Ads by Google Ads by Google

TALA I VAIFANUA


Le vasega fa’ai’uaso a le Aoga Maualuga a Manu’a. [ata: LF]

Pago Pago, AMERIKA SAMOA

MALAGA ASIA MANU’ATELE – GALUEGA FIA FA’ALELEIA & SUA LE ELEELE O LE FALEA’OGA I OLOSEGA ELEMENTARY:

Na vave malaga atu le afioga le Kovana Sili Lemanu Peleti Mauga  ma nisi uma o le aumalaga a le matagaluega o A’oga  i le Manu’atele i le taeao o le aso Tofi ina ia mua’i suaina le eleele e amatalia ai le galuega o le falea’oga fou o le Laumua i Olosega, le a’oga tulaga muamua. I le asiasiga mulimuli a le afioga le Kovana ma lana taupulega, fa’apea foi le malaga asiasi a le Lutena Kovana Talauega Eliasalo Ale i le masina o Aperila 2021 ua fa’amaonia ai, e moni lava ua tatau ona iai se falea’oga fou i Olosega Elementary.

O le fa’amatalaga na fa’ailoa mai ai e se tasi o faia’oga iloga, Wilma Thompson, “O le aoga lenei, o falea’oga lava nei sa amatalia mai ai le aoga lea lava e tutu mai, ma ua tatau ona fausia se isi falea’oga, ae toe fa’aleleia nei falea’oga  ua fai si tuai ma ua mana’omia ona fa’aleleia o latou fa’alo ma puipui o nisi o nei fale.”

O le aumalaga atoa na masi’i a le matagaluega o A’oga, na oo loa i latou i Fitiuta toe malaga atu i Ofu ma Olosega i le va’a a le Malo mo lea fa’amoemoe i Olosega. O le falea’oga fou lenei o le a fausia e le Paramount Builders ma o le falea’oga e fogafalelua, ua mafai foi ona fa’ailo le fausaga o lea falea’oga i le ata ua mae’a ona pasia mai mo le silafia a le mamalu o le Laumua ma le afio’aga o Olosega.

 Na taula atu fo’i le Manu’atele lll i le Uafu i Faleasao i le aoauli lava o le aso Tofi na te’a, ma ua maua ai fo’i se taimi e matamata ai i le galuega i le Uafu i Falesao, o se nofoaga ua amata ae le’i mae’a e mafai ona malutia ai le mamalu o pasese fegasoloa’i o nei afioaga o le Manu’atele. Ua iloga e matua lelei lava lea Uafu aua e mafai ona taula sa’o mai le va’a i le Uafu, nai lo le Uafu i Ta’u, e taula le va’a i gatai ae fa’aaoga le tama’iva’a o le Uilaolesami e la’u mai ai pasese ma uta i luga o le Uafu.

Peita’I, ua matauina e leai ni pa’u e mafai ona te’ena ese atu ai le va’a mai le taia sa’o lava o le taumuli mai le Uafu, lona itu tonu e fa’apipi’i mai I le Uafu ae fa’ataoto mai le ala u’amea ina ia mafai ona fela’ua’i uta e le Lifi. Afai ae tuu ai pea le taumnuli o le va’a e taia sa’o mai i le sima o le uafu, o lona uiga e le o toe mamao fo’I ae leaga le taumuli o le va’a Manu’atele lll poo le fa’aleagaina fo’i o lena vaega o le Uafu i Faleasao.

Lona lua o mea ua va’aia e tatau ona fa’aleleia, O le fola laupapa o le Manu’atele, ua latalata ina pa’u ai se lifi ma le avelifi a’o faia le galuega o le felaua’iga o uta a le pasese ma fa’amomoli i le Manu’atele. Ua lelei le fealua’i a le ave lifi, ae le o sefe le lifi ma le ‘ave lifi aua e mamafa tele fo’I lea meafaigaluega a le Malo fa’aopoopo i ai ma le mamafatu o uta, o pailate ua mae’a tapena i ai le taga sima, piliki ma oloa o faleoloa, ua va’aia ai fo’i  le tulaga le sefe o tagata faigaluega.

O le Fale na fausia mo le fa’amalumalu o tagata e tapena a latou uta mai le timu ma le la, ma tutufa’atasia ai latou pailate, ua va’aia le fai lava si maualuga tele o le fausaga ua fausia ai. Ua fa’afogafalelua lea fale, ma e le mafai ona alu i ai se lifi pe a i le va’ai atu I ai aua e le o fa’ataga ona ulufale pe fa’aaoga ilenei taimi, ae o se fale e va’aia le fausaga mautu lelei o fausia ai. Fa’ailoa mai e se tasi o tina mai Ta’u, “pei lava o le fale lea o lo’o ua taofia nei e le fa’amasinoga le fa’aauau ona fausia, ae le o mautinoa e au lea tulaga. E taofia ona o le fanua i le fa’alogo atu i ai.” 

