Pago Pago - AMERIKA SAMOA

O le aso Lua na se’i mavae atu nei na toe pasia ai e le Maota o le Senate, ia le fa’aauau pea ona avea o le susuga ia Tuasivi John Marsh ma Komesina o le OFI (Office of Financial Institutions), i se palota e 16-1. 

O le masina o Mati, na faataunu’uina ai le iloiloga o Tuasivi i luma o le Senate ma sa iai se fete’ena’iga i manatu, i le va o Tuasivi ma le afioga i le Senatoa ia Togiola T.A. Tulafono, e tusa ai ma se fa’amaumauga sa aofia i le ‘resume’ a Tuasivi, lea na fa’ao’oina atu i le Senate.  Ma sa avea lea tulaga ma mafua’aga na taofia ai le fa’aauauina o le iloiloga ia Mati.

O lea faamaumauga, na aofia ai se ripoti o se mataupu ua silia ma le tausaga talu ona tupu, ae na tula’i mai ai se felafolafoaiga i le va o Tuasivi ma Togiola, pe alagatatau ona tatalaina mai lea ripoti e tagataga’i ai sui o le fono faitulafono.

Sa fa’aalia a le le fiafia o le afioga i le Senatoa ona o se maliliega sa le tatau ona taga’i iai nisi i fafo atu, i le va o le faletupe ma le ofisa a Tuasivi, ae o lea ua fa’alauiloa mai e Tuasivi, o se tulaga sa fia malamalama ai le afioga i le Senatoa.

Ae peitai, sa ta’ua e Tuasivi, e moni o lea ripoti sa le tatau ona fa’ailoa i seisi, ae na mafua ona ia filifilia le tu’uina o lea ripoti i totonu o lona ‘resume’, ona o lea sa fa’ao’oina atu i le Ofisa o le Kovana.  Ma o lenei mataupu, ua silia ma le tausaga talu ona tula’i mai, ma na a’afia ai se tasi na toeititi tapunia ai le latou teugatupe i le Faletupe Feterale.

Sa fa’amanino mai e Tuasivi lona fa’aaogaina o lea ripoti, e fai ma fa’ataitaiga o taumafaiga a lo latou ofisa (OFI) e fofoina lea faafitauli.

Ae peitai, o se tulaga na atugalu ai tele le afioga i le Senatoa ia Togiola ma ia fa’aleoina le ono a’afia o le malo, i le tu’uina o lenei ripoti e tagataga’i iai tagata, tua mai o le ofisa a le OFI.  Ma ona o lea faaiuga sa faia e Tuasivi, ua ia masalomia ai le agava’a o Tuasivi, e fa’aauau ona avea ma Komesina a le OFI.

Ina ua mae’a ona fa’atula’i Tuasivi mai i le iloiloga ia  Mati, sa faapea ona tu’umuli uma i latou sa i totonu o le Ma maota, se’ia vagana ai le Komiti o Paketi ma Tupe Fa’asoasoa, e soalaupuleina lenei mataupu.  Ma sa maitauina, le le’i toe tu’uina o le iloiloga o Tuasivi i luga o le kalena.

I le iloiloga i le aso Lua, sa fa’aleoina ai e le afioga i le Senatoa ia Utu Sila Poasa, le taitaifono o le Komiti o Paketi ma Tupe Fa’asoasoa, ia la mae’a ona soalaupuleina ma fofoina ia popolega sa feagai ma le filifiliga o Tuasivi e fa’aauau ona avea ma Komesina o le OFI ma ia fautuaina ai le fa’ataunu’uina o le palota a le Maota o le Senate.

Na fa’aluaina e le afioga Togiola ia le manatu o le taitaifono ma sa ta’ua e le afioga i le Senatoa lona lagolagoina o le fa’aauauina o le avea o Tuasivi ma Komesina o le OFI.