Ads by Google Ads by Google

TALA I VAIFANUA


[ata: SN]

Pago Pago, AMERIKA SAMOA

 

ELEELE FOU FA’ATULA’IA AI SAMOA MOTORS; FORD & HYUNDAI PAGO MOTORS

 

Ua mae’a ona fa’apipi’ia le fa’ailo a le Samoa Motors i le eleele ua toina mo i latou e fa’atautaia mai ai latou pisinisi i le Paka Liona, i le va o le Fa Street ma Tolu Street.

 

Ua fa’ailoa e le tamaitai Peresetene o Kamupani uma a GHC Reid i le atunuu, Olivia Reid, “Ua fai si leva ona taumafai ona tau saili lava se nofoaga e fa’alautele i ai le faatautaiga o le Samoa Motor. E pei lava ona taga’i i ai le mamalu o le atunuu i le nofoaga tuai o fa’atautaia mai ai nei. Ua tumu tele ma ua faigata ona fa’aalia lelei ai ituaiga ta’avale o lo ua mafai ona fa’atau atu e le Samoa Motors i le mamalu lautele o le atunu’u. “Ua taumafai lava ina ia lisia nisi nofoaga e tulata ane i le nofoaga o i ai nei ina ia mafai ona fa’aaoga, aua ua tau fa’asoasoa lava le avanoa e faia ai le pisinisi.”

 

Ua fa’aalia e Olivia Reid, “O le mea sili ona fia fa’alautele o le nofoaga e fa’alauiloa ai ta’avale o lo ua ofoina atu e le Samoa Motors mo fefa’ataua’iga i le atunuu. O ia ituaiga ua matou fa’atauina atu o le ituaiga o le Ford ma le Hyundai. E mana’omia fo’i ona mautinoa ua fai si vavamamao o ia potu e fa’alauiloa ai nei ta’avale.”

 

O le isi itu ua tatau lava fo’i ona fa’atele le nofoaga e faia ai, o le itu e toe lipea ma tautuaina ai ta’avale o lo ua fa’atauina atu i tagata lautele. O le fale inisinia lea e mafai ona toe aumaia i ai taavale e siaki ma suia suau’u, ma isi galuega uma fa’apena.

 

“O le maua ai fo’i o lea eleele e fa’aaogaina mo le pisinisi o le a fa’alautele atili le tautua tau totoga o ta’avale, ina lava le sapalai mo i latou uma ua fa’atauina a matou oloa.”

 

Ua fa’ailoa e Reid, “O le avanoa ua maua, o le a matua suia ai lava le auaunaga i le tulaga o le fa’alauteleina o vaega uma o le auaunaga, o se mea ua matua fia oo i ai le aufaigaluega ma le pulega o le matou pisinisi.”

 

Ua amata nei ona fuafua le fausaga o le latou fale e fa’atautaia mai ai le pisinisi, ae ua faailoa mai, ua fa’atulaga ina ia maea lea nofoaga i le 2021. Ona e le’i mae’a fo’i le ata atoa o le nofoaga ua le mautinoa lelei ai se tau aofai o lea galuega tele mo le Kamupani a le GHC Reid Samoa Motors.

 

O le tele o le eleele ua fa’atulaga mo i latou e lisia mo le 55 tausaga e sili laititi lava i le 3 eka. O le elee fo’i lea sa tau fa’atula’ia ai le falema’i tele sa fuafuaina muamua o le Hope Ministries, lea ua le taulau o lena fa’amoemoe, ona ua maliliu i latou sa taumafaia e fa’ao’o mai lena tautua.

 

Ua fa’afetaia e Olivia Reid le afioga le Kovana Sili Lolo Moliga, ona o le fa’amatuu mai o lea lisi mo a latou fefa’ataua’iga fa’apisinisi ma ua fa’afiafiaina i latou uma i le Samoa Motors, ina ua fa’atuatuaina le latou tautua e le taitai o le atunuu, ma ua fa’aalia lea i lona toina mo i latou o le latou talosaga mo se nofoaga e fa’atautaia mai ai latou fefa’ataua’iga.

 

“O lenei tali leleia o le talosaga, ua avea ma se toe fa’afoi mai o se tautua ua leva ona faia mai, aua o le atoaga lea o le 46 tausaga talu ona fa’atuina le latou Kamupani mai le 1974 i Amerika Samoa.”

 

Ua fa’afetaia fo’i e Reid, “Le tele o le fefa’ataua’iga ua fa’auia mai e le mamalu o le atunuu mai le latou Pisinisi ma ua fa’aauau mai le tele o tausaga, o se tasi lea o fa’alagona lelei mo so’o se faipisinisi lava. Fa’afetai tele.”