O le a fesiligia fo’i le ta’ita’I o lea matagaluega Chris King e tusa o lea galuega ona toe fa’ailoa atu lea o se tali maoti mai e tusa o le galuega ma lona fausaga, pe mafai ona toe tuu e fa’afogafale tasi ma ia mafai ona fealua’I ai le Lifi i totonu e pei lava o le fale i luga o le uafu o vaa laiti i Fagatogo, lea e taula mai i ai le manu’atele lll ma le Lady Naomi mai Samoa.

“O loo manaia lava le fa’amoemoe o le fale lea, aua o lalo lava o Niu e fa’atali va’a mai ai le mamalu o le Manu’atele pe a tatalia le va’a, ae afai ae maua lea toomaga, ona fa’afaigofie lea ona fa’amalumalu o tagata ma uta mai le la ma timuga.” O se tala lea a le tina lava lea e faipisinisi i Ta’u.

Olo ua fa’aauau fo’i le fa’amoemoe o le Matagaluega o A’oga ina ia tuufa’atasia le  Laumua o Faleasao ma le Aoga Maualuga i le lotoa e tasi, le lotoa lea a le A’oga Maualuga o le Laumua o le Segaula. Peita’i o Fitiuta e le o manatu lea afio’aga e aumai  I ai ma le latou aoga. Ua fa’ailoa e nisi o matua o le PTA I Faleasao, ona o le to’agaogao o tamaiti aoga ma tau fa’asoasoa o faia’oga, e sili ai ona tuufa’atasia, peita’i e eseese lava taofi.

 

10 AU FA’AIUASO MAI LE LAUMUA O LE SEGAULA I MANU’A – IA SOOULA ASO LELEI:

 

O le sauniga mamalu sa ta’ita’ia lea e le susuga Rev. Elder Iosefa Autele i le tatalo amata ma sina upu fa’amalosi mai le Tusi Pa’ia mo le au fa’au’u e to’a 10  na amatalia lava i le itula e 9:00 taeao o le aso Faraile Iuni 04, 2021 i le faleta’alo o leAoga Maualuga a le Manu’atele.

Na auai atu le afioga le Kovana Sili Lemanu Peleti Mauga ma le faletua Ella Failauga Mauga ma le mamalu lasi o le Matagaluega o A’oga mai le Fa’atonu sili Talauega Samasoni Asaeli, le sui fa’atonu sili, Fa’afetai Teofilo ma nisi o taiulu o vaega eseese a le Matagaluega o A’oga, ae masie o matua fa’aleagaga o le Manu’atele ma le pa’a o aiga o pelega fo’I a le vasega fa’aiuaso I lea sauniga mamalu.

O le to’asefulu o i latou e aofia ai: Cinaroselyn Tafaoa -Suafo’a; Ioramo V’e’e, Margaret Filimigo, Theresa Ueligitone, Kathryn F. Tigilau, La’auli Moliga, Filigata Saia’ana, Junior Mauga, Peaulolo Tauanuu ma Vili Fonoti.

O le fofoga ole latou aso sa filifilia e le vasega fa’aiuaso, o se tasi sa avea ma latou Pule Aoga mo le 8 tausaga, ae 13 tausaga o avea ma faia’oga i le Manu’atele, ua ata fo;I le 24 tausaga o avea ma faia’oga i le matagaluega o A’oga a le tatou Malo ma o lo’o umia le fa’ailoga Masters i le Igilisi. Peita’i i le taimi nei, ua avea nei ma  faletua o le Faife’au EFKAS i Sailele, Amerika Samoa.

O ia lea o le faletua, ma o le tina o le galuega Patricia Tilafaiga Tuimalealiifano Sualauvi – Fuiava o Falelatai, Sasina ma Fitiuta Manu’a.

O le avanoa muamua o lauga o le aso sa tuuina lava lea i le afioga le Kovana Sili mo lana tuleiga, ma sa ia fa’ailoa ai lona fiafia i le tautua ua faliu se tasi o tamaitai sa ulufale mai o se faia’oga a le World Teach, ma ua ia nofo e avea ma faia’oga fa’akonekarate a le Matagaluega o A’oga, suia atoa lana kosi sa faataoto mo lona olaga, ina ua ia va’aia le mana’omia o loo feagai ma le fanau a’oga i le Manu’atele.

