Pago Pago - AMERIKA SAMOA

Ua molia nei se alii e 22 tausaga le matua, i moliaga e fa (4), o le Fa’ao’olima i lona tulaga e tolu – o se vaega ‘C o solitulafono mama, lea e mafai ai ona nofosala se tasi i le falepuipui mo le o’o atu i aso e sefululima (15), po o se sala tupe e i le va o le $150 ma le $300; po o faasalaga uma e lua, ina ua fa’afeso’ota’ia e se tamaitai ia le Ofisa a Leoleo i Tafuna, i le afiafi o le aso 19 o Aperila, 2024 ma lipotia ai lenei alii, i lona faia o ni uiga mataga i sona tuafafine laititi, e 11 tausaga, i lo latou aiga i Nu’uuli.

(Ua le lomia e le Samoa News suafa o le ua molia faapea i latou o lo’o a’afia i lenei mataupu, aua le puipuiga o le teineititi 11 tausaga).

Ina ua taunu’u leoleo i le nofoaga na tupu ai le faalavelave, sa muamua ona o latou talanoa ma le tamaitai lea na valaau mai i le ofisa a leoleo, ma sa ia faasino foi i leoleo ia le fale e nofo ai le ua molia.  Sa lokaina mai e leoleo ia le ua molia, i le taimi tonu na taunu’u atu ai lona tina ma lona tuafafine (lea ua a’afia i lenei mataupu), i le fale mai i le faleoloa.

Sa talosagaina e leoleo ia le tina ina ia malaga atu ma lona alo i le ofisa a leoleo, ina mafai ona faia se faamatalaga a le ua a’afia.  Ma sa faapena ona fai.

Ina ua fa’atalanoaina e leoleo ia le teineititi 11 tausaga i luma o lona tina, sa ia faamatalaina e faapea, o le afiafi o le aso 10 o Aperila, a’o faitau sana tusi i totonu o le potu, sa a’apa atu ai lona tuagane (le ua molia) ma taumafai e sogi atu ia te ia, ae sa ia tago ma u’una’i ese le ua molia ma fai iai, e fefe.  I se taimi mulimuli ane, e pei ona faamatalaina e le teineititi 11 tausaga, sa fai atu lona tuagane ia te ia, o le a ia (le ua molia) fasia o ia (teineititi) pe afai e na te faamatalaina le mea na tupu, i seisi.

Sa faamatala foi e le teineititi 11 tausaga, o le po o le aso 12 o Aperila, sa toe tupu ai foi seisi faalavelave, ina ua mae’a mai ona ta’ele ma o lo’o tau saili ni ona lavalava, ae alu atu le ua molia, ma taumafai e se’i ese lona solo.  Sa ta’ua e lenei teineititi lona u’una’i malosi ese o lona tuagane ma ia vala’au mai i lona tina, ae tamo’e i fafo lona tuagane ma sola ese.  

Ae sa ta’ua e le teineititi, ae e le’i tamo’e ese le ua molia, sa ia (le ua molia) fai atu ia te ia (teineititi), a ia ta’uina i le la tina, o le a ia (le ua molia) fasia o ia (teineititi).

Sa faamaumauina e leoleo, le le’i ta’uina e le teineititi, o le mea na tupu, i lona tina, ona o lona fefe tele i lona tuagane.  Ma sa ta’ua foi e le teineititi, e le’i pa’i le tago a lona tuagane, i lona tino.

Ae o le po fo’i o le aso 19 o Aperila, sa toe tupu ai seisi faalavelave, lea na faamatala e le teineititi, o lona fefe tele e toe alu i le latou fale, sa ia faamatalaina ai loa i seisi ona tuagane, e 16 tausaga le matua, ia le tulaga sa taumafai e lona tuagane 22 tausaga, ia te ia.  Ma o le mea lea, na alu ai loa le alii 16 tausaga, ua su’e lona uso 22 tausaga, ma tula’i mai ai se misa i lo la va.  Ma i’u ai ina u’u mai e le alii 22 tausaga ia se naifi mai i le umukuka ma ‘e’e atu i le teineititi, pe aisea le mea e pepelo ai ma taumafai e fa’afefe le teineititi, e ala i le lia’iina o le naifi, aga’i i le teineititi.

Sa faamatala atili e le teineititi, na oso atu lona tuagane 16 tausaga ma tu’i le ua molia, ae lavea ai lona lima i le naifi na u’u e le ua molia.  Ma tamo’e ai loa le tuagane 16 tausaga i fafo ma le fale, ae mulimuli atu ai le teineititi, ina ua faatonu o ia e le ua molia, e alu i fafo ma le fale.

