Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

SAPAIA REP, WESTERMAN - FAUSIA SE FALEMAI FOU MO LBJ MEDICAL CENTER:

 

Ua fa’ailoa mai e le tatou Faipule i le Konekeresi Uifaatali Aumua Amata lona agaga fa’afetai ina ua ia mautinoa ua aloalo ane fo’i le ali’i Faipule i le Konekeresi a le malo tele mai Arkansas, Bruce Westerman, ma ia fa’amautu lona sapaia o le toe fausia lelei o se falema’i fou i Faga’alu mo Amerika Samoa, sui ai le falema’i tuai LBJ Medical Center o i ai nei.

 

Na saunoa fa’apitoa lenei ali’i Faipule mai Arkansas i le fonotaga a le komiti mo Punaoa a le malo Tele i le fonotaga sa faia a lea komiti i le aso Lulu na te’a nei. Ua ia saunoa fa’atauanau fo’i ina ia sapaia lenei pili o le toe fausia o se falema’i fou mo Amerika Samoa e suia ma fa’afou ai le LBJ Medical Center o tula’i nei.

 

Na malaga mai lenei ali’i Faipule o Arkansas i le asiasiga talu ai a le Konekeresi i le falema’i o Amerika Samoa i le tausga e 2017. Ua faailoa mai lona taofi, “Ao taumafai le tatou Komiti e fono ina ia si’itia le fesoasoani tupe a le Malo tele e toina mai mo Amerika Samoa, ae ua toe fa’apena fo’i ona taumafai e aiaia lona fa’aaogaina, ae o loo moomia ona fa’aleleia le falema’i e tautuaina ai le soifua o le atunuu atoa.”

 

I lona taofi ua fa’ailoa manino, “E sili ai ona toina mai le fesoasoani e fa’aleleia ma fa’afou atoa ai le LBJ Medical Center.” 

 

O se fiafiaga lea o le tatou Faipule i le Konekeresi Uifaatali Aumua Amata aua o lo’o taumafai atili o ia, pe afai e toina mai le tatou tinoitupe mo le COVID-19 $511miliona, e ao ina tatala le fa’aaogaina e aiaia lea e le ta’ita’i o le tatou Malo, “E fa’atino ai nisi o galuega tetele ua tatau ona faia, ae maise lava i le tatou falema’i, ua loa ona tutula’i nei atufalega e fa’aaogaina, ua tatau lava ona suia pe fa’afou atoa. E mautinoa foi o lena falema’i e tatau ona fausia ua i ai ma aiaiga tau le togafitia ai ma gasegase o le Coronavirus ma isi fa’ama’i pipisi tele o lo’o fotua’i mai.”

 

MALAGA FAIGAMALO I MANU’A - ASIASI & VA’AI GALUEGA

 

O le aso Tofi na masi’i ese atu ai malaga mulimuli mo le auina atu o le faigamalo i le Manu’atele mo le fa’amoemoe e asiasi ma maimoa i galuega ua fa’atino e matagaluega ta’itasi i le Motusa. Ia iloa ma silafia e le fa’atonu o matagaluega ta’itasi, tautua o lo’o fa’atino e latou matagaluega i le Manu’atele. Ua avea fo’i lea ma avanoa e te oo atu i Manu’a ma e te maimoaina le lalelei ma lona to’afilemu.

 

Peita’i, ona ua tofia i latou eseese uma e avea ma taiulu o latou matagaluega, e ao ina e oo i ai ma va’ai patino po’o fa’atino tiute o lau matagaluega i le Motusa, FaleTa’u ma le Faleluasaga.

 

O va’a mulimuli e lua na faato’a malaga atu ai le Sui Kovana ma le Faletua faapea ma le Fesoasoani Muamua a Kovana Lemanu P. Mauga, Tuimavave Laupola.  O le va’alele o le 7:00 i le taeao ma le va’alele o le 11:00 na fa’ai’u ai malaga mo le Manu’atele. 

 

Peita’i na muamua Kovana Lemanu Mauga ona o le fa’amoemoe e tatalaina le a’oga tuufa’atasi ua fa’atulaga nei i le Aoga Maualuga i Ta’u i le aso 27Mati, 2021 ma le suaina o le eleele e tatala ai galuega e fa’atino i le Malaeva’alele i Ofu i le aso 26 Mati, 2021.

 

O lona uiga o lenei malaga e amata mai i le asiasiga i Ofu ma Olosega ae tomuli lea i le Faleta’u i Fitituta, Ta’u ma Faleasao.

 

O galuega o lo’o mautinoa o lo’o matele ina fa’aaogaina le Maota o le malo i Ofu ua aofia ai le matagaluega o Alamanuia mo Tagata Lautele, i le tufatufaina atu o WIC ma Food Stamp, le matagaluega o le Soifua Maloloina mo le fa’atautaiga o tuiga a le fanauiti ma fa’asolo ai i tuipuipuia o fa’ama’i eseese mo le fanauiti, ae o lea fo’i ua soso’o atu ma tuiga o Tui Puipuia mo le Covid-19 lea ua mae’a fa’ao’o atu fo’i i le Manu’atele. O lo ua i ai fo’i ma le potu fa’apitoa e tiute ai leoleo i le Faleluasaga, ma e to’alua loeleo tamaitai o lo’o tiute ai, ma le ta’avale a leoleo e tasi, e tautuaina lea itu o Manu’a.

 

O le Matagaluega o A’oga o lo’o fa’aaogaina lava e i latou Ofisa i A’oga ta’itasi, ae i ai foi potu ua fa’atulaga mo le Matagaluega o A’oga i lea lava faletele o le Malo i Ofu. Ua fa’ailoa mai o le tatalaga o le Aoga tuufa’atasi lea i Ta’u ua i ai ma le fale ua fa’atulaga mo le fa’amautu atu i ai ma sapalai o mea taumafa a le polokalama o Mea’ai a Fanau A’oga i le lotoa o le Laumua i Ta’u.

 

O le vaega a le Malaeva’alele ma Uafu, ua i ai nei le isi galuega lea ua suaina le eleele mo le fa’alelei o le ala sese’e Malae Va’alele i Ofu.

 

O le malaga fo’i a le MV Manu’atele  na tu’ua le Uafu tele i Fagatogo ia Mati 24, 2021ma e silia ma le 50 le pasese o fa’atonu ma sui o matagaluega sa malaga mo lea faamoemoe ma ua fa’aopoopo atu lea faitauga i le pasese masani lava latou mo e o alaala tumau i le Manu’atele.

 

SUI PULE SILI FOU O LE OFISA O FESO’OTA’IGA [ASTCA] - CHUCK FILIAGA

 

Ua mae’a le fonotaga a le Komiti Fa’afoe o Fesoota’iga ma ua latou filifilia ai le susuga Chuck Leota ua avea ma pule sili fou le tumau a le ASTCA, e afua mai ia Mati 24, 2021. Ua mae’a fo’i la ona fa’alauiloa e le afioga le Kovana sili lea filifiliga fou.

 

O Leota o se tasi ua iloga fo’i lana tautua i lea matagauega ma ua i ai foi lona tomai fa’apitoa i ala o feso’ota’iga tau initeneti ma tautua tafa’ilagi eseese e mo’omia mo lea fo’i tofiga taiulu i lea tautua lautele a le tatou Malo.

 

E le gata i lea ae ua mafai fo’i ona fa’aauupegaina o ia i tomai e mafai ai ona feso’ota’i gofie ma lana aufaigaluega, silafia lelei ala o le pulega ma le va ma sui ta’itasi o va’aia ala eseese o le tautua lautele tau feso’oga i le va ma tagata lautele o le atunuu fa’apea fo’i ma pisinisi. O le atina’e o ala o feso’ota’iga, o le lelei o le tautua ma le vave ona fa’atino o tiute uma e tautua ai le lautele ma pisinisi, o se mea sili lea e ao ina fa’atino e nei auaunaga mo le atunuu.

