O le fa’ateia tele o le loto o Meki i le vaaiga lea ua ia vaai atu nei i ai, na mafua ai ona le oso ni lagona fia moe, ae ua ia musumusu atu i lana soatau ina ia la fa’alatalata i lalo o le vanu i le vaega o loo sisiva ma pepese mai ai tagata uli, atonu e mafai ai ona maua se isi tonu mo se gaioiga e tatau ona faia. E ui i le pogisa o le po, ae na avea le susulu malosi o le masina i luga o ‘ulu ‘ulu o laau ma auala na fesoasoani ai i le tau tata’iina o le auala e savavali ai Meki ma lana soatau aga’i atu i lalo o le vanu. E silia laititi lava i le afa itula na tau saili ai le la auala ae taunu’u loa i le auala ta’avale e aga’i atu i le nofoaga o loo nonofo ai tagata pologa, ma la savavali ai loa. E taunu’u loa Meki ma lana soatau i le vaega faitoto’a e ulufale atu ai i le malae ae fa’afuase’i loa ona tatagi le telefoni a le tamaloa o Meki, ma ia iloa ai, o si ona to’alua o Lucy lea ua vili atu ia te ia. “Meki si o’u to’alua pele, o lea ou te matamata atu i news i luga o le televise, o loo fa’asalalau mai ai le to’atele o teneiti pologa na maua o latou tino maliliu ua lafoa’i i se tasi o nofoaga tele lava i le itu i sisifo o le atunu’u. Tafefe ai o lafoa’i atu ai ma le tino o si a’u pele o Ianeta  ...” na motu fa’afuase’i le talanoa a le fafine o Lucy ina ua le mafai ona ia toe gagana i se upu, ae ua fa’ataitaio mai nei i luga o le telefoni, ae o le tamaloa o Meki i le taimi lea, ua pei o se tagata ua leai se fa’amoemoe, ua le iloa fo’i sana tala e tali atu ai i le loto mafatia o si ona to’alua.

“Lucy si o’u to’alua pele, se aua e te loto vaivai, o matou lea ua taunu’u i totonu o le aai lea ua aumai fa’anana i ai si o’u afafine o Ianeta, ae ia e onosa’i mai iina ma loto tele, ou te iloa lava e lei oti si o’u fafine”, o le tala lea a Meki ma ia tapuni loa le telefoni, ona ia musumusu atu loa lea i lona soatau ina ia la soso atu pea i le faitoto’a e vaai pe maua atu i ai se tagata o loo ia leoleoina le lotoa. Sei o tatou tuli tatao ina atu lava le itu lea o loo lafi ai le teineititi pologa o Ianeta, o le itu fo’i lea o loo aga’i atu i ai isi sui e to’atolu o le vaega a le tamaloa o Meki. Na avea le taaligoligoa o le po ma itu na fa’alogoina ai e le au ali’i ia se leo o se tagata o loo pese, ma e foliga mai o se pese o loo sau mai i le itu lagi lea o loo latou aga’i atu i ai. Na aga’i pea i luma le savaliga a le au alii ia i le leva o le po, ma latou fa’amaonia ai, o se teineititi e ana le leo lea o loo latou fa’alogo atu i ai. E lei umi ona saili e le au alii ia e to’atolu le vaega tonu o loo sau ai le leo o le tagata o loo pese, ae o latou mauaina loa i lalo o se laau tele lava, o loo taotooto mai ai se teineititi na o ia.

O le te’i o le teineititi pologa ina ua ia vaaia moli uila ua oo atu, na nofo sa’o ai loa ua le toe pese, ma lona manatu, ai o fitafita a le Tupu o loo latou sailia o ia. Na ki atu e se tasi o sui a le vaega a Meki le moli ma ia vaaia ai se teineititi o loo nofo mai i lalo o le laau. “Tama’ita’i o ai oe, ae aisea fo’i ua e nofonofo ai na o oe i lenei togavao i le leva o le po”, o le fesili lea a le sui fa’apitoa a le vaega a Meki na latou vaaia ai le maligi o loimata o le teineititi, ua lagona lona sese ma le mata’u. “O a’u o Ianeta, o se teineititi pologa na aumai fa’amalosi mai le fale o lo’u matai, ae ina ua ou musu e avea a’u ma pologa i le nofoaga lenei, na ou sola ese mai ai loa i le vaavaaiga a le auauna sa tofia e vaaia a’u”, o le tali lea a le teineititi. “O ai na tofia lena auauna e vaavaaia oe”, o le toe fesili atu lea a le isi ali’i o le vaega, ae na toe tali le teineititi, “O le Tupu o le malo o loo vaaia le motu o tagata pologa i le aai”. E lei toe fa’atali le ta’ita’i o le vaega ae ua ia tago atu loa i lana telefoni ma vili ai loa le tamaloa o Meki ma fa’ailoa atu i ai, “Meki, o lea ua matou mauaina le teineititi o Ianeta, o loo moe i lalo o se laau tele lava i le loloto o le vaomatua”.