Ads by Google Ads by Google

TALA I VAIFANUA


Va’aiga i Lalelei o le masii mai o Aiga e fa’ailoa le latou valevale alofa ona ua amia le fanau ia tautua i le galuega ma le Ekalesia i Vailoatai. Tina ma tamaitai o aiganalua o Alama ma Osana Solofa. [ata: Leua Aiono Frost]

Pago Pago, AMERIKA SAMOA

 

FEILOAI EFKAS VAILOATAI MA LE LATOU FA’AFEAGAIGA FOU & AIGA:

 

I le atoaga o le tasi le tausaga ono masina ma le 2 aso ae nofoia loa le Tama ma Tina Fa’aleagaga o le Ekalesia Fa’apotopotoga Kerisiano i Amerika Samoa i Vailoatai.

 

O lo ua mae’a feiloa’i aiga o le susuga le Fa’afeagaiga Taulagi FS Alama Solofa ma le Faletua Osana Bernadette McKenzie Solofa ma le pa’ia maualuga o le EFKAS Vailoatai i le aso Faraile o le vaiaso ua te’a, o le aso ua fa’ailo o le Eseta o le Manumalo i le lalolagi.

 

O lo ua avea ma se aso sili ona fiafia ai le Ekalesia, aua o lo ua toe fa’atula’ia le Auauna a le Atua ma le Aiga, i lona maota ua mae’a saunia lelei, e alaalata’i ai ma faia le la’ua auaunaga i le Atua ma le olioli.

 

O lea taeao sa fa’ataunuu lava le feiloa’iga a itu na lua, i le masi’i atu o aiga ina ia molitai le Faife’au Samoa le faletua  ma le fanau i lo latou Ekalesia e fa’anofonuu ai ma galulue. O le ava o le feiloa’iga sa matua mafuli i ai le Ekalesia ma sa fa’atino atoa lea e le malosi o le Ekalesia, le tupulaga talavou ma i latou o e o fofoga o le Ekalesia ma le afio’aga fo’i.

 

O le fofoga o le tofa Fa’aua’a Kateferu sa tula’i e fai ma fofoga taumolimoli o el Ekalesia ae tuualalo ai fo’i le fofoga o Seumalo Sofa Seumalo i lo la’ua faiva tautailua aua le taeao fa’asino i le Ekalesia i le afio’aga o Vailoatai.

 

Ina ua mae’a fa’aaloaloga ma mea uma o le aganuu e patino i feiloa’iga ma fa’anofoia Faife’au Samoa i o latou ekalesia e fa’anofonuu ai, sa fa’atulaga loa le sauniga e fa’apa’iaina ai lo la’ua vala’auina i le Malumalu EFKAS i Vailoatai lava. Sa amatalia lea sauniga mamalu i le itula e 11:00 i le taeao.

 

O le sauniga mamalu lea sa fa’atautaia lea e le toeaina o le Pulega Rev. Elder Tautalatasi Fanolua, ae tofusa sao uma isi fa’afeagaiga o le afio’aga i vaega o le sauniga mamalu.

 

Ina ua ame’a sa toe feiloa’i uma le aofia i le maota o le galuega ina ia latou auai i le tausama’aga o le aso fiafia o le Ekalesia ma le tele o le maemae o le Ekaelsia na masi’i ane mo le taliga o aiga e ala i a latou fa’aaloaloga.

 

O se aso fiafia, aua ua atoa tino o le galuega a le Atua ma o le finagalo fo’i lea o le ekalesia, ia mafai ona latou tausia o latou matua faaleagaga i le mae’a ai o lenei Eseta 2021.

 

AMATALIA LE NOFOVA’AVA’AIA O I LATOU I HAWAII IA APERILA 03, 2021 - MALAGA #3

 

Ua fa’ailoa ua amatalia le nofo va’ava’aia o i latou ua fia maua mai se avanoa e malaga mai ai i le tatou nei malo, i le malaga lona tolu ua fa’atulaga e le malo mo tatou nei aiga.

