Ads by Google Ads by Google

Fesiligia Fono tagata matutua mai fafo agava’a polokalame TAOA

 Le Fa’atonusili o le Ofisa o Tagata Matutua, tofa Ale Tifimalae  [ata AF]
ausage@samoanews.com

A o fa’aauau ai pea le tautua a le Ofisa o Tagata Matutua i le ofoina atu lea o auaunaga tutusa ma le talafeagai mo tagata matutua o le teritori, na fesiligia ai e le Fono Faitulafono i le vaiaso nei le Fa’atonusili o le Ofisa o Tagata Matutua (TAOA), po o aofia ai ma tagata matutua mai fafo i polokalame eseese o lo o ofo atu e le TAOA i tagata matutua i le atunu’u.

 

E pei ona taua e ni isi o le Fono Faitulafono i le tele o tausaga, o polokalame o lo o ofoina atu e le TAOA mo Tama ma Tina matutua, e fa’apitoa lava i tagata matutua o le teritori ua afu la latou tautua i totonu o le malo ma le atunu’u.

 

I tausaga uma lava e pei ona taua e le Fa’atonusili o le TAOA ia Ale Tifimalae, i le taimi na fesiligia ai le paketi a lona Ofisa i luma o le Fono Faitulafono i le vaiaso nei e fa’apea, e silia i le $1 miliona le tupe e fa’amatu’u mai e le Feterale e fa’atupe ai galuega o lo o ofo atu e lona Ofisa mo tagata matutua, e pei o avanoa faigaluega o lo o galulue ai i latou ae maua totogi, atoa ai ma le polokalame o taumafa vela o lo o tufatufa atu i tagata matutua fa’atolu i le vaiaso.

 

E pei ona taua i totonu o le paketi a le TAOA mo le tausaga tupe fou 2017, e $1.3 miliona lea ua fa’aagaga e fa’atupe ai le polokalame o Taumafa Vela mo tagata matutua, ae $975,500 ua fa’atulaga e fa’atupe ai le polokalame lea e fa’a faigaluega ai tagata matutua.

 

Na fesili le afioga i le ali’i Senatoa ia Magalei Logovi’i po o aofia ai ma tagata matutua mai fafo ua aumau i Amerika Samoa i le polokalame lea e fa’a faigaluega ai tagata matutua, ae na saunoa Ale, o lo o i ai tagata matutua mai fafo o lo o agava’a ai i le polokalame lea, ae se’i vagana lava i latou o lo o umia ituaiga I.D ta’i 3 tausaga, ma i latou o lo o umia isi ituaiga ID e aofia ai le fa’aipoipo atu i se tagatanu’u o Amerika Samoa, ae mo le isi lautelega o tagata mai fafo, e le o agava’a i latou i le polokalame e fa’a faigaluega ai tagata matutua.

 

E to’a 151 le aofa’i o tagata matutua o lo o galulue i lalo o le polokalame i le taimi nei mo le umi e ta’i 4 tausaga, e pei ona fa’amanino e Ale i luma o le Fono i le vaiaso nei.

 

“O lo o muamua lava fa’a faigaluega a le TAOA tagatanu’u o Amerika Samoa, afai loa e i ai ni avanoa e totoe, ona fa’atoa maua loa lea o le avanoa o tagata mai fafo o lo o umia ID ta’i 3 tausaga, po o isi fo’i o lo o i ai pi’itaga e pei o le fa’aipoipo atu lea i se tagatanu’u o Amerika Samoa, ae le o tagata matutua uma mai fafo e agava’a i le polokalame lea”, o le saunoaga lea a Ale.

 

Sa ia taua atili fo’i e fa’apea, e na o le ta’i 4 lava tausaga le umi o lo o fa’ataga mai e le polokalame e galulue ai, a mae’a loa le 4 tausaga a le tagata, ona alu ese lea ae fa’asolo mai isi tagata matutua o lo o i ai i le lisi fa’atalitali.

 

“O le taimi nei, e silia i le to’a 200 le aofa’i o Tama ma Tina matutua o lo o i ai i le lisi fa’atalitali, ma o lo o fa’asolosolo lelei pea lava tulaga o le polokalame, ua to’atele fo’i tagata matutua ua fa’amanuiaina ai”, o le isi lea saunoaga a le ali’i Fa’atonusili.

 

O se tasi o mataupu taua sa fesiligia e le afioga i le ali’i senatoa ia Faletagoa’i Tuiolemotu i le taimi o le iloiloga o le paketi, o le pili lea sa pasia e le Fono i tausaga ua mavae e si’i ai le totogi o laisene ave ta’avale, ae maua mai ai se vaega tupe mai le tupe lea e fesoasoani ai i le Ofisa o le TAOA.

 

E ui e le o silafia e Ale se fa’amatalaga e uiga i lea tulafono, ae ua i ai le fautuaga o le a toe sailiili atili le Fono e fa’atatau i le tulafono lea, ina ia mautinoa e maua e le TAOA le vaega tupe e pei ona taua.

 

Saunoa le Peresetene o le Senate, afioga i le Tama’ita’i o le Ao ia Gaoteote Palaie Tofau e fa’apea, o le isi lenei Ofisa o le malo e tatau ona maua i ai se fesoasoani mai le malo ma le Fono, ina ia fesoasoani ai i le fa’atupeina o polokalame mo Tama ma Tina matutua o le atunu’u.