Pago Pago, AMERIKA SAMOA

SUA ELEELE FAUSAGA O FALEAOGA SAMOANA MA FAGAITUA

O le aso Faraile na te’a sa oo atu ai le Kovana Sili Lolo Moliga ma nisi o lana Kapeneta i le lotoa a Fagaitua High ina ia latou suaina le eleele mo le latou faleaoga i le itula e 8:00 i le taeao lava. Ina ua mae’a sa taliu mai i le lotoa a Samoana Highmo le suaina fo’i o le eleele mo le amatalia o galuega e fausia ai le fale a’oga Fogafalelua.

O le sauniga lea i Utulei sa amatalia i le talosaga sa si’itia e Elder Rev. Ioane Evagelia ma fa’asolo ai le polokalama e le fofoga o le aso, Sui Fa’atonu Fa’auifono Vaitautolu. Na muamua tuuina le avanoa i le tamaitai Fa’atonu Sili o Galuega, Faleosina Faiai Voigt, ina ia saunoa e tusa ai o le aiaiga o le galuega ma le Konekarate fau fale ua manumalo i le tauofoga.

“O le galuega o le tau maulalo lava na fa’aulu mai i le tauofoga e $839,000, ao le tau sili ona maualuga na fa’aulu mai e le to’a 12 o kamupani faufale sa tauofo e $1.24miliona. O lo ua taua’aoina nei le galuega i le Kamupani a le Happy Trucking Construction i le latou tau na fa’aulu e $839,000. O le tau a le tusi ata o le galuega na fa’amauina mo lea galuega e $932,000. O le umi ua ofoina mai e le Happy Trcking Construction mo le galuega lenei e 8 masina. O le fale a’oga lea e fogafalelua e aofia ai le Ofisa o le Aoga atoa, Ofisa o le Pule Aoga ma le Ofisa o le Sui Pule,  ma ona fale ta’aele i le fogafale muamua, ae o le fogafale lua o le a aofia ai nisi o potu a’oga ma isi lava potu o lo’o mana’omia e le Laumua i le taimi nei,” o le tala lea a Voigt. 

Mo le Kamupani Faufale o le a latou galueaina lenei galuega, sa ia fa’ailoa mai ai nisi o latou galuega ua mae’a ona latou fausia ae maise o isi fo’i galuega o lo’o fa’atautaia pea lava i le taimi nei.

“O le Happy Trucking sa latou fausia nisi o faleaoga fogafalelua i le Fagali’i Elementary ma ua mae’a umusaina lena galuega ua faaaogaina fo’i e lena aoga. Ua latou fausia le alatele i Leapaga – Fagaima Road i le taimi nei. Ua latou maua fo’i le Konekerate e fausia ai le Faleta’alo o Lupelele, ona o lea ua tatou iloa patino ai, e gafatia fo’i e i latou ona fausia lenei galuega tele mo le Samoana.”

I le afoga le Kovana sili sa fa’ailoa atu e Voigt lona agaga fa’afetai, ona o le mamao o le tofa ma le loloto o le fa’autaga, ua le manatu ai lava ina ia tu’ua le nofoa e le o toe mamao, ae o lo’o fa’ataunuu pea lava tiute e ao ina fa’atino, ae mautinoa ai o le a fa’amae’a e le nofoa’iga fou o lo’o fotua’i mai e avea ma ta’ita’ia le Malo o Amerika Samoa.

O le avanoa mo le Kovana Sili Lolo Moliga sa soso’o ai, ma sa ia tula’I ma le fiafia e fa’ailoa atu I le Laumua i Samoana, “Pe afai o le a mae’a le falea’oga tele lenei, ua toe tasi ai le isi falea’oga fogafalelua e ao ina fausia mo le Lotoa o le Malie, ona mae’a ai lea o le fa’atulagaga mo lenei vaitausaga, ua aulia ai fo’i le 75 tausaga talu ona fa’atuina lenei puna o le malamalama i lo tatou Fagaloa.”

“O le tulaga ua i ai nei le falea’oga lea, ua toe suia ai le falea’oga tuai, ae ua fa’atulaga ina ia mafai ona fa’aleleia le malae mo ta’aloga a tamaiti. O outou fo’i le Laumua o lo ua mafai ona fa’aaogaina le tatou atugafale i le Malae o le Suigaula a le Atuvasa. Ua outou va’aia ua lanu moana uma le valiga o lenei atugafale. O isi ia nofoaga e mafai ona outou fa’aaogaina e faitau tusi ai, faia ai tou aitema ma a’oga o siva ma mea fa’apena, ina ia maua’a lo outou iloa, o outou o tausimea a le tatou Malo. Ia outou tutupu a’e ma mautinoa i outou loto, sa faia le vaega a le tatou Malo mo outou ia outou tagolima. Ua tuuina atu ma le matagofie, aua ne’I outou fa’aleagaina ma fa’amatagaina i nisi tusitusiga ma isi mea fa’apena.”

Na saunoa fo’i o ia e tusa o le taumafaiga ia lelei tapena le lotoa ma ona falea’oga, “O lenei lava vaitau, o le Laumua lenei o lo’o tutula’i ta’ita’i sa a’otauina mai ai. O nisi tausaga mulimuli mai o le a maua ai ni sao mai isi Laumua o le Malo, peita’I, o le ala lea o le agaga me’eme’e ma le fia fai mea lelei, i le Laumua sa utuvai ai, aua e ui lava ina fa’apea sa fa’auu mai le Laumua o le Segaula ina ua fa’amae’a a’oga maualuluga, ae o iinei lava sa amata atu ai, ona fa’ai’u ai lea ina ua mae’a le a’oga maualuga i le Manu’atele. Samoana o lo’o tepa mai lava i se sao mo le Laumua sa fausia loto, fa’amatala mafaufau ma ua mafua ai ona gafatia ona faia fa’aiuga ma fa’atino ni galuega.”

O le leo lava e tasi sa faafofogaina i le sao o le tamaitai Fa’atonu o A’oga, Dr Ruth Matagi Tofiga i lona foi sao i folasaga sa fa’afofogaina i lea taeao. “O lea ua toetoe lava mae’a lelei galuega uma sa fuafua mo le fa’ailogaina o le atoaga o le 75 tausaga o le tatou Laumua. Ua fa’atulaga sa’o fo’i falea’oga uma ina ia matagofie le folasaga o le aoga i se va’aiga lautele. Onosa’i e leai lava se mea lelei e le fa’ataunu’uina pe a loto i ai, ae ia silafia e le laumua lenei, ia soo’afa le poto ma le fa’autauta, o le sini po’o le auau lena o lenei tausaga aoga. Ia maua le poto, ae so’otau;au loa i ai ma le fa’autauta, atoa loa le atamai o le Atua i lou loto.

“Poo a lava nei fale aoga tetele, ae le sili fale a’oga nai lo outou I totonu o faleaoga o lo’o aoaoina ai. Ua moni le upu a le atunuu, Ua le o le fale, ae o le anofale! Ia outou maua lava le poto o lo’o mana’omia mo outou e fa’atautaia ai le tatou malo i le lumana’i.”

O toega na o saunoaga o le aso ona suaina lea o le eleele mo le fa’amoemoe. Ua vaaia fo’i le ese o pulou ua fa’ao’o ane mo lea fa’amoemoe e le Happy Trucking mo meaalofa toina atu I sui uma sa auai i lea sauniga mamalu. Ua le fa’aaogaina pulou faigaluega mo e faufale, ae ua fa’aaogaina pulou masani e fa’aevaeva ma fa’amanatu ai le aso faiamoemoeina.

KOVANA LOLO - TAOFIA UMA OVA TAIMI MO TAGATA FAIGALUEGA

I le taimi nei,ua fa’ailoa mai e Kovana Lolo Moliga, ua taofia nei ona toe ovataimi se tasi o le aufaigaluega a le malo, ona ua fai lava si to’atele na’ua o nisi ua oo atu ia te ia le fa’amaoniga o latou Ovataimi ina ia totogia. O lea fa’aaliga ua le aofia ai le aufaigaluega a le matagaluega o le soifua maloloina, ma le matagaluega o le Uafu ma Malaeva’alele, ae maise i latou o lo’o feagai sa’o ma le puipuiga tonu o le atunuu mai le Covid-19.

Ua ia fa’aalia fo’i lona agaga fa’anoanoa ona o lo ua mataituina nei, e le o faia le galuega a le vasega o fa’atonusili o nei matagaluega ua fa’afaigaluega ovataimi latou aufaigaluega.

“E ao ina taga’i totoa fa’atonusili o matagaluega ta’itasi, ina ia le faigaluega ova se tasi o latou aufaigaluega, poo a lava galuega e tatau ona faia, ia vave ona fa’atino i taimi o lo’o faigauluega ai tagata faigaluega ona leai lea o se tasi e ova taimi.”

Ua toe fa’amanatu, “O lo’o i ai pea le tatou faasa ua mae’a fa’atulaga mo ovataimi e le’i fa’atagaina atu, o lea la o nei talosaga uma ua faaulu mai mo la’u fa’aiuga e ao ina te’ena, ae o le fa’atamala mai o outou fa’atonu, e afua ai ona ovataimi tagata faigaluega.”

“Mai le aso o lenei tusi ua toe fa’ailoa atu ai, ua taofia uma lava ovataimi mai matagaluega uma o le malo, se’i vagana ai le Matagaluega o le Soifua Maloloina ma le Uafu, lea e galulue feso’ota’i ai tagata ma le taumafaiga ia le ulufale mai le Coronavirus i o tatou laufanua.”

Manatua o lo’o i ai lava fa’alavelave fa’afuase’i e ao ai ona fa’amautinoa e faigaluega ovataimi nisi, ma e alagatatau ona fa’atagaina lea tulaga e fa’atonusili o matagaluega.

“O lo ua mae’a fa’atulaga fo’i le ala e uia e mafai ai ona fa’atagaina ovataimi mo i latou ua mana’omia ona galulue ovataimi, e tatau ona fa’aaoga mai lea ala i taimi e fa’afuase’ia ai so’o se matagaluega i tiute e ao ina fa’atino. Afai e leai, o le a te’ena uma ovataimi ma ua taofia fa’amalosi fo’i ovataimi i le taimi nei.”

O se toe fa’amatalaga lea a le Kovana e tusa o taimi ova o tagata faigaluega, ae ua fa’amamalu fo’i ma le uia mai o le fa’atulagaga mo talosaga e ova ai nisi o le aufaigaluega e fa’atino tiute, ma o lena fo’i fa’atagaga e fa’amautu uma mai talosaga i le Kovana Sili.