Ads by Google Ads by Google

TALA I VAIFANUA


Manua [ata: NPAS]

Pago Pago - AMERIKA SAMOA

 

MOOMIA FOMA’I GALUE I LE FALEMA’I I OFU & TA’U I LE TAIMI NEI

 

O le tama’ita’i tausima’i o Palefuiono Sai Ilaoa, lea o lo’o tiute ma fa’ataunuu talavai ma o lo’o fa’amoemoe fo’i i ai le fa’asologa o tuiga ma suega o le Covid-19 i Ofu ma Olosega, ua ia fa’ailoa mai, “O se mea e sili ona mo’omia i le taimi nei i le latou falema’i i Ofu ma Olosega, o le i ai lea o se foma’i e tiute ai i le taimi nei.”

 

I le taimi nei, e toe pau lea o le vaega o Amerika Samoa o lo’o mama mai le fa’ama’i o le Covid-19, o Ofu ma Olosega o le Manu’atele.

 

Talu mai le aso Gafua na te’a nei, ua fa’amauina mai pea le tumau o le aofai o gasegae Covid-19 i le Manu’atele i le na’o le 35 o i latou.

 

Na i ai se malaga fa’apitoa sa oo atu ai le susuga le Fa’atonu o le Matagaluega o le Soifua Maloloina Motusa Tuileama Nua ma le tamaitai Fa’atonu o le FEMA  Allison Pfaendler i Manu’a. 

 

Na mua’i malaga sa’o le va’alele i Fitiuta ma tuu ai iina le aumalaga lea, ona fa’ato’a malaga ai lea o i latou mai Ta’u i le Faleluasaga, Ofu ma Olosega.

 

O iina la lea o lo’o ua mafai ai ona fa’aofi mai le talosaga a le tamaita’i tausima’i Ilaoa i le ta’ita’i o le Matagaluega o le Soifua Maloloina ma le tamaitai Foma’i e fa’apitoaugafa i togafitiga o gasegase pipisi, Dr Elizabeth Lauvao.

 

I le taimi nei o lo’o ua i ai le foma’i o lo’o ua tiute nei i Ta’u ma Faleasao, lea ua i ai le fa’amai Covid-19. O le susuga lea ia Dr Benny Mukadoh, ma ua talanoa mai le susuga le foma’i i le ‘au malaga lea a le fa’atonu o le Soifua Maloloina ma le fa’atonu o le FEMA i e uma na o mai e galulue fesoasoani i le fa’aititia o le sofa’i mai a le Covid-19 i le tatou atunuu.

 

“O le fa’amoemoe maualuga lava, ia le maumau le soifua o e o le a maua ma togafitia i le Covid-19.” O se tala lea a le ali’i foma’i Dr. Mukadoh tusa o le taumafaiga fo’i e fa’aititia lava le aotelega o le Manu’atele e maua i le Covid-19.

 

FUAFUA LE TOE AMATALIA GALUEGA AUFAIGALUEGA A LE MALO

 

Ua toetoe lava mae’a le tolu masina talu ona taofia galuega masani a le aufaigaluega a le Malo, ona o le lutia ai o le atunuu i le Covid-19, peita’i ua fa’ailoa mai nei e le ta’ita’ifono o le Komiti Fa’afoe o le Covid-19 i le atunuu, o le sui kovana fo’i lea o le Malo, lea ua ia fa’ailoa mai, “E moomia lava ona mautu muamua tui puipuia o le Covid-19, o le aufaigaluega a le Malo  ona mautu lea o latou avanoa faigaluega. O nisi o lo ua le usita’ia lea tulafono, o le a le toe i ai se avanoa e faigaluega ai.”

 

“Ua i ai le vasega o le aufaigaluega a le Malo ua le toe i ai ni avanoa faigaluega i le Malo, aua ua mae’a su’eina lava i latou uma ma fa’amalosia loa le tulafono e ave’esea o latou avanoa e faigaluega ai mo le Malo. O se mea fo’i e fia fa’ailoa atu, e i ai nisi o le Matagaluega o le Soifua Maloloina o lo ua motusia ai fo’i ma le latou avanoa e faigaluega ai i lea matagaluega o le Malo o Amerika Samoa.”

 

Ua fa’ailoa manino mai fo’i e le Sui Kovana Talauega Eleasalo Ale, “Ua fa’amalosia ma avea nei le faia o tui puipuia o le Covid-19 ma se isi aiaiga o le mafai ai ona e faigaluega i so’o se galuega i matagaluega ma ofisa uma o le Malo o Amerika Samoa.”

 

Mai nei taimi uma sa motusia ai aluga masani o galuega a le aufaigaluega uma a le Malo, ua faailoa mai sa maua uma lava siaki totogi a le aufaigaluega mo le 80 itula e masani ona faigaluega ai i latou uma. Peita’i na fa’asolo mai le taimi o le fa’asa ua fa’amatu’u nisi o aiaiga tamau ma ua mafai ai ona fa’asolo feauaua’i le aufaigaluega e faigaluega ma fa’ato’agaogao ofisa i le taimi e tasi. O lena fuafuaga e fa’atautaia patino lea e le Fa’atonu ma le pulega, ina ia mafai ona fa’atumau le mama o le aufaigaluega mai le tulaga pesia i le Covid-19.

 

Ua ia fa’ailoa mai nei, e le o toe mamao ae toe fa’agasolo galuega a le Malo e pei ona sa masani ai. Ua tu’ua fo’i e le Lutena Kovana o le Malo le atunuu i se malaga i fafo, peita’i ua mae’a fa’atulaga e le o toe mamao lava ae toe amatalia galuega, ma o le a fa’amalosia a’ia’i le aiaiga e tatau ona fai tui puipuia o tagata uma o le aufaigaluega a le Malo, ona mautinoa lea ona mautu lea o lona avanoa faigaluega.

 

MANUMALO TAFUNA HIGH I LE TAUVAGA - 2022-2023 HOSA

 

E fitu a’oga maualuluga ma le aotelega e 63 tamaiti a’oga na fa’atauva i a latou tapenaga fa’atino mo latou tiute fa’atino i le lumana’i, pe afai o le a manuia a latou a’oga ma maua o latou avanoa e faigaluega ai i so’o se Matagaluega o le Soifua Maloloina i inei ma fafo fo’i.

 

O le tauvaga lenei a A’oga Maualuluga uma i le teritori e fa’atautaia fa’aletausaga a’oga ta’itasi ma sa fa’atautaia le tauvaga o lenei tausaga i ala tau fesootaiga tau tafa’ilagi ona o a’afiaga fo’i o le Covid-19 i lenei vaitau.

 

Na fa’atautaia mai lenei tauvaga i le amataga o le masina o Me 2022 ma ua latou fa’atauva i a latou galuega e ala i aoaoga tau fa’afoma’i, ia matauina le galulue fa’atasi ma ua latou fiafia fo’i e maua ai o latou tomai eseese i lea fa’atinoga.

 

O le auau fo’i lea ua mafua ai ona fa’atautaia lea polokalama ina ia tima’ia le fanau i le tele o ituaiga o galuega e mafai ona agava’a ai i latou i totonu o matagaluega o le Soifua Maloloina i soo se atunuu o le Lalolagi.

 

O le a fa’amasani ai fo’i le fanau a’oga i ituaiga o tiute fa’atino ma tomai e mo’omia mo le fa’atinoga o latou tiute i so’o se vaega o Matagaluega o le Soifua Maloloina.

 

O le Aoga nei ua manumalo i vaega eseeese o le Tauvaga a le HOSA 2022:

 

TAUTALAGA FA’APITOA: 1st: Dorrin Tuisamatatele-Fagaitua High School; 2nd: Josephine Pereira-Faasao Marist High School; 3rd: Charles Tauiliili-Tafuna High School

 

PU’EA ATA TAU AOAOGA SOIFUA MALOLOINA: 1st: Marianive Tauave-Tafuna high school; 2nd: Danielle West-Samoana High School; 3rd: Faapio Veavea-Faasao Marist High School

 

FAASALALAUGA FA’ALAUAITELE SOIFUA MALOLOINA: 1st: Francis Vaofanua, Anthony Joey Leo, Savannah Savali-Tafuna High School; 2nd: Motusimalo McFall, Athena Polu, Etuale Sefika-Nuuuli Vo-Tech High School; 3rd: Christalin Ilimaleota, Hermione Simanu, Luana Leiato-Samoana High School

 

FA’ASALALAUGA MO LE SILAFIA A LE MAMALU LAUTELE SOIFUA MALOLOINA: 1st: Princess Viesca, Talalelei Roberts-Faasao Marist High School; 2nd: Faletoa Tusi, Mariyah Ioane-Nuuuli Vo-Tech High School; 3rd: Letoe’e-Lillyann Launiu, Tauva Launiu-Tafuna High School

 

FA’ALAUILOAGA O MEA TAU LE SOIFUA MALOLOINA: 1st: Leilani Togi, Marrisah Ioane-Nu’uuli Vo-Tech High School; 2nd: David Apineru, Marion Afioa’e-Tafuna High School; 3rd: Maryann Tanuvasa, Robert Henry Koon Wai You-Leone High School

 

A’OGA MANUMALO AOTELEGA TAUMAFAIGA A LE FANAUNA TAUVA:1st: Tafuna High School; 2nd: Faasao Marist High School; 3rd: Nuuuli Vo-Tech High School; 4th: Samoana High School; 5th: Leone High School

 

O sui tauva uma mai a’oga eseese ua fa’amauina e manumalo pe tulaga muamua i vaega eseese o lenei tauvaga o le a mafai ona maalaga atu e fa’atauva i le HOSA International Leadership Competition 2022 i Nashville Tennessee.