Ads by Google Ads by Google

Toe gugulu fo’i tagata i si’itaga fou a le LBJ

O siitaga foi i pili a le falemai o le LBJ lea ua toe faalauiloa mai, ua toe  faalogoina ai foi le gugulu o nisi o le atunuu, ae mafuli lava i tagata mai fafo o loo aumau i totonu o le teritori, ona e foliga mai o le mamafa o siitaga i pili nei o le a pau atu lea i tagata e le o taua o ni tagata ua nonofo  mau i le teritori.

O se tama mai le afioaga o Aua e faigaluega i le kamupani i’a o le StarKist Samoa, sa ia faailoa mai i le Samoa News lona faanoanoa tele, ona o siitaga fou i pili a le LBJ lea ua atagia mai ai le amo uma e tagata mai fafo le mamafa o le avega.

Na taua e lea tama e faapea, afai o le faanaunauga o le falema’i o le tuu mai lea o le avega e amo e tagata mai fafo, o lona uiga ua faaituau pe faailoga lanu foi le faaiuga ua latou faia.

Na taua e le malo, e le tatau ona vaai pito tasi le pulega a le falemai i tagata mai fafo, aua o le isi lea auala o loo faa faigata ai ona faafou a latou ID, sei vagana ua maea ona totogi se aitalafu i pili a le falema’i ona faatoa mafai lea ona maua se kilia e faafou ai le pepa nofomau mo le isi tausaga.

O le aso 21 o Me lea ua faalauiloa mai e le pulega a le LBJ o le a amata faamamalu ai a latou siitaga, lea o le sii mai ai le pili e vaai ai le foma’i mai le $10 i le $20. Ae mo tagata mai fafo, e $20 e totogi e vaai ai le foma’i, ae o le $85 e totogi mulimuli.

“E faapefea ona maua e le tagata e le atoa se $200 o lona totogi i le lua vaiaso le pili fou lea ua tuuina mai, ae o lea e laina tutusa tagata mai fafo  ma tagata Amerika Samoa i le totogiina lea o le lafoga, ma fai lo latou sao i le tamaoaiga o le  teritori,?” o le faasea lea a se tina e galue o se teu oloa i se tasi o faleoloa i le atunuu.

Na taua e le tina lea i le Samoa News, e tatau lava i le malo ma le Fono Faitulafono ona galulue e saili tupe e fesoasoani ai i le falemai, ae le o le taumafai e una’i mai le ululu o le laau i luga o tagata, aua o lea foi e pagatia tagata i le totogiina lea o lafoga, aemaise ai o le maualuga o le tau o le soifuaga ua i ai.

Saunoa le alii kovana ia Togiola Tulafono, ina ua leai se faaiuga a le Fono e faia i ana pili tupe ia sa tuuina atu i ai e fesoasoani ai  mo le falemai, sa ia tuuina atu ai loa se tusi i le pulega a le  falemai mo le vaavaai lea i le faia o ni a latou siitaga, ae le o ni siitaga tetele.

Saunoa Togiola, e manaomia foi e le falemai tupe e faatino ai lana auaunaga e pei foi o isi lala o le malo.

Na muamua faamalulu le alii kovana i le atunuu ona o siitaga ia  ua fuafua le pulega a le falemai e toe faaee, ae i ai lona talitonuga o siitaga ia ua fuafua o le a talafeagai lava ma le malosi o le tamaoaiga o le atunuu o loo i ai.

Ua i ai le faamoemoega o le pulega a le falemai, o se taimi o le masina fou e amata faatulaga ai a latou iloiloga faalauaitele ma le atunuu, ina ia mafai ai ona fesiligia i latou i ni o latou finagalo e tusa ai o siitaga ua fuafuaina nei.