 

O le aumalaga lea ua foufou e tu’ua Hawaii i le aso 15 Aperila, 2021 ma e fai Fu’a mai i latou i le tatou malo, ae nofo va’ava’aia lava mo le 14 aso fa’ato’a mafai ona oo i aiga.

 

Ua fa’ailoa mai e 220 i latou ua mae’a ona fa’atulaga e tapena ane i le nofo va’ava’aia ae o le a maua’a mai se aotelega o le aumalaga pe a o’o i le nofova’ava’aia ma iloa ai pe o ai moni e gafatia ona pasia lea tulaga ma mae’a lelei o onosa’i ai e nofova’ava’aia malaga.

 

Ua nofoia fo’i e i latou le faletalimalo o le Ohana Waikiki East Hotel i Honolulu. O le aumalaga lea ua sili ona to’atele pe afai o le a sao uma a latou suega o le Covid-19 ma o le a le fati fo’i i latou i le umi o nofova’ava’aia fa’ato’a malaga mai ai, pe toe ma’i se isi a’o nofova’ava’aia.

 

E fa’alua lava fo’i ona faia suega o le Covid-19 mo i latou a’o nofo va’ava’aia fa’ato’a malaga mai ai. I malaga e lua ua te’a, sa i ai nisi na fa’amaonia suega o lo’o gasegase i le Covid-19 ma le mafai ai ona malaga mai.

 

Ona o le to’atele ua mafai nei ona nofova’ava’aia ma fa’atulaga e o mai, atonu o le a le lava ai potu fa’aagaaga e nonofo ai i le Tradewinds. Pe afai ae tupu lea mea, ua tapena fo’i isi nofoaga ua ame’a fa’aagaaga e i ai Fatuoaiga, e fa’aaoga i lea lava fo’i vaitaimi pe a mana’omia.

 

O malaga mai Samoa ua fa’ailoa mai ua mae’a fa’amautu mai i Amerika Samoa, o tatou tagata nonofomau iinei ma isi o tagata nuu Amerika Samoa ua toe taliu mai. E to’a 15 i latou na malaga mai i le aso 28 Mati, 2021 i le Falefou e nofova’ava’aia ai tagata i Tafuna, tuafale o le tatou falema’i i Tafuna.

 

O lo ua i ai fo’i nisi o sui iloga o le FAA sa malaga mai i le aso 28 Mati, 2021 ina ia fa’atautaia se suesuega fa’apitoa tau folauga i le tatou gataifale e toe pasia ai femalagaiga fa’aletausaga mo i tatou. O sui nei na toe fo’i ia Mati 29, 2021 ae le’i i ai se feso’ota’iga a i tatou ma nei sui, aua o se suesuega e faia lava mai luga o vaalele lea sa tapena.

 

Ua i ai se va’alele o lo’o tau tuufa’atasia a le Kamupani a le Fletcher ina ia aumaia ai latou sui Inisinia fa’apitoa e latou te va’aia fa’aleleia le fa’atautaiga o paipa o le Sewer lea e aoina mai ai le lapisi lafoa’i mai le falelima i sasa’e. O lo’o fa’atautaia lea galuega mo le ASPA e le Fletcher Construction Company. O lea malaga o lo’o fuafua e malaga mai le aso Lulu mai Samoa, ae o le aso mo i tatou iinei.

 

Ua i ai nisi malaga o lo ua fa’auia nei i le Komiti Fa’afoe o le Covid-19 mo le latou pasiga ma ua fa’atalosagaina fo’i le matua’i fa’amama leleia atoa o va’alele a le Samoa Airways lea e malaga mai e fa’aaoga i femalaga’iga i le va ma le Manu’atele, ona o lo’o tele galuega toe lipea sa faia i lea va’alele. O le fautuaga ia matua fa’amama lelei e pei ona fa’atulaga ai ina ne’i auamai ai se verusi o le Covid-19.

