Ads by Google Ads by Google

Teena Fa’amasinoga Apili le talosaga Fagaima Milovale

Ua faailoa i se faaiuga mai le vaega o le Faamasinoga Apili a le Faamasinoga Maualuga, lo latou teena le o se talosaga na faaulu e Fagaima Milovale, ina ia toe iloilo e le faamasinoga lana faaiuga ua maea ona tu’uina mai, ona o le fanua lea na mafua ai le faamasinoga ma tuuina mai ai loa le faaiuga a le Faamasinoga o Fanua ma Suafa i le 2009.

I se faaiuga na tuuina mai e le Faamasinoga Apili na taua ai e faapea, i le maea ai ona o latou iloiloina o mau uma o lenei mataupu, faapea ai faafinauga mai loia o itu o lenei mataupu, na tuuina mai ai loa e alii faamasino la latou faaiuga e uiga i lenei mataupu.

E le gata na teena le talosaga e toe iloilo ai le faaiuga, ae sa teena foi le talosaga a Fagaima ina ia faaleaoga le avea o le alii loia sili lagolago ia Vincent Kruse ma loia e tula’i mo le malo i lenei mataupu, ona o le tama o lea alii o le faamasino sili lea, o ia fo’i lea ma isi faamasino na tuuina mai le faaiuga lea ua mafua ai lana talosaga.

O le masina o Iulai 2009 na tuuina mai ai le faaiuga a le faamasinoga o Fanua ma Suafa, ma le lagolagoina ai le faafinauga na tuuina atu e Fagaima, e uiga lea i le tuuina atu o ona fanua faaleaganuu i le malo.

I le tuuina mai o lea faaiuga a le faamasinoga o fanua ma suafa, na faila ai loa e le loia a Fagaima o Charles Alailima se talosaga i le 2010 e talosagaina ai le faamasinoga  ina ia toe iloilo lana faaiuga ua maea ona tuuina mai, peitai o lea talosaga na teena e le Vaega Faamasino o le Faamasinoga Maualuga, lea foi sa aofia ai ma le faamasino sili ia Kruse.

Na vave ona faila e le itu tetee sa latou faatuiese i le faaiuga a le malo, e tofia ai le alii loia sili lagolago o Kruse e avea ma loia a le malo i lenei mataupu, ona e talitonu le itu tete’e, e ono i ai ni fete’enaiga i lea faaiuga, ona o le tama o le alii loia lea sa nofo i le nofoa mo le faamasinoina o lenei mataupu, atoa ai ma le faaiuga e pei ona tuuina mai.

Na taua e Alailima i le iloiloga lea na fofogaina i le vaiaso nei e faapea, o le filifilia o Kruse e avea ma sui o le malo i le mataupu lenei, o se tulaga na faateia tele ai le susuga Fagaima, aemaise ai foi, o le filifilia o ia na faia lea i se taimi faanatinati, ae o ia foi o le atalii o le faamasino sili sa faia le faaiuga.

O alii faamasino na nofoia le faamasinoga apili e aofia ai Lyle L. Richmond, John Ward II, Elvis P. Patea ma afioga i alii faamasino lagolago ia Faamausili Pomele ma Suapaia Pereira.

Saunoa Ward ma ia fesiligia le alii loia ia Alailima pe o a mafuaaga e mafai ai ona le avea le alii loia o Kruse ma sui o le malo i le mataupu lea ua i luma o le faamasinoga.

“Na filifilia ma talia o ia (Kruse) e avea ma loia e pei foi o oe,” o le saunoaga lea a Ward ia Alailima. Na finau Alailima e faapea, e mafai ona alu ese Kruse mai lona tauaveina o le mataupu lea, ae tofia i ai se isi loia sili lagolago e fai ma sui o le malo, peitai na saunoa Ward, e le toatele loia e mafai ona o latou tauaveina mataupu nei.

Ae na taua e Alailima e faapea, o le toa 9 ai lea o loia ua latou tauaveina lenei mataupu talu ona amata mai i le amataga, ae afai e avea le alii loia lea ma loia a le  malo i le mataupu lenei, e tasi lava le tagata e lava lona iloa i lenei mataupu, e na o le loia na tusia le talosaga apili, ae o le tofia o le alii loia lea i le minute mulimuli o se tulaga e tete’e i ai lana itu.

Na fesiligia e le alii faamasino ia Patea le susuga Alailima ina ia faailoa atu nisi o aafiaga ma feteenaiga e mafua ai ona le talafeagai le avea o Kruse ma loia mo le malo, ae na tali le alii loia e faapea, e i ai feteenaiga i le avea ai o Kruse ma loia mo le malo, ona o lona tama o le alii faamasino sili, ma e ono le mafai ai ona faia se faaiuga i auala faaleaiga ona o le fesootaiga o le alii loia ma lona tama.

Ae na taua finau le alii loia ia Kruse e faapea, e leai se mataupu o tuuina atu e le itu tetee e lagolagoina ai la latou mau ina ia faaleaoga le avea o ia ma loia mo le itu a le malo.

Na taua foi e le alii loia e faapea, e ui o lea ua finau mai le itu tetee e i ai le sootaga a ia ma le faamasino sili, ona o lona tama, peitai e le o mafai e le itu tetee ona tuuina atu ni mau  e lagolagoina ai le ono i ai o se feteenaiga e tulai mai i le va o ia ma lona tama, le faamasino sili.

Fai mai le alii loia ia Kruse, afai e o ese faamasino ae aami  ni faamasino mai fafo  latou te iloiloina lenei mataupu, o le a toe faaopoopo atili ai ma le isi taimi umi e  faatalitali ai.

I le faaiuga o lea  iloiloga, na taua ai e alii faamasino lo latou le mauaina o se mafuaaga e ala  ai ona aveese Kruse mai le avea ma loia mo le malo i lenei mataupu.

faaliliu Ausage Fausia

Read the English language version of this story in more headlines or local news sections.