Ads by Google Ads by Google

Taofi e Leoleo le ta’avale i le solitulafono i le alatele ae maua ai fualaau faasaina


[ata: foa'i]
ausage@samoanews.com

Pago Pago, AMERIKA SAMOA

 

Ua taofia nei e Leoleo i le Toese i Tafuna se ali’i ma se tama’ita’i, ma ua mae’a fo’i ona molia i solitulafono mamafa, e mafua mai i se faalavelave na tula’i mai i le itu i sisifo o le atunu’u i le masina na te’a nei, ina ua taofi e Leoleo le ta’avale na malaga ai i laua i le usitaia o tulafono i luga o le alatele ae maua ai ma fualaau faasaina i totonu o le ta’avale. 

 

E le gata i lea, ae o le ta’avale lava fo’i lea e tasi faapea ai ma le ave ta’avale lava fo’i lea e tasi na fai a latou tuliga ma Leoleo i po e 2 ua tuana’i atu, peita’i na fiu Leoleo e tau saili le itu na nimo i ai le ta’avale a lenei ali’i, ma i’u ina taofia ai loa ma le tuliga sa faia.

 

E to’afa Leoleo na tiute i luga o le alatele i se vaega o le alatele i Leone i le masina na te’a nei sa latou maitauina se taavale pikiapu lanu efuefu o aga’i lemu mai i luga o le alatele ma afe loa i luma o se faleoloa. Na faigofie ona iloa e Leoleo le ave ta’avale, e le o faia lona fusipa’u. 

 

E le i leva ona toe aga’i ese atu le ta’avale mai luma o le faleoloa ae taofi loa e Leoleo ma faatonu le ave ta’avale e afe le ta’avale i tua ma le alatele. Na ona tu lava o le ta’avale, tatala loa e le ave ta’avale ma le faitotoa ae savali i fafo ma uu se tama’i ato lanu uliuli ma foliga mai o le a tamo’e. 

 

Na faatonu e Leoleo le ave ta’avale e toe fo’i i totonu o le ta’avale peita’i sa fa’aauau pea le taumafai o le ave ta’avale e savali ese. Na umi se taimi o fai finauga i le va o Leoleo ma le ave ta’avale, se’ia oo loa ina malie le ave ta’avale ma toe fo’i mai ai loa i totonu o le ta’avale. 

 

Ina ua toe saofa’i le ave ta’avale i lona nofoa i totonu o le ta’avale, o le taimi lea na aga’i atu ai loa Leoleo ma faatalanoa o ia e tusa ai o le mafua’aga ua taofia ai lana ta’avale, ona e le i faia sona fusipa’u. E to’alua ni tagata e aofia ai ma le ave ta’avale sa i totonu o le ta’avale. O le susuga a Kilave Manuele, o ia lea o le ave ta’avale, ma le tamaitai ia Lupesina Alo, lea sa nofo i le nofoa pito i tua, i tua tonu ane lava o le ave ta’avale.

 

Talu ai e lei i ai se laisene ave ta’avale a Manuele, atoa ai ma le sese o le laisene na faapipi’i i le pito i tua o le ta’avale, o le mafua’aga lea na manatu ai loa Leoleo e taofia le ta’avale ma auina atu i le Ofisa o Leoleo i Tafuna mo suesuega. Sa taofia atu ai fo’i ma i laua e to’alua sa i totonu o le ta’avale, le susuga a Manuele ma le tamaitai o Alo.

 

TAGI A LE MALO

 

E pei ona taua e le malo i le latou tagi e faapea, o le aoauli o le aso 6 o Iuni 2021 na taofi ai e Leoleo se ta’avale pikiapu i luga o le alatele i Leone ina ua vaaia e le o faia se fusipa’u o le ave ta’avale. 

 

Ina ua taofi e Leoleo le ta’avale, na faafuase’i ona vaaia le ave ta’avale ua oso i fafo mai le ta’avale ma taumafai e tamo’e i le isi itu ao uu se tamai ato i lona lima. Na faatonu e Leoleo le ave ta’avale e toe fo’i i totonu o le ta’avale peita’i na faaauau pea le taumafai o le ave ta’avale e savali ese mai i Leoleo ma ona foliga popole. 

 

O le mae’a ai o se taimi umi na faia ai finauga i le va o Leoleo ma le ali’i ave ta’avale, na malie ai loa le ave ta’avale e toe fo’i i totonu o le ta’avale. O le alii ave ta’avale, o le susuga lea ia Kilave Manuele. Sa la toalua i totonu o le ta’avale ma le tamaitai o Lupesina Alo, lea sa nofo i le nofoa pito i tua o le ta’avale.

 

Na fesili Leoleo ia Manuele i le mafua’aga ua le faafouina ai lona laisene ave ta’avale ae na tali le ua molia, na musu e toe faafou lona laisene ave ta’avale, ona o lona popole ne’i maua atu ai o ia i le fa’alavelave tau talepe fale mal e gaoi lea na aafia ai lona igoa i le 2 tausaga talu ai i Leone. Na saili e Leoleo a latou faamaumauga ma iloa ai, e le o i ai se mataupu faapea o aafia ai Manuele.

 

E le gata e leai se laisene ave ta’avale a Manuele, ae sese fo’i le laisene o loo faapipi’i i le pito i tua o le ta’avale, o le mafuaaga lea o le faaiuga a Leoleo, e taofia le ta’avale ma auina atu i le Ofisa i Tafuna ma isi suesuega. Na faatonu e Leoleo ia Manuele ma Alo e o i fafo ma le ta’avale ona o lea laa taofia le ta’avale i lalo o le vaaiga a Leoleo.