 

“Lea ua nofo Ana e sau mai Amerika, e le o se Samoa moni, ina ua ia va’aia le mana’omia ma ia taumafai e fa’atino se vaifofo, ae a mai tatou ma tatou filifiliga? O lona naunau e fia faia’oga i ni fanau a’oga o lo’o fia iloa le atamai, fia ausia togi  e mafai ai ona fa’alautele atili lo latou iloa I mataupu ua filifili e tau’avea i aoaoga maualuluga. Ua le tuu Ana i lana lava taumafaiga, ae ua manatu Iile lelei o le isi alo o Amerika Samoa. Faia’oga uma, ia pei tatou o Ana, e saunia e le Atua avanoa lelei mo oe e fa’aleleia atili ai lou lumana’i  pe a e fa’amaoni i lou tofi o le aoao atu o fanau, ae maise i nofoaga o lo’o maotua mai le  tumutumuga o tagata e to’atele, lea o lo’o sili ona i ai le mana’omia.”

O le avanoa na soso’o ai o le saunoaga lea a le fofoga fa’apitoa, le Faletua o Patricia Tilafaiga Fuiava. Ma sa ia sauoa, “Aga’i i luma, solo i tua poo le tutumau. Peita’i ou te manatu ina ia aua lava ne’i e tutumau, ae ia aga’i lava i luma i mea uma.  E tatau ona aga’i i luma, ae tauau o le soloitua e fita tele, e toe fafagu mai ai lou lagona e toe aga’i i luma. Ae aua lava ne’I e tutumau, aua o le isi ua manatu ua lava nei mea, ua ou malie i mea ua ou maua, ona tutumau ai lea ua le toe fa’aauauina le taumafaiga.”

“I soo se folauga e sau fa’itasi lava lou aga’i i luma ma suiga e tele, ia gafatia ona e fa’ataututu ma fesuia’i au kia ia mafai ona e tauavea fa’atasi suiga ma fa’aauau lau folauga.. Poo a lava mea e fa’auilavea i lou olaga, aua ne’i e fa’atalatuu ai i lau sailiga, ia au lau sailiga ma e toe manatu mai i le tapua’iga, toe fo’i mai e tautua lou malo ma ou tagata sa e tuua mai le amataga o lau folauga.”

“O outou o le fa’amoemoe o le atunuu ina ia sooula ai aso lelei i le tautuaina o le atunuu. Afai fo’i o se ula ua fuafua e su’ia, e mautinoa e fia faia ia matagofie i le maimoa ma le silasila a le sui o lo’o sui’ia lana fa’asolo. E fa’asolo lelei fo’i fugala’au ma mea o su’ia ai le  ula ina ia matagofie ma fia avea ma se fa’asolo a se tasi. A lelei fa’asolo le ula, ua fa’apea fo’i ona matagofie i le maimoa i ai.”

“Tautuana ia matagofie le ula o le a su’ia ai e aofia ai ma oe lea ua fa’au’uina mai le Manu’atele, o outou ua mae’a tapena lelei mo le fa’amoemoe maualuga, e sooula ai aso lelei mo le atunuu ma ana tautua lautele.” O se toe upu lea a le fofoga o le aso.

 

O le fa’alauiloaga o le sui ua avea le vasega pe ua togisilia i le vasega fa’aiuaso na fa’alauiloa ai le tamaitai o Cinaroselyn Taufaoa-Suafo’a ma lona togi i ana mataupu sa tau’avea ua ausia e ia e 3.958GPA. O le sui ua tulaga lua na mauaina lea e Ioramo Ve’e ma lona togi e 3.916GPA.

Ina ua mae’a lea tolaulauga a le tamaitai pule a’oga i le Manu’a High  Fa’ato’ese Tauanuu, ona alo faiva lea o le vasega faaiuaso e usuina le latou pese matagofie tele. O se pese o le latou fa’afetai, o le latou fa’atoesega i faia’oga ma le pulega a le Manu’a High i ni o latou lape sa faia a’o a’oa’oina i latou . O se pese fa’agauloto ma maligi ai fo’i loimata o le to’atele sa molimauina le fa’au’uga e aofia ai le mamalu o e na fa’atasi atu mai le matagaluega o a’oga, le pulega o le Malo fa’apea ma le mamalu lautele o matua ma aiga, o pelega ua fa’au’uina nei.

Na toe fa’aiuina le aso fa’amoemoeina o le fanau i le tatalo na toe siitia e le susuga Rev. Elder Iosefa Autele ma fa’aiuina ai le aso mo le 10 Segaula fa’au’uina.