VAEGA 18

E faatalofa atu i le mamalu o le tatou aufaitau nusipepa i lenei taeao fou.  Tatou te muamua ona sii le Viiga ma le Faasagi i le Silisili Ese i le lagi ona o Lana pule faasoifua, ua o tatou feiloai ai i lenei taeao fou manuia.  Ae se’e maia i ou se’etaga malu, aua le toe soso’oina o le tatou Fagogo i lenei taeao segisegi.

***********************

Ia o lea ua folasia lagona o le alii o Tavita, i sona talitonuga i le mafuaaga ua maliliu ai nai mafine o Rasela ma Tina.  Ua manatu Tavita, ai e aafia le toalua i ni tulaga tau tupe.  Ae o le Taitai Leoleo ua le mautonu lona manatu i le faamatalaga a Tavita, aua o lona igoa lea e i luga o uati ia na maua i luga o tino maliu o Rasela ma Tina.

Ua faapea atu le Taitai Leoleo ia Tavita, “Tu’u mai se’i o’u tau sailiili atu ia le tulaga lea, pe iai se sootaga tau tupe i le va o nei mafine ua maliliu.  Ae o mai ina o, ou te toe valaau atu pe a iai se mea e manaomia ai oulua.”

Ua tu’umuli atu Tavita ma Tepora i le fale o Tepora.  E taunu’u atu o lo’o faatali mai uso o le tina o Tepora.  Sa faanoi Tavita pe mafai ona ia fa’aaogaina le telefoni o le fale.  Sa ioe iai Tepora, ma agai i totonu o le potu malolo ae ua aga’i Tavita i totonu o leisi potu, e pei o se ofisa, e fa’aaoga le telefoni.

Ina ua uma le telefoni a Tavita, sa ia agai atu i totonu o le potu malolo i le mea o iai Tepora ma uso o le tina o Tepora, ma ia nofo ifo i luga o le nofoaga.

E faalogo atu Tavita, o la e faamatala e Tepora i uso o lona tina ia le mea ua tupu ia Tina.

Ua faapea mai le loomatua o Mele, se tasi o uso o le tina o Tepora, “O lea e ma te nofo popole lava ia te oe, Tepora.  O lea ua toalua fafine ua maliliu.  Ae o lea e te lua le iloa po o ai o iai le Diary a Rasela.”

Ua liliu atu Mele ma fesili ia Tavita, “O le a se mea matuia o lo o i totonu o lea Diary ua mafua ai lava ona e naunau e maua?”

Ua nofo sa’o i luga ia Tavita ma faapea atu, “O lo’u aiga, e iai so’u uso ma so’u tuafafine.  Ae paga lea, e le toto ma aano lo matou sootaga.  O matou na ola ifo i ni aiga matitiva ma sa o’o lava ina tiaia i matou I luga o le alatele ina ua le mafai e matou matua ona tausi i matou.  O si toeaina o Uilisone lea e matou te ta’ua o lo matou tama, sa ia lavea’iina I matou mai i luga o le auala tele.”

“E leai seisi e na te iloa lea tulaga, seia vagana ai matou ia ma outou lea ua ou faamatalaina atu iai.  O le mea e matou te popole tele ai, ona o lea ua tapena le faaipoipoga a si o’u tuafafine i se aiga mauoa.  Afai ae latou te nofo malamalama i le talaaga o le soifuaga o si o’u tuafafine, ou te popole, o le a le toe fia manao le aiga o lana uo, e la te faaipoipo,” o le fa’aauau lea o le faamatalaga a Tavita.

“O nei mea uma sa tusitusia e se fafine sa soifua mai i vaitaimi o matou ola ifo i luga o le auala tele.  O lea fafine, sa fai ma matou faatina ae e le’i laveaiina i matou e Uilisone.  O le Diary lea e su’e, o le tusi lea sa faamaumauina ai e lea fafine ia o matou talaaga.  O le mea lea o lo’o o’u tau saili ai lenei Diary, ina ia aua ne’i iloa e seisi talaaga o matou olaga mativa.”

E FAIA PEA.