"MATOU TE FIA OLA FO’I, FAAMOLEMOLE!"
Susuga Iotamo Saleapaga, M.D., Foma'i Sili
Afioga Faumuina Taufetee Ioane, Pule Faatonu, Falema'i (LBJ)
Susuga e,
Ta te vaai pea ma le moomoo fiafia i le liliu o lo tatou falema'i i le tausiga o ē ua gasegase i le taiālisisi (dialysis). O se galuega tatau ma le alofa. Faafetai e lē o motisia vailaau; maua pea foi alii ma tamaita'i ua aoaoina faapitoa latou te faatinoa le tausiga mo ia gasegase o le atunuu.
Ona 'ou nofo ai lava lea ma le fesili, "Mata ea e mafai ona fai faapena se tausiga, poo se fesoasoani mo i matou o loo mama'i tumau i le sela?"
Ou te lē muimui pe faaseā, ou te lē meleina foi le fesoasoani alofa ua maua mo ē ua gasegase i le taialasisi. Amuia lava latou. A 'ou te manatu e aofia uma matou le 'au sesela tumau i lenei talosaga - matou te fia maua foi se fesoasoani faapena, faamolemole. Silasila, e tutusa le fia ola o ē gasegase i le taialisisi, ma lo matou foi fia ola.
Tulou le faafofoga a le atunuu, ua silafia e lau susuga Foma'i Saleapaga le sela o loo tauivi pea ma ita nei, auā ua 30 tausaga o lau tausiga. Ua see atu nei i le Tofa a Tuatoo ma le Susuga a Anesi. O fualaau lava le fesoasoani. Sa auina foi i Niu Sila i isi tausaga, ona liliu mai lea i Hawaii ina ua agavaa i le Medicare. Pei lava e fulisia le ma'i sela iā matou ua tau tolopaa le ola, ae e iai foi isi tupulaga e oo ifo i pepe faato'a fananau, e sesela foi; ae eseese la le malosi o sela. O le tali lava o lenei faafitauli, i lo'u iloa, o le okesene e mānava ai.
O le talosaga nei la e faasino tonu i masini okesene, fe'avea'i pe tuu i tafatafa o le moega pe a moe, lea ua maua tele nei mai fafo. Ua atoa le tausaga o la'u masini na maua mai le fanau i Amerika. E ese le lagona fiafia ina ua lava ma sosoo le okesene i le mānava. Ua lē toe fe'avea'ia tane okesene mamafa ia e utu i lo tatou falema'i. Ua mafai ona fealua'i atu i fafo i faleoloa poo ofisa o le mālō, o nisi foi faalavelave o aiga, aemaise i sauniga lotu. Ua 'ave foi i malaga. A ua pe la si a'u masini.
O lea la ua ou lisiina le masini okesene mai le pisinisi lea i Matuu. O lona tau amata e $275 i le masina, ma le $100 (deposit), ona $100 lea i masina uma. (Ou te le gafatia le isi o le masini fe'avea'i a le kamupani lea - e $500 i le masina. Fai mai le fafine e ona le pisinisi, "A fua i le tau e lisi ai lau tane okesene mai le LBJ, faaopoopo i ai ma le galuega fesiita'i, e sikuea mamao oe i le lisi mai iā matou." Ua onosa'i la e fai le lisi - ona o le fia ola.
O lea e faasalalau mai i imeli ma le facebook, ua maua nei i fafo masini okesene fe'avea'i lāiti faapea i lalo ifo o le $2000 i le masini, e faatau motu ai.
Ua tatalo atu ai nei, faamolemole, e ā pe ota ai ni a tatou masini okenese e tuu i le faleoloa o lo tatou falema'i, matou te faataua, pe lisi. Afai ua mafai ona faatau i LBJ tane okesene mo matou le 'au sesela, e tatau foi la ona faigofie ona maua i le LBJ ni masini okesene lāiti faapea. Ua silafia lava e outou alii foma'i le mamafa o le sela e tatau i ai le malolosi o masini okesene. O le tala ua ou faitau ai mai lipoti, e toatasi lava se isi e ave i 'ō e a'oa'o ma toleni ai mo le tausia o masini okesene nei. E lē faatusaina le anoano o ē galulue i le itu faapitoa o lo tatou falema'i e tausi ai le taialasisi.
Ou te toe fai atu, e lē faameo pe meleina le fesoasoani o loo maua mo gasegase o le taialasisi, amuia latou! A e tatau ona faatutusa fesoasoani, auā matou e fia ola foi. A faatusatusa le tupe e alu i ma'i ia e lua, e mamao le taugofie o le tausiga o le sela. Fai mai e faitau miliona e maua mai foa'i (grants) e tausi ai taialasisi. E lē manaomia ni miliona e faatau ai ni masini okesene matou te mānava ma ola ai. E lē faatusalia le tau e tausi ai le gasegase taiālasisi e toatasi.
O le faatala'u'ula lea i le ava ma migao. O le tagi a le pumate e fia ola.
Fofō I. F. Sunia