Ads by Google Ads by Google

Mae’a vaiaso muamua iloiloga tu’ufa’atasi o le paketi a le Fono

ausage@samoanews.com

O le tuana’i ai o le vaiaso muamua o iloiloga a le Komiti Soofaatasi a le Fono Faitulafono, mo le talanoaina o le Paketi a le malo mo le tausaga tupe fou 2017, ua tula’i mai ai le i ai o ni suiga ua sauni le Komiti So’ofa’atasi e toe faia i le kalena ua mae’a ona fa’atulaga, mo le fa’asologa o iloiloga o paketi a Matagaluega ma Ofisa eseese a le malo i vaiaso e 2 o lo o totoe o lana iloiloga.

 

O ni isi o ia suiga e pei ona taua e le ta’ita’ifono o le Komiti So’ofa’atasi, afioga i le ali’i Senatoa ia Laolagi Fonoti Savali Vaeao, o le toe faia lea o ni isi o fetu’unaiga i le fa’asologa o Ofisa e iloiloina a latou paketi, ina ia taumafai e fa’atinoina uma iloiloga i le taeao, aemaise ai o le toe fetu’una’i o ni isi o Ofisa e le’i avanoa mai a latou Fa’atonusili i le iloiloga o a latou paketi i le vaiaso ua mavae, ina ia mautinoa e maua uma avanoa o Ofisa ta’itasi nei e oo mai ai i luma o le Komiti So’ofa’atasi.

 

Ae i le mae’a ai o le ulua’i vaiaso o galuega fa’atino a le Komiti So’ofa’atasi, na tula’i mai ai ni isi o mataupu taua sa mafai ona fesiligia e afioga i Senatoa ma Faipule, ina ua maua le avanoa latou te fesiligia ai afioga i Fa’atonusili o Ofisa a le malo ua mae’a ona fesiligia a latou paketi.

 

Ina ua iloiloina le paketi a le Matagaluega o le Puipuiga o le Saogalemu Fa’alotoifale, na maua ai le avanoa o le Fono Faitulafono e fesiligia ai le afioga i le ali’i Fa’atonusili ia Utuali’i Iuniasolua Savusa, i le sao a lona Ofisa e fa’atatau i le puipuina o le faiga palota lautele a le atunu’u o lo o fuafua mo le masina o Novema, aemaise ai o le fa’atauina mai o le masini lea e fa’aaoga e le Ofisa o Tiute e saili ai oloa mai fafo ina ia mautinoa e le o aumaia ai oloa fa’asaina e pei o fualaau fa’asaina ma a’upega mata’utia.

 

O le fa’atinoina o su’esu’ega mo sui tauva uma mo le faiga palota i tausaga ta’itasi, o se tasi lea o mataupu na fesiligia e le afioga i le ali’i faipule ia Puleleiite Tufele Li’amatua. O le agaga o le afioga i le ali’i faipule, talu ai o le Ofisa a Utuali’i o lo o gafa ma le faia o su’ega i fa’amaumauga o solitulafono e a’afia ai tagata e tusi talosaga i avanoa faigaluega i totonu o le malo, o le mafua’aga fo’i lea e talitonu ai lona sui, o le Ofisa tonu lea e agava’a mo le faia o suega fa’apea i soo se sui tauva.

 

Ae na fa’amanino e Utuali’i e fa’apea, e ui e le o i ai se malosi a lona Ofisa e fa’atinoina ai lenei auaunaga mo le faia o suega i sui tauva o le palota, ae o se mataupu e taua tele lenei mataupu, e tatau fo’i ona vaavaai i ai lona ofisa i le lumana’i.

 

Ae mo le puipuiga o tagata mai fafo e ulufale mai i le teritori, o lo o fa’atali lona ofisa i le tu’uina mai e le Ofisa o Femalagaaiga o le lisi o tagata mai fafo o lo o ulufale mai i le teritori, mo le faia i ai o ni suega ina ia mautinoa ai o lo o mama fa’amaumauga a i latou nei i tulaga o solitulafono i totonu o le malo tele.

 

O le afioga i le ali’i senatoa ia Tuaolo M. Fruean na ia fesiligia le ali’i fa’atonu, pe le maua se fesoasoani e mafai ai e lona Ofisa ona fa’atau mai masini o lo o mana’omia e le Ofisa o Tiute, e fesoasoani ai i le sailiina o oloa mai fafo o lo o ulufale mai i le atunu’u.

 

I le avea ai o le tofa a Tuaolo ma Komesina o Leoleo i le nofoaiga a Togiola ma Faoa ua mavae atu, sa ia fa’ailoa ai ia Utuali’i e fa’apea, o lona ofisa tonu lava sa tatau ona gafa ma le fa’atauina mai o le masini lea e mana’omia e le Ofisa o Tiute, ae na saunoa Utuali’i e fa’apea, e mafai e lona Ofisa ona fesoasoani i le aumaia o se masini mo le ofisa o Tiute, pau le fa’afitauli, e umi se taimi e fa’atali ai mo se tupe fesoasoani mai le feterale e fa’atau mai ai le masini o loo moomia.

 

Na fa’amanino atili e Utuali’i e fa’apea, i lalo o tulafono a le malo feterale, o mataupu uma lava e fa’atatau i le puipuia o laufanua ma tuaoi, e fitoitonu lea i lalo o le Ofisa o le Puipuiga o le Saogalemu Fa’alotoifale, ae mo Amerika Samoa lava ia, e eseese uma lava matagaluega a le malo o lo o taulimaina auaunaga tau i le puipuiga o laufanua ma tuaoi o le atunu’u, lea fo’i la e pei ona taoto atu i le Ofisa o Tiute o loo i lalo o le vaavaaiga a le Ofisa o Tupe a le malo le fa’amalosia o tulafono tau i oloa mai fafo ma oloa e tiute i luga o le uafu ma le malae va’alele.

 

O le itula e 9:30 i le taeao nei lea ua fa’atulaga e toe amata aloaia ai galuega a le Komiti Soofaatasi mo le iloiloina o paketi a ofisa eseese a le malo, ma ua fa’amoemoe o Ofisa e 3 o le a iloiloina a latou paketi i le taeao nei, e aofia ai le Ofisa o Tautua ma Auaunaga Lautele, Ofisa e Pulea Oloa a le malo, fa’apea ai ma le Pulega o le Eletise ma le Suavai (ASPA) lea sa fa’atulaga mo le itula e 1:00 i le aoauli, ao lea ua suia mai e iloiloina lana paketi i le taeao.