Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

SIKILASIPI A LE MALO MO FANAU A’OGA MAUALULUGA FA’AU’U: 2021

 

I le vaitau o fa’au’uga sa tolaulauina mulimuli ai lava le vasega o fanau a’oga maualuluga ua mae’a atofaina i ai avanoa fa’asikolasipi a le malo e fa’aauau ai latou a’oa’oga i fafo po’o le tatou Kolisi Tuufa’atasi foi iinei.

 

O fa’ailoga fo’i nei sa fa’ato’a fa’alauiloa lava i taimi o fa’au’uga ta’itasi, i latou ua agava’a ai mai a’oga ta’itasi sa talosaga mai nisi o fanau a’oga i nei avanoa matagofie, e fesoasoani tele i le totogia o latou a’oa’oga.

 

O le aoga mulimuli lava na faataunuu le latou fa’au’uga o Kanana Fou lea ua ofoina mo le fanau sa talosaga mo nei avanoa, e toatolu i latou na maua nei avanoa: Sinisa Faamusami; Alofamoni Tuailemafua ma Ayjah Leo

 

Mai Fa’asao Marist High School: Avril Regis, Maria Lobetos, Fa’afetai Vimoto ma Ianeta Hollister. Mai le aoga South Pacific Academy:  Zoey Mavaega, Heranihilani Togia’i, Jenny Liang ma Anna Deng.

 

O le fanau lea ua mae’a fa’ailoa atu i luga o le a e tatau ona oo atu i le Ofisa autu o le Ofisa o A’oga i le aso Lua, mo le fonotaga taua lava ma sui o le Komiti Fa’afoe o Sikolasipi e aofia ai ma le pulega a le Ofisa o Aoga.

 

Mai le Nuuuli Technical High NVTHS, e to’atasi: DeAngelo Mauga. Leone High School, e toatolu: Apollonia Sevaaetasi, Helen Schroeder ma Themis Palemene. 

 

Mai Tafuna High Tafuna High School: Milo Vaelua, Mareko Tuimavave, Jewel Kruse, Jade Kruse, Savaliolefilemu Collins, Runi Tuimaseve, Caroline Tavita, Fiaigoa Taai, Sinive Aupaau, Meghan Paletaoga ma Donnie Omani.

 

O fanau uma nei o le a ua maea lisi atu mai le tolu a’oga ua mae’a tolaulauina, o le a faia le fonotaga a i latou fa’atasi ma sui mamalu o le taupulega a le Komiti Fa’afoe o Sikolasipi a le malo ma sui fo’I o le matagaluega o a’oga Aso Lulu itula e 9:00 i le taeao.

 

Mai le Aoga maualuga a Faga’itua: Fa’aeseinaletotolua Webster, Toalei Toelupe, Olyann Ta’ase ma Sharon Lavea.

 

Mai le A’oga Maualuga a Samoana: Nathalia Trinidad, Lana Lei Fiaui, Luciano Fuataga, Jennifer Liang, Tasi Pereira, Telesia Atafua, Donna Talaeai, Iris Penitusi, Siona Tusiofo ma June Peau.

 

O i latou uma nei ua lisia i luga mai Fagaitua ma Samoana e ao ina faatasi mai i le fonotaga ma sui o le Komiti fa’afoe o Sikolasipi a le Malo ma nisi o sui iloga o le matagaluega o A’oga mo se footaga taua lava ma outou i le aso Tofi, 9:00 i le taeao.

 

“TAUSIA SE A’OGA”- TAUTUA A MATAGALUEGA ESEESE O LE MALO:

 

Ua fa’ailoa e Kovana Lemanu Peleti Mauga e fa’aauau mai le polokalama sa fa’atula’ia e Kovana Lolo Moliga, e fa’atulaga ai matagaluega o le malo ma ona Ofisa eseese ina ia latou fesoasoani e tausia fa’apitoa a’oga eseese i le teritori “Adopt-A-School”.

 

O a latou galuega e fa’atino o le taumafaiga lea ia fa’atumauina le lelei o potu a’oga ma falea’oga, ia matauina mea e ao ina fa’afou ma fa’aleleia, ma toe vali lelei falea’oga ma potu a’oga o le fanau, a’o le’i to ae mai le fanau ua saunia fo’i potu a’oga mo le tausaga fou o aoaoga.

 

Saunoa le kovana i lenei fa’ailoga i sui o le kapineta “O le lumana’i o Amerika Samoa e fa’amoemoe lea i le lelei ona a’oa’oina o le fanau lalovaoa o le atunuu i le taimi nei. O tulaga o falea’oga o i ai nei, ua tele ina tuai ma ua pala mai nisi o totoga, e ao ia i tatou uma ona galulue malosi ma le punoa’i ina ia fa’aleleia faleaoga ma potu a’oga o le fanau, ia aoga mo le fa’amoemoe e aoaoina lelei ai i latou i totonu.”

 

“E ao ona tatou feso’ota’i lelei ma galulue fa’atasi uma. O le tatou galuega fai ma le taimi e faatino ai mea lelei uma mo le fanau, o le taimi lava lenei. Ua mana’omia e i latou lo tatou sao i le taumafaiga e sailia le atamai lautele.”

 

Na faatonuina e Kovana le vasega o Fa’atonu ina ia latou fa’avasegaina lelei a latou tupe faasoa a latou matagaluega, ina ia mafai ona fa’atupeina ai suiga o mea e toe fa’aleleia ai falea’oga ma potu a’oga o le fanau e pei ona fa’atulaga mo a latou a’oga ua tausia fa’apitoa.

 

I le taimi nei ua fa’atulaga le fa’amamaina o lotoa a aoga ta’itasi e fa’atasi i le tolu masina ona faia e matagaluega ua tausia a’oga ta’itasi. Ua faatulaga nei le ulua’i fa’amama mo a’oga uma e faia i le vaiaso o Iulai 19 -23, 2021.

 

IUNI 14, 1775 – ASO FANAU O LE US ARMY & AGIGIA IUNAITE SETETE:

 

Ua auina mai fo’i se fe’au fa’amalo ma le fa’afetai a le Kovana Sili o Amerika Samoa i le fa’amanatuina o le US Army ma le Fu’a fo’i a le Iunaite Setete o Amerika. Ua fa’aalia fo’i lona agaga fa’afetai, “O Iuni 14, 1775, o le aso atofaina na fa’avae ai le Vaega Au o le Ami (Continental Army) e le vaega o lona lua o le Konekeresi (Second Continental Congress) e tali atu i fetauaiga mo le saolotoga o Amerika mai i Pulega a Peretania. E le gata i lea, i le lua tausaga mulimuli ai i le masina o Iuni 1977 na tonu ai i le konekeresi ina ia aloaia le fa’avaeina ma le tu’ufaatasia  o le tagavai o Amerika e aofia uma ai atunuu  e sefulu tolu sa i lalo o le va’aiga a Amerika.”

 

“O le aso, ua atoa iai le 246 tausaga o le tautua matavela ma le le fa’atuaoia a Vaega Au o le Ami a Amerika. O se tautua na amata i se vaega to’aititi na saili mai i tagata sa ofoina fua le latou tautua e aunoa ma se totogi seia oo ai lava ina avea se vaega tele o le Malo lea ua silia ma le miliona ona fitafita o loo tautua ai e le gata i totonu o Amerika ae faapea le lalolagi atoa.  O le mea lea, e tatau ai lava ona tatou manatua le sao o Vaega Au o le Ami I le puipuiga ma le saolotoga ua tatou maua ona o le latou taulaga sa osi mo oe ma au.”

 

“Ia tatou manatua foi le taua o le avea aloaia o fetu ma lanu e tolu (mumu, pa’epa’e, lanumoana) ma lanu o le tagavai o Amerika. O nei lanu e tulaga ese ai le tagavai o Amerika i le lalolagi ae o se faailoga o le saolotoga ma aia tutusa o tagatanu’u uma na nanau iai tuaa ua fai i lagi soifua ina ia tatou maua se olaga saoloto.

 

Ao tatou iai la i le faamanatuina o lenei vaega taualoa o le tala faasolopito o le Atunuu, ia tatou manatua o le tagavai, o le faailoga lea o le toto na masa’a o latou na tau mo le saolotoga lenei ua tatou aeae ai. E avea ai a’u e fai ma sui o le Lutena Kovana ia Talauega ma o ma aiga, e faafetai ai  tatou Alii ma Tamaitai faapea latou sa tautua i vaega eseese o le Vaega Au ona o galuega i le ao ma le po ina ia malu puipuia tagatanuu uma o Amerika mo nei ma a taeao.”

 

“Ia manuia le 246 Tausaga o Vaega Au eseese o le Ami a Amerika faapea ma le Aso Faamanatu o le Fu’a!”

 

Ua faaalia mai fo’i le agaga fa’aetai ma le me’eme’e o le afioga le Faipule i le Konekeresi o le tatou Malo Uifa’atali Aumua Amata Radewagen ona o lea aso iloga o le US Army ma ua faamanatu ai fo’i ma tausaga 246 o le Agiagia a le Iunaite Setete o Amerika. “O le fa’afetai ona o le sao o Fitfita Samoa o le Vaega Au i le puipuiga o le saogalemu o le Malo tele fa’apea ma ona teritori. O le latou tautua ua vea lea ma pine fa’amau sili ona tauleleia, aua o le to’atele na tu’ua ai o latou ola i lea auaunaga taua.”

 

“Ua atoa lelei le 246 tausaga o tautua a le USArmy i le saogalemu o le Iunaite Setete, ma e talu lava ona fa’atula’ia le vaega au, e le fo’i lava i le fa’atinoga o le latou auaunaga taua.”

 

“Peita’i, i atoa o le 246 tausaga talu ona fa’atula’ia le USArmy e tatau ai ona tatou va’ava’ai toto’a ia i latou o fitafita na o atu e fa’atino lenei tautua i tafa o taua ma nofoaga o vevesi, ma ua le toe taliu mai, ua altou tu’ua o latou ola ina ia vea ma se taui o le tatou sa’olotoga. Fa’afetai mo outou uma, fa’afetai i o outou aiga ma pelega.”