Sa ta’ua e le teineititi 11 tausaga, a’o nofonofo ma tagi i luma o le latou fale, sa alu atu se tasi o ona tausaga (alii) ma fesiligia o ia, po o le a le me aua tupu, ae tali mai iai le teineititi, ua tuli o ia mai i le fale, e lona tuagane 22 tausaga.

Na fesiligia foi e le tausoga ia le teineititi, pe moni faamatalaga, na taumafai le alii 22 tausaga e faia uiga mataga ia te ia, sa tali le teineititi, ioe.

Sa faapea foi ona alu atu lenei tausoga ma su’esu’e le ua molia i le mafuaaga na ia tuliesea ai lona tuafafine mai i le fale, ae fa’afiti le ua molia, e na te le’i faia se tulaga faapea.  Sa faapea foi ona fa’alala mai e le ua molia ia se laupapa i lona tuafafine ae oso atu lona tausoga ma se’i ese le laupapa ma togi i lalo o le molega I totonu o le fale.

Sa fai atu loa lona tausoga i le teineititi, e la te o ese mai i le fale.

Na logoina sui o le ofisa a le malo o lo’o gafa ma le puipuiga o fanau iti (CPS-Child Protective Services) e tusa ai ma lenei mataupu, ona o le teineititi 11 tausaga, ua a’afia ai.

Sa faatalanoaina foi e leoleo ia le mafine lea na ulua’i lipotia lenei mataupu i le Ofisa a Leoleo, ma sa ia faamatalaina e faapea, a’o iai o ia i totonu o le latou fale, sa ia lagonaina mai le talanoaga a ona tausoga e uiga i le faia e le tuagane o uiga mataga i lona tuafafine laititi.  Sa su’esu’eina foi e lenei mafine ia le teineititi 11 tausaga ma sa faapea foi ona faamatalaina e le teineititi ia le taumafai fa’alua o le ua molia, e faia ni uiga mataga ia te ia.  Ma o le mafua’aga lea na valaau ai loa le mafine lea i le Ofisa a Leoleo.

Ina ua faatalanoaina e leoleo ia le alii e 16 tausaga (tuagane a le teineititi), sa ia faamatalaina e leoleo e faapea, sa alu o ia i le faleoloa e fai sana faatauga, ae ina ua ia toe fo’i mai, sa ia maua mai lona tuafafine o lo’o tagi atu i luma o le latou fale.

Ma sa ia fesiligia lona tuafafine, po o le a le me aua tupu, ae musu lona tuafafine e ta’u atu.  Sa fa’ailoa atu loa e le alii 16 tausaga i lona tuafafine, le faamatalaina atu e ona tausoga o le mea na tupu ia te ia (teineititi) i le lua vaiaso talu ai.  Ma sa fai atu loa le alii 16 tausaga, i lona tuafafine, e la te o, e talanoa i le alii 22 tausaga.  Ae peitai, ina ua fai atu iai le alii 16 tausaga i lona uso matua (le ua molia) ae tago le alii matua i le u’u mai le naifi ma fa’alala i lo la tuafafine ma fesili iai pe aisea e pepelo ai ma taumafai e faafefe o ia (teinetiti).

Sa ta’ua e le alii 16 tausaga, lona tuiina o lona uso matua (le ua molia) ae lavea ai lona lima i le naifi sa u’uina e le ua molia, ma o lea na ia tamo’e ese ai mai i le fale.

O le vaveao o le aso 20 o Aperila, sa faatalanoaina ai e leoleo ia le tausoga (alii) a le teineititi ua a’afia ma sa ia faamatalaina e faapea, na alu atu sona uso laititi ma fai atu ia te ia, o la e tagi ia le teineititi 11 tausaga, i luma o le latou fale.  Ma ina ua sau ma talanoa i le teineititi, sa faamatalaina atu e le teineititi tulaga na faia e lona tuagane (le ua molia) ia te ia.  

Na fai atu loa le tausoga i le teineititi, e la te o i le fale e talanoa i le ua molia, ae peitai, sa te’ena e le ua molia lona tuliina o le teineititi i fafo ma le fale.  Sa faamatala e le tausoga (alii) ia u’u mai e le ua molia o se laupapa ma taumafai e togi ai le teineititi ae sa ia se’i eseina le laupapa ma velo le ua molia i lalo o se moega i totonu o le fale.  Sa toe o ese ia le tausoga ma le teineititi ma o mai loa, i le faamatala i le tuafafine a le tausoga (lea na valaau i leoleo) ia le mea sa tupu.

Ae peitai, o lo’o te’enaina e le ua molia tu’uaiga ua faia faasaga ia te ia, e ui ina sa ia faamaonia lona taumafai e togi lona tuafafine i se naifi ma le manu’a o lona uso i le naifi sa ia u’uina.  Ma sa ta’ua foi e le ua molia, na mafua ona ia taumafai e togi lona tuafafine i le laupapa, ona o le pepelo.