 

VAIVAI LE MALOSI O LE SUAVAI E TA’IA MAI I AIGA – FALELIMA I SISIFO

 

O nisi o vaega o le afio’aga o Leone, Vailoa ma Taputimu na matua leai se sapalai o le suavai taumafa mo le tele o aiga. Ua fesiligia fo’i le vasega o le aufaigaluega a le ASPA, pe aisea ua mafua ai lea tulaga, aua o se tautua e mana’omia i taimi uma e le mamalu o aiga ua a’afia.

 

Ua ese mai i aiga lautele o lo’o alaala i na nofoaga, ae ua i ai fo’i Pisinisi ma a’oga, aua e tatau lava ona i ai le suavai e tautuaina a’oga a le fanau, a leai e tatau fo’i la ona taofia a’oga.

 

Ua fa’ailoa mai e le aufaigaluega a le ASPA, “O le malosiaga e una’ia le suavai i paipa ua mae’a ta’ia i aoga, fa’apea ma aiga o lo’o latou tuaoi ai i lena afioaga. Ua le gata i lea, ae o lo ua sailia lava nisi o vaega o nei alapaipa o loo liki mai ai le sauvai i le palapala, ma ua fa’aauau lava lea galuega a le Pulega o le Suavai ina ia mautinoa ua maua uma nei liki.”

 

Ua i ai fo’i se isi fa’aletonu o lo’o tulata i le a’oga tulaga muamua St Theresa i Malaeloa, ma ua vave tu’ua ai le a’oga lea, ma o lo’o fa’atautaia lava a latou a’oga mo le fa aso o le vaiaso, e leai ni a’oga i aso Faraile.

 

Ua faapea fo’i ona faafetaia e le ASPA le onosa’i o i latou uma a’afia i lenei fa’aletonu, aua e le o faigofie le motusia o le suavai taumafa.

 

LEAI SE TASI UA MAUA CORONAVIRUS I AMERIKA SAMOA

 

Mai le to’atele o i latou ua faia pea tui suesue o le fa’ama’i coronavirus, ua fa’amaonia pea lava e leai se tasi o nei su’ega ua fa’ailoa mai e leai lava se tasi ua maua i le covid-19.

 

E aofia i nei tagata uma ua mae’a faia suega o le Covid-19, o i latou o loo faigaluega i luga o va’a uma e ulufale mai i le tatou Uafu tele, fa’atasi ai ma e o lo’o malaga fa’apitoa ma Samoa i malaga a vaalele Samoa Airways ma le Talofa Air. E aofia uma ai fo’i ma e na malaga mai i le vaa o lo’o fa’auaau pea lava ona taula mai i le tatou uafu e i ai lana aufaigaluega o lo ua maua ane i suega nei, o lo ua maua i le ma’i ma o lo’o taofia pea i luga o le Fesco Askold.

 

O se isi fo’i lea o taumafaiga o loo fa’aauau pea ona talimata’ia e le atunuu, ona o lo ua i ai i faitoto’a le fa’ama’i Covid-19. O le galuega o lo’o fa’atautaia fa’atasi nei e le Matagaluega o le Soifua Maloloina ma le Matagaluega o le Pulega o le Uafu ma Malaeva’alele ina ia le ofi mai lava lenei fa’ama’i oti, e matua lelei lava, aua o lea ua mautinoa ai le saogalemu pea o le atunuu mai le Covid-19.

 

I le taimi nei, e toa 14 tagata o lo’o faigaluega i le latou potu suesue, ma o lo’o gafa ma le fa’atautaiga o suesuega uma mo so’o se tasi o ulufale mai i le atunuu i so’o se ala mai le potu suesue a le DOH i le falema’i i Tafuna.

 

E ui fo’i la ina fa’aopoopoina le tele o suesuega e faia mo le aufaigaluega a tatou Kamupani Va’a o lo’o faigaluega fesootai ma lea va’a oloa, ua faia soo ai latou tui suesue mo le covid-19, ae ua lava tapena lea aufaigaluega mo latou tiute ma le fa’aaogaina o masini mo suega o le Covid e pei ona fa’atulaga ai.

 

O le agaga fa’afetai ua fa’ailoa mai pea e le Komiti o le Covid-19, ona o lo’o mafai ona galulue fa’atasi mai kamupani va’a, le Va’aoloa , le Matagaluega o le Uafu faatasi ma le Matagaluega o le Soifua Maloloina ina ia mautinoa lava le saogalemu o le atunuu, ma ua leai lava se tasi o le atunuu ua pesia I le Covid-19 i le taimi nei.