Ads by Google Ads by Google

Toe tolopo le lauina o le faasalaga a Tone Pulou

O le taeao ananafi na faatulaga e fofogaina ai le faasalaga o le alii o Tone Pulou, peitai o lea ua toe tolopo i le Aso Lua o le vaiaso fou, ina ia maua ai se avanoa e feiloa’i ai lana loia ma nisi o lona aiga o lo o fuafua e molimau mo ia.

E na o le Sa’o o le aiga o Pulou na molimau i le taeao ananafi, le afioga ia Utofili Asofaafetai Maga.  E foliga mai o le molimau a le afioga ia Utoofili na mafua ai ona faia le faaiuga a le faamasinoga e toe tolopo lenei mataupu.

Na taua e Utoofili i lana molimau, o ia o le Sa’o o le aiga o Pulou, ma o le fo’i ua molia o lana matai taule’ale’a i totonu o lona aiga.

Na faaalu e Utoofili se taimi e tau faamatala ai tiute tauave a le matai taule’ale’a i totonu o lona aiga ma le nuu, ma o nisi o ia tiute mo Pulou e aofia ai lona fesoasoani i taimi o toona’i a le ekalesia ma le aiga, o ia na te  logoina isi sui o le aiga o lo o nonofo i Pagai pe afai ua manaomia se feiloaiga a le aiga potopoto, o ia foi o le failautusi a le aiga na te faamaopoopoina  saoga a le aiga i soo se faalavelave, e faamoemoeina tele foi Pulou i soo se manaoga i totonu o lona aiga.

Fai mai Utoofili, o isi itu lelei o Pulou, e le gata o se tagata e malamalama i le aganuu, ae o ia foi o se tagata e atamai e tautala ma poto i soo se gaioiga faananati pe afai e manaomia e lona aiga.

Na fesiligia e le loia a le malo, o Mitzie Folau ia Utoofili, pe na te silafia le aiga o le teineititi lea o lo o aafia i lenei mataupu, na tali le molimau, e le masani tele ai, e ui o se tasi foi o aiga i totonu o lona nuu o Fagaitua.

Na fesiligia foi Utoofili pe masani i le tama’ita’i o lo o a’afia i lenei mataupu, na tali le Sa’o, e na te le i iloa muamua, peitai o lea faatoa faalogo ma iloa, ina ua faagasolo lenei mataupu.

Sa fesiligia foi le molimau pe na te iloa o lea ua ta’usala Pulou i le moliaga o le faiaiga ma se teineititi e 13 tausaga le matua, na tali Utoofili, na te le’i iloa lena tulaga, e le’i tuuina mai foi se faasalaga a le faamasinoga e tusa ai o le mataupu, peitai e i ai lona talitonuga e i ai taimi e tutupu faafuasei ai ni faafitauli e pei la o le faafitauli lea ua aafia ai le ua molia.

Fai mai Utoofili, o ia e matua inoino lava i ituaiga gaioiga ia e pei ona ta’usala ai Pulou, peitai e tumau pea lona talitonuga o Pulou, o se alii lelei ma amio lelei.

Na faatoese Pulou i le faamasinoga e tusa ai o le solitulafono sa ia faia, ma ia talosagaina ai se isi avanoa mo ia sei foi atu ai e tausi lona aiga ma ona matua, aemaise ai e fia tautua i le nuu ma le ekalesia.

Sa ia faatoese i le aiga o le tamaitai na aafia ma ona matua, o lona nuu ma le ekalesia.

“Ou te talosaga atu i lua afioga i alii faamasino mