Ads by Google Ads by Google

Tu’uaia se ali’i i le faia o uiga mataga i se tamaitai e 16 tausaga le matua


[ata: foa'i]
ausage@samoanews.com

Pago Pago, AMERIKA SAMOA

 

E 42 tausaga o se ali’i na pu’e fa’apagota e Leoleo i le masina na te’a nei, ona o tu’uaiga i lona faia lea o uiga mataga i se tama’ita’i e 16 tausaga le matua mai le isi pitonu’u o le nu’u o loo nofo ai.

 

E pei ona taua e le malo i le latou tagi ua faauluina fa’asaga i le ali’i ua molia e fa’apea, i le po o le aso 12 o Aperila o le tausaga nei, na faafesoota’i ai e le grandmother o le tamaitai na aafia se fesoasoani a le Ofisa o Leoleo i Tafuna, mo se avanoa e suesue ai se mataupu ua tula’i mai i le lotoifale o le aiga, faasaga i uiga ma amioaga mataga na faia e Maalona i lona granddaughter e 16 tausaga le matua.

 

E to’afa Leoleo na aga’i atu e tali i le valaau, ma mafai ai ona latou fa’atalatalanoaina nisi o molimau sa i ai i le taimi o le fa’alavelave, e aofia ai ma le Tina matua na ia talosagaina se fesoasoani, ma amata loa ona faatalatalanoa le mataupu. Sa maua fo’i le avanoa e fesiligia ai e Leoleo le tama’ita’i na a’afia e tusa ai o le faalavelave sa tula’i mai.

 

A o faagasolo le faatalatalanoaina o molimau, na manino ai i Leoleo, o le tagata o loo faia faasaga i ai le mataupu, o Sio Maalona.

 

E tusa ai o fa’amatalaga na mafai ona tuuina atu i Leoleo, o le susuga a Maalona ma le aiga o le tama’ita’i ua a’afia, e nonofo lava i le pito nu’u e tasi o se vaega i Tafuna. O le tele lava o taimi e mafuta faatasi ai aiga nei e lua, ma ua pei ai lava aiga nei e lua o se aiga e tasi i le tele o taimi.

 

O se ulugali’i e nonofo i le fale o lo o i tua atu o le fale a Maalona sa laua faailoa i Leoleo i le po lea, e le o i ai  Maalona i lona fale, ae faatoa tula’i ese atu lava ina ua ia vaaia le aga’i atu o le ta’avale a Leoleo.

 

Na maua le avanoa e fesiligia ai e Leoleo le tama’ita’i na a’afia e tusa ai o lenei mataupu. Sa ia taua i Leoleo e fa’apea, i le afiafi o le aso e pei ona taua, na tuli ai o ia e le isi fafine o le latou tuaoi e alu i le fale o Maalona e piki mai pepa bingo la te fa’aaogaina i le Bingo i le aso Toona’i e sosoo ai.

 

Na alu le tama’ita’i na a’afia i le fale o le ali’i ua molia ma ia tu’itu’i le faitoto’a peita’i na tali mai le ua molia mai tua o lona fale, o loo faalogologo ai lana musika ma inu ana apa pia o le Busch ice.

 

Na faailoa e le tamaitai na aafia i le ali’i ua molia le mafua’aga na alu atu ai, ma faatonu ai loa e le ua molia le tamaitai na aafia e tago e tatala le faitoto’a pito i luma o le fale, ona savali sa’o loa lea i luga o lana laulau i totonu o le potu o loo taatia ai le ato lanu uliuli o loo i ai pepa bingo i totonu.

 

Na usita’i le tamaitai na aafia i le faatonuga a le ua molia ma alu ai loa i totonu o le fale. Na fiu le tamaitai na aafia e su’e i totonu o le potu ma luga o le laulau e le o i ai se ato lanu uliuli e pei ona taua e Maalona, o le mafua’aga lea na valaau ane ai le tamaitai na aafia ia Maalona e leai se ato lanu uliuli i totonu o le potu.

 

Na ulufale le ua molia i totonu o lona fale ma ia vaaia ai le tamaitai o loo fealua’i solo i totonu o lona potu e saili le ato lanu uliuli. O le taimi lea na ia savali atu ai loa ma tapuni le faitoto’a o lona potu ma fai atu i le tamaiti na aafia e tago e siaki lalo o le moega pe le o taatia ai le ato. 

 

Ao punou le tamaitai na aafia i lalo o le moega e tau saili le ato, na faafuasei ona ia lagona le tago atu o le ua molia ia te ia. Na ia lagona i le taimi lea, e ese le mea o loo mafaufau i ai Maalona, na te iloa lava i le auala lea ua pa’i atu ai i lona tino.

 

Na taua e le tama’ita’i na a’afia i Leoleo lona popole atoa ai ma le le mautonu o lona mafaufau i le taimi lea, ina ua ia faalogoina le ese o uiga ia ua faaali atu e Maalona ia te ia. Na tu i luga ma faliu o le a savali i fafo o le potu ae na tago atu le ua molia i lona fatafata faapea ai ma le isi ona lima i lona itutinosa. 

 

Na taua e le tama’ita’i na a’afia i Leoleo le faateia o ia ina ua tago atu lima o le ua molia i lona fatafatafa, ma faasolo ifo ai lava i ona ogavae. Sa ia tago ma una’i ese ona lima peita’i sa atili ai ona tago atu pea le ua molia ia te ia, seia oo lava i lona tagofia o ona itutinosa.

 

Na taumafai le tama’ita’i na a’afia e una’i ese lima o le ua molia peita’i sa una’i ese e  Maalona lima o le tama’ita’i ae faamalosi lona tago atu i lona fatafata ma lona itutinosa. 

 

Ao faia e le ua molia nei uiga, na taua e le tama’ita’i na a’afia i Leoleo lona faalogoina o le malosi o le manogi pia e sau mai le tino o Maalona. 

 

Na tula’i faamalosi le tama’ita’i na a’afia o le a alu i fafo peita’i na tula’i fo’i le ua molia ma savali i le faitoto’a ma pupuni le auala, ina ia le mafai ai ona alu i fafo le tama’ita’i na a’afia.

 

Mulimuli ane, sa mafai ai loa ona ulufafo le tama’ita’i na aafia mai le fale a le ua molia ma aga’i atu loa i le nofoaga o lo o i ai le fafine o le latou tuaoi na mana’o i pepa bingo, ma ia faamatala i ai le mafua’aga na ala ai ona tuai atu, ona o uiga mataga na faia e Maalona ia te ia, ma faailoa ai loa e le fafine lea i le grandmother a le tamaitai na aafia le faalavelave sa tula’i mai, ma logo ai loa le Ofisa o Leoleo mo se fesoasoani.

 

Ina ua fesiligia e Leoleo le alii ua molia e uiga i lennei mataupu, sa ia ioeina ai lona faatonu o le tamaitai na aafia e alu i totonu o lona fale e aumai le ato o loo i ai pepa bingo, peita’i sa ia teena lona faia o ni uiga mataga i le tamaitai na aafia. 

 

O le masina lava fo’i na te’a nei na tula’i ai le susuga a Sio Maalona i luma o le Fa’amasinoga  Fa’aitumalo ina ua mae’a ona faila e le malo le latou tagi faasaga ia te ia.

 

E 2 moliaga mamafa o le tagofia o itutinosa o se tama’ita’i i le tulaga muamua o lo o molia ai Solomona, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe faasala foi i le salatupe e le silia i le $5,000, pe fa’asala fo’i i fa’asalaga uma ia e lua; atoa ai ma le moliaga o le faia o gaioiga e ono lamatia ai le saogalemu o fanau laiti, o le vaega A lea o solitulafono mama, lea e mafai ona fa’asala ai se tasi i le toese mo le umi e le silia i le tasi le tausaga, poo le fa’asala fo’i i le salatupe e lesilia i le $1,000, pe faasala fo’i i fa’asalaga uma ia e lua.

 

E $15,000 le vaega tupe lea ua fa’atulaga e le Fa’amasinoga e totogi ona fa’atoa mafai lea ona tatala le ua molia i tua mai le Toese i Tafuna.

 

Afai ae mafai ona tatala o ia i tua, ua fautuaina o ia e le Fa’amasinoga e aua ne’i ona toe taumafai e faafesoota’i le tama’ita’i o loo aafia i lenei mataupu i soo se auala, e le mafai fo’i ona ia taumafai e faafesoota’i sa’o ni isi o lona aiga, ae ia avea o ia ma tagatanu’u lelei e tausisi o tulafono a le malo.

 

Talu ai le vava lalata o le fale e nofo ai le ua molia ma le fale o le aiga o le tama’ita’i o lo o a’afia, ua poloaina malosi ai e le Fa’amasinoga le susuga a Maalona ina ia saili se isi nofoaga e aumau ai mo le taimi nei a o fa’agasolo ai lana fa’amasinoga.

 

Na teena e le Fa’amasinoga le talosaga a le itu tete’e ina ia faaitiitia i le $5,000 le tupe e tatala ai i tua Solomona. 

 

Na taua e le itu tete’e e fa’apea, ua lava le $5,000 e tatala ai i tua Maalona, e faigaluega e tausi ai lona to’alua ma lanau, peita’i na faatuiese i ai le loia a le malo, ona o lona talitonuga, o le tupe lea ua mae’a ona fa’atulaga e le Fa’amasinoga e tatala ai Solomona i tua, ua lava ma talafeagai ma le mamafa o le solitulafono o lo o tu’uaia ai o ia.

 

O le vaiaso fou lea ua fa’atulaga e toe tula’i ai le ali’i ua molia i luma o le Fa’amasinoga mo le faataunuuina o lana ulua’i iloiloga, e iloilo ai e le Fa’amasinoga mau a le malo, pe lava ma totoe e lagolago ai le tagi fa’asaga i le ua molia.