 

I se pepa o fa’amatalaga mai le Ofisa o le Kovana ma le ASTCA, ua fa’ailoa ai, o le ASTCA, o le fa’amoemoega lea o le malo e mafai ai ona se’e malu le sa o le tatou malo i ala o feso’otaiga eseese i telefoni ma so’otaga tau telefoni, o upega tafailagi ma tautua eseese a le Initeneti.

 

“O le isi sitepu sili ona taua, o le fa’ao’o lea o Amerika Samoa i fa’atauga e fa’aaogaina ai so’otaga fa’ainiteneti ma faleoloa o loo i so’o atunuu ma e fa’aaogaina ai pepa talatupe mai faletupe. O le a fa’amoemoe tasi le atunuu ina ia fa’ataunuu lea suiga ae o le ASTCA le enesini na te una’ia malosi i tatou ia maua’a lea suiga.”

 

“O nei suiga uma e le faigofie, ua tatau foi ona fa’anatinati ona faia ia mautu le fuafuaga fa’ataoto a’o le’i oo mai, ina ia le fa’ate’ia fa’amanu i ofaga le atunuu i nei suiga uma. Ua avea le oo mai o le Covid-19 ma ala ua fa’ata’alise atili ai ona faia nei suiga tetele i ala o tatou fefa’ataua’iga e fa’aaogaina ai so’otaga fa’ainitenti.”

 

“I le taimi nei ua manaomia ona galue aiai le alii pule fou, ina ia filifilia toto’a fo’i le lana aufaigaluega totofi i ituaiga tomai e moomia mo lea ituaiga o matata, ma le fa’aaogaina lelei o i latou e fa’aaoao i le mamalu o le atunuu lea ituaiga o sootaga mo fefa’atauaiga faatasi ai ma le fa’auia mai ai o isi fesoasoani ma tautua eseese uma,” o se toe fa’amatalaga lea a Kovana Lemanu P. Mauga e tusa o le ala o tautua tau feso’ota’iga ua tatau ona fa’anofofale i  mafaufau ma le silafia o tagata uma o le atunuu.

 

O le taimi nei o le fa’aleleia atili ma le siitia o ala e mafai ai ona fa’ao’o le tautua lautele lea i le atunuu atoa ina ia mafai e ala na ona fa’atautaia ai fefa’ataua’iga, o se manulauti o lo ua fa’amuamua i manatu ma taumafaiga a le tatou faigamalo fou. E o fa’atasi lea suiga tele ma le atina’e foi o le matagaluega i ala o ana tautua lautele

 

“E avatu le fa’afetaia tele i le tautua matavela a Ms Falavaoto Sualevai i tausaga sa avea ai o ia ma Pule SIli ae maise o le CFO o le teutupe a le ASTCA mo tausaga sa ia tautua ai. Ua iloga e tele suiga sa faia fo’i i le ASTCA i lona tula’i mai, ma sa ia tautua lava fo’i ma faia le mea sili ua ia gafatia ona fa’atino. Fa’afetai tele mo lau lana auaunaga,” o vaega lea o pepa fa’amatalaga mai le ASTCA.

 

Ina ua fesiligia nisi o le Komiti Fa’afoe pe aisea lava ua suia ai le Pule Sili o le ASTCA, ae ua le maua mai se tali. Peita’i o se tasi lava o tagata faigaluega na fa’ailoa maia, “Ua maua ane e le Komiti Fa’afoe e na’o le tasi lava le saini o loo i ai i le Konekarate a Falavaoto Sualevai, ua na’o le saini lava a le Taitaifono o le Komiti Fa’afoe a le ASTCA lea ua mavae atu, na’o le saini a Iulogologo Joe Pereira. Ua le talia e le Komiti Fa’afoe fou lea tulaga, sa tatau ona saini a’ao uma le Komiti ua te’a i le tofiga o le Pule Aili o le ASTCA e fa’amaonia ai le tofiga, aua o le Taiulu fo’i lea o lea matagaluega tele a le malo.