Ads by Google Ads by Google

Tete’e le ua molia e le o ia o lo o sa’ili e le malo

Na fa’amaonia mai e le loia a le malo o Cable Poag i le Samoa News ananafi, o le ali’i o Pati Solomona po o Pati Tamati lea na pu’e fa’apagota i le fale fa’amasino i le Aso Gafua na te’a nei, o ia moni lava lea o lo o i ai lona igoa i le lisi o tagata e to’a 14 ia na tu’uaia i le gaoia o pusa wahoo mai le kamupani i le 2007. Na fa’aalia e Pati Solomona i le Samoa News, e le’i a’afia ai o ia i le su’esu’ega o le mataupu e uiga i le gaoia o pusa wahoo mai le kamupani, e le’i sola ese fo’i ma le atunu’u talu mai le tausaga e 2007 na amata taofia ai i latou na molia, na tapuni fo’i le kamupani i le 2009 o fa’aauau pea ona galue, ma o le vaega lea sa galue ai na mulimuli lava tula’i ese ina ua tapunia le kamupani i’a. I fa’amaumauga a le fa’amasinoga o lo o taua ai, mai le to’a 14 na tu’uaia e le malo i lenei mataupu, ua mae’a ona molia le to’a 12 se’i vagana ai ali’i e to’alua lea e aofia ai ma Solomona, e le’i maua ina ua sailia i latou e leoleo i le 2007. O le Aso Gafua na te’a nei na alu atu ai Solomona e fai sana kilia e fa’afou ai lona ID, ae alia’e mai ai i fa’amaumauga a le fa’amasinoga, le i ai o se tusi saisai e fa’asaga i lenei ali’i. O le aso lava lea na pu’eina ai o ia ma tula’i ai lava i luma o le Fa’amasinoga Fa’aitumalo. O moliaga mamafa e tolu o lo o i totonu o le tusi saisai fa’asaga ia Solomona e aofia ai le gaoi, ave fa’agaoi o ni mea totino sa tu’uina atu i lalo o lana va’ava’aiga, fa’apea ai ma le faia o fa’amaumauga tau fa’asese. O le itula e 8:30 i le taeao nei lea ua fa’atulaga e toe fa’aauau ai le ulua’i iloiloga o lenei mataupu, ma na taua e Poag i le Samoa News, ua sauni le malo e tu’uina atu se maliliega ia Solomona e fa’amuta ai lenei mataupu, e auala atu i lana loia o Mike White. O nisi o mataupu o le a mafai ona fa’amanino i le iloiloga i le taeao nei, o le malosi e mafai ai e le malo ona fa’aauau pea lenei mataupu, ona o lea ua silia ma le 4 tausaga o taoto le mataupu e le’i faia. Sa saunoa le ali’i fa’amasinoga ia John L. Ward II, o le mea moni lava ia, e le o misi le tu’uina atu e le fa’amasinoga o lisi o tusi saisai i le Ofisa o le Loia Sili i tausaga uma lava, peita’i e le o manino i le fa’amasinoga pe fa’apefea ona le mafai ona maua le ua molia mai taimi uma lava e alu atu ai e fa’afou lona ID i le Ofisa o Femalagaaiga, ae o le Ofisa lea o se vaega o le Ofisa o le Loia Sili. Saunoa Ward, e mana’o i le malo ina ia fa’amatala atu ia te ia pe fa’apefea ona tupu lenei mea lilo. E le’i finagalo le loia a Solomona e tali mai i nisi o fesili a le Samoa News i le aso ananafi, pe fa’amaonia e le o Solomona moni lea o lo o i ai lona igoa i luga o le tusi saisai, ae pe fa’amata fo’i e i ai se avanoa e mafai ai ona fa’aleaoga lenei mataupu mai le toe fa’aauauina lea i luma o le fa’amasinoga. Na tali White, o le fa’aiuga lava e sau mai le ali’i fa’amasino. E $20,000 le tupe na fa’atulaga i le tusi saisai e tatala ai Solomona i tua, ae na toe fa’aitiitia e le ali’i fa’amasino i le $5,000 , peita’i ina ua mae’a le isi iloiloga lea sa faia i le aso Faraile na te’a nei, na faia ai loa e le afioga Ward le fa’aiuga ina ia tatala Solomona e aunoa ma se tupe taofia, e fa’atalitali ai lana iloiloga lea ua fuafua e faia i le taeao nei.