to’atele o lo’o a’afia o le aufaigaluega nei mai isi atumotu o le pasefika ma uso mai Samoa. O i latou ua faataga fa’aletulafono i Amerika Samoa e nonofo ma faigaluega mo Kamupani eseese. O lea to’atele ua talia pea a latou talosaga ae tatalia loa se tali mai i le talosaga ua fa’au’u atu i le tatpu sui i le konekeresi.

 

Ua fa’ailoa e Aumua Amata, “E matua ou sapasapaia lava le taumafaiga lenei ia fa’alautele le tulaga o agava’a ua lisia mai i le PUA ina ia aofia ai ma le vasega o tagata faigaluega uma i le teritori, o le ala fo’i lea ua vave lava ona toe fa’aulu le talosaga lenei, ina ia vave mai le taimi, a’o le’i tapunia le avanoa e talosaga atu ai mo nei alamanuia le mamalu lea o le atunuu.”

 

“E tele lava lou talitonuga e toe soso’o nei le taimi mo le PUA, aua ua le nao  i tatou o talosagaina suiga fa’apenei i le aiaiga o lea alamanuia i le Iunaite setete atoa. Afai ae toe soso’o mai le taimi atofa mo le PUA e mautinoa lava e fa’aofi atu loa i ai ma ni suiga nei e moomia.”

 

FAIA A’OGA I LE SUMMER MO FANAU E MANA’OMIA LE FESOASOANI

 

Ua fa’amautinoa mai e le tamaitai fa’atonu o le Matagaluega o A’oga a le tatou malo, Dr. Ruth Matagi Tofiga, “E faia a’oga a le fanau a’oga tulaga muamua ma a’oga maualuluga i le summer mo fanau a’oga o lo ua iloga e i ai le mana’omia ia te’i latou, i a latou mataupu tau’avea i a’oa’oga.”

 

Ua fa’ailoa mai e ia ua fa’atulaga vasega uma mo le fanau a’oga i a’oga tulaga muamua e amatalia lea ia Iuni 29, le aso ma e fa’ai’u ia Iulai 17, 2020. O le a fa’atulaga aoga a le fanau fa’au’u e amatalia lea ia Iuni 29 ae fa’ato’a fa’amae’a ia Iulai 30, 2020. Ua i ai fo’i ma le vasega fa’apitoa mo le ECE ma e amatalia lea ia Iuni 29 se’ia oo ia Iulai 24, 2020.

 

Mo ni fesili fa’afeso’ota’i: A’oga Tulaga Muamua 699-2021/2011; Aoga Maualuluga: 699-1245/1246, OCI 699-6516/6518, ECE 633-5177/5178, SPED 633-1323/4789.

 

Ua faatulaga fo’i se aoaoga fa’apitoa tau matata eseese mo faia’oga uma e amata fo’i ona faia ia Iuni 29 se’ia mae’a ia Iulai 24, 2020.

 

O le a amatalia le isi tausaga aoga fou ia Aukuso 31, 2020. O le aso fo’i ua fa’atulaga e amata  faiaoga fou ua fa’asolo mai ia Aukuso 17-21 Aukuso, 2020.Peitai e amatalia ona faigaluega i latou uma ua avea ma faia’oga i a’oga a le Malo o Amerika Samoa, ia Aukuso 24, 2020.