Ads by Google Ads by Google

"OFISA O LE MALO O AMERIKA SAMOA, IA TATOU GALULUE FAATASI"

Lau Afioga i le faatonu, 

Tesema 8, 2020 sa fa’afuaseia ona maliu lo’u to’alua o Christina Alama Maafala Gasu I Vaivase Uta, Samoa mai le Cardiac Arrest.

O se taimi faigata, oute taunu’u mai i Amerika Samoa, ae taunu’u mai ma le KOVITI-19 i le masina lava lea, ma taofia ai loa ma malaga e oo mai i le taimi nei.

Ua lua nei tausaga ma masina e 6 o lo’o faapea lava ona taofia la’u malaga i Samoa e asi le tu’ugamau o si o matou aiga talutalu ai le le lelei ona faatino galuega a latou o loo gafa ma nei galuega.

O le aso 27 o Ianuari 2022, sa ou taunu’u mai ai i Amerika Samoa.  Ina ua mae’a le nofova’ava’aia sa matou taofia ai mai le taunu’u mai o le faigamalaga, sa ou alu ai i le Konesula a Samoa e fa’atonu so’u avanoa oute fia malaga ai e asi le tu’ugamau o si o’u to’alua – Ma o lea fo’i taimi i le ofisa o le Konesula, sa fa’aalia ai uma o’u pepa faimalaga fa’atasi ai ma pepa tui.

Sa fa’atonuina fo’i a’u oute alu i le Ofisa o le KOVITI i Faga’ima mo isi suega, sa tauaapa foi pepa tui ma fa’apea ona tu’uina mai ai loa ma le pepa e fa’ataga ai ona totogi lo’u pasese mo le malaga atu i Apia, ma sa toe fai ai foi ma le tui ma fa’ataga ai loa ona tu’ua Amerika Samoa.

Ae peita’i o se fiafia liua i le fa’anoanoa – Ina ua ou tu vae i luma o le faitoto’a o le va’alele ae toe taofia ai a’u e le Ofisa o Femalagaina ma le latou tala e fa’apea mai “e tatau ona stamp ma sainia e se foma’i la’u pepa KOVITI, fa’atua fa’atagaina ai lea o a’u i luga o le va’alele.

O le fa’anoanoaga ma le fesili i lo’u mafaufau, e tolu matagaluega sa latou tauaapaina lo’u pepa tui, ae leai ma seisi o nei matagaluega sa fesiligia se stamp po’o se sainia e se foma’i o lo’u pepa tui – Ua na’o le Ofisa O Femalagaiga sa latou fesiligia lea vaega.

O la’u pepa tui o le KOVITI o le pepa tui mai le Unaite Setete o Amerika. O lo’o sainia ai i latou sa fa’atinoina le tui atoa ai ma aso sa fa’atinoina ai.

Ole pepa tui lava lea e tasi lea sa mafai ona ou faimalaga mai ai i Amerika Samoa mai Amerika. Mai le faigamalaga atoa mai Amerika, i na’i Hawai’i se’ia o’o mai i Tutuila, o le pepa tui lava lea e tasi sa mafai ona fa’atagaina ai a’u i luga o va’alele ma sa fa’afaigofie ai o’u femalagaiga.

O le fesili – Aisea sa le taofia ai a’u i nei malae va’alele e tele, ma ofisa mai fafo atoa ai ma ofisa o femalagaiga i Amerika Samoa i lo’u taunu’u mai i Tutuila, a’o lea ua taofia a’u i luma o le faitoto’a o le va’alele a’o ou sauni atu e faimalaga i Apia e asi le tu’ugamau o si o’u to’alua?

O lo’u le malamalama i le Ofisa O le Konesula a Samoa – Sa tatau ona logo ina mai au tusa ai ma tapenapenaga i le 4 masina sa ou nofo faatalitali ai i lo’u fia va’ai i le tu’ugamau o si o’u to’alua.

O Christina A. Maafala Gasu o le tagata nu’u o Amerika Samoa – Sa tautua i galuega o le tatou malo e aofia ai le TAOA po’o le Ofisa of Tagata Matutua, ma sa ia faigaluega fo’i i le Starkist Samoa. O lona afioaga o Nu’uuli, mai le aiga Savusa, o ia o le afafine o Fiafia Alama ma Logoitino.

O Christina o se tina e to’a 13 le fanau – To’a ono lana fanau, atoa ai ma fanau fai e to’a fitu. Sa ia maua ina foi se fa’ailoga maualuga i totonu o Riverside County o le Top Adoption Parent Award, ma o ia fo’i o se tagata fai pisinisi.

O Christina e ona ina le pisinisi i Apia, Samoa e ta’ua o le LULAROW FASHION STYLER LEGGIES, PRESSES.

Oute fautuaina nei matagaluega se’i taga’i toto’a i mataupu a tagata lautele, ma galulue fa’atasi – Sa tu’u oute fai Aso o Tina i si o’u to’alua i Samoa, ae peita’i ua le taunu’u ia fuafuaga ona o le fa’atamala o matagaluega o le tatou malo i le taulogologo ma taufa’amanatu tulaga sa’o lava e tatau ona uia mo le fa’afaigofieina o nei faigamalaga i va o Samoa e lua.

Avea ia lenei taimi oute fa’atoese atu ai e tusa ai ma se fa’amatalaga ua le tau tamali’i – O le agaga atoa, ina ia aua ne’i e va’ai maualalo ia tatou tagata nu’u, ma ia tatou galulue fa’atasi. Aua fo’i ne’i toe tupu lenei tulaga i seisi tagata – O tatou uma o Samoa.

Soifua

Iosefa Gasu