 

Ao lei quina atu Manuele ma Alo i le Ofisa o Leoleo i Tafuna mo isi suesuega, na muamua saili o la tino mo ni aupega ina ia mautinoa le tulaga saogalemu o susuga i Leoleo sa tiute i lea aso. A o faia talanoaga a Leoleo ma Manuele, sa maitauina e le isi Leoleo le tamaitai o Alo o loo taumafai pea e aapa i le taga pito i tua o lona ofuvae uumi o loo fai, ma ona foliga le mautonu .

 

Na saili e Leoleo le tino o Manuele ma maua ai i totonu o le taga o lona ofuvae sa faia paipa tioata e 2 o loo i ai vaega papa’e o le pauta faasaina o le aisa. Na faaauau le sailiga i le isi taga o le ofu o Manuele ma maua ai e Leoleo tamai pepa iila e 2 o loo i ai lau mamago o le laau faasaina o le mariuana.

 

Na saili e Leoleo le ato na uu e Manuele na maua ai i totonu fualaau faasaina o le aisa ma le mariuana, atoa ai ma mea e fa’aaoga e i latou e umia fualaau faasaina ma le faamoemoe e tulei ma faatau atu i isi tagata.

 

Na saili e Leoleo totonu o le ta’avale na maua ai se paipa tioata o loo i ai vaega o le pauta faasaina o le aisa i lalo o le nofoa o le ave ta’avale. 

 

Na saili fo’i e Leoleo le tino o Alo mo ni aupega poo ni fualaau faasaina, ma maua ai se paipa tioata o loo i ai vaega o le pauta faasaina o le aisa, o sikaleti mariuana e 2 ua mae’a ona taai ma le tinoitupe e $110.

 

Na logo vave e Leoleo ia sui o le Vaega e Suesueina Fualaau Faasaina a le Matagaleuga o Leoleo latou te tauave ma suesue le mataupu a Manuele ma Alo, ina ua maua i ai fualaau faasaina ia te i laua.

 

O le mae’a ai ona faailoa o aia tatau o Manuele ma Alo e Leoleo Suesue, na malilie ai loa i laua e talanoa i Leoleo e tusa ai o lenei mataupu. Na muamua fesiligia e Leoleo ia Manuele faatoa fesiligia ai Alo.

 

Ina ua fesiligia Manuele e uiga i fualaau faasaina na maua ia te ia faapea ai totonu o le ta’avale, na ia ta’utino ai i Leoleo, o ia e ana fualaau faasaina ia, o mea na aumai i se tasi o ana uo ma le faamoemoe e momoli i se isi ali’i e nofo i Vaitogi. Sa ia faailoa i Leoleo e faapea, talu ai e le o lelei lana ta’avale, o le mafua’aga lea na ia tago ai ua vili lana uo o Alo e sau i lana ta’avale e piki o ia ma la tietie i Vaitogi i lana feau.

 

Na faailoa atu a Alo ia te ia i luga o le telefoni, o ia lea faatoa manava ma o loo lagona le vaivai ma le fia moe, ae afai la te o, ona ave lea e ia (Manuele) le ta’avale ae se’i fai sana moe i le nofoa pito i tua o le ta’avale. O le tulaga lena sa i ai le plan, na faafoe e Manuele le ta’avale ae taoto Alo i le nofoa pito i tua mo sina malologa puupuu ona o lea faatoa manava mai i lana galuega.

 

Ina ua uma ona fai le la faatau i le Faleoloa i Leone, na tago ai loa Manuele ma tu’u le paipa tioata o loo i ai vaega o le pauta o le aisa faapea ai ma sikaleti mariuana e 2 ia Alo, o le totogi lea o le ta’avale. 

 

Na faamaonia e Alo i Leoleo le faamatalaga a Manuele e tusa ai o le mea sa tupu. O fualaau faasaina fo’i na maua ia te ia, o mea na avatu e Manuele e totogi ai lona taimi ma le fa’aaogaina o lana ta’avale. Na fesili Leoleo Suesue ia Alo poo fea laa ave ai fualaau faasaina na avatu e Manuele ia te ia, na tali le ua molia, e ave ma lona to’alua, o le uo mamae fo’i lea a Manuele.

 

O le masina na te’a nei na tutula’i uma ai Manuele ma Alo i luma o le Fa’amasinoga.

 

Ua molia e le malo ia Manuele i moliaga o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o le pauta faasaina o le aisa ma le faamoemoe e tulei ma faatau atu i isi tagata, ma le moliaga e tasi o le umia faasolitulafono o vaega o le laau faasaina o le mariuana, o ni solitulafono mamafa uma ia e mafai ona faasala ai se tasi i le Toese mo le umi e oo atu i le 20 tausaga, poo le faasala i le salatupe e oo atu i le $20,000.

 

Ua molia e le malo ia Alo i le moliaga o le umia faasolitulafono o vaega o le pauta faasaina o le aisa, faapea ai ma le moliaga o le umia faasolitulafono o vaega o le laau faasaina o le mariuana.

 

E $20,000 lea ua faatulaga e tatala ai Manuele, ae $5,000.

 

O le vaiaso fou lea ua faatulaga e faia ai ulua’i iloiloga o nei mataupu.