 

O tatou talosaga uma lava mo le ulufale mai e fa’amoemoe lea i le fa’aulu uma atu o kilia o mana’omia o le soifua Maloloina ma le faia o tui suesue o le Covid-3 a’o le’i pasia le tolu aso ae ua malaga mai pasese o talosaga e malaga.

 

Ua leai se fa’amaoniga a le komiti mo le talosaga e tatau ona sau se malaga toe fa’afoia mai ai o tatou tagata mai le malo o Tonga, ae ua va’ai mamao atu le komiti i le fa’atautaia mai o se malaga tu’usa’o mai Fiti i le lumana’i.

 

TASI LAVA LE TUI O LE JANSSEN MO LE  COVID-19, LEA I SE TUI #2

 

O le a i ai nisi o le atunuu o le a le toe fa’alua ona tuia le va’ila’aua mo le tui puipuia o le Covid-19, ae o le a fa’atasi lava ona tui i latou i le tui e fa’aigoaina o le JASSEN. O lea vaila’au ua mae’a oo mai foi lona sapalai ma ua fa’aagaaga nei ina ia tuina ai fanau a’oga o lo’o ua silia ma le 16 tausaga le matutua.

 

O le JANSSEN, o le vaila’au na tu’ufa’atasia mai e le Johnson & Johnson Vaccine ma ua fa’atulaga e tasi lava le tuiga ai o le tagata, ua le tutusa ai ma Pfizer ma le Moderna lea e mana’omia lava ona fa’alua ona faia tui. Ua mae’a maua mai le 600 tui o le Janssen i le aso Toona’i ua te’a.

 

Ua iloga fo’i e aoga tele lea tui mo le vasega o le atunuu e faigata ona toe fe’avea’i fa’alua mai i latou e faia tuiga, ma ua iloga ai le vasega o le fanau mai le 18-25 tausaga le matutua, lea e aofia ai le fanau a’oga i lena vaega atoa.

 

Mai ia Mati 30, ua fa’ailoa mai ua mae’a faia tui muamua, ae ole 41.7 ua mae’a faia tui uma e lua. O le 53.5% o le faitau aofai lea o i latou ua i ai tui muamua i le atunuu, o i latou e i le va 41-50 tausaga le matutua ua mae’a tuia; 54.9% o le 51-60 ua mae’a faia tui puipuia. ma le 58.8% o le 61 tausaga ma le matutua atu ua mae’a faia tui o i latou uma lava na, leai se tasi o totoe, ua maea tui uma e lua.

 

Ua fa’ailoa mai le agaga fa’afetai o le Komiti Fa’afoe ona ua mai le manuia le taumafaiga ia vave ona fa’ataunuu tuiga o tagata uma o le atunuu ma i latou o e uma o alaala i o tatou laufanua.

 

“Ua aluga lelei lava le tuiga lea o loo fa’asolo nei ma ua le fa’atalale le vasega o matua matutua ina ia vave ona tuia puipuia i latou, aua e vave tele le a’afia o i latou ua tino matutua i le fa’ama’i leaga lenei.”

 

Ua fa’apea fo’i ona fa’atulaga mai o le a totogia le tui mo le tagata e to’atasi e faia lona tui puipuia nei i luga o le Uafu mo tagata uma e ulufale mai va’a oloa ma isi pe afai o le a fia faia ai. O le totogi ua fa’atulaga e $150 mo so’o se tasi e le o se Sitiseni Amerika e fia faia ai sona tui puipuia o le Covid 19 i le Uafu. Peita’i o suesuega  o le Covid-19 latou e le o totogia.

 

O lea ua mua’i pasia lea iugafono ae fa’amoemoe e pasia mai e le Matagaluega o le Soifua Maloloina lea iugafono ona fa’ato’a fa’amalosia lea o le $150. mo le tui o le tagata e le o se sitiseni Amerika i luga o le uafu.

 

O le totogi lea e fesoasoani mo le fa’atupega o suega nei e faia ma tautua uma e fesootai ma le fa’atautaiga o nei tiute i ala silisili ona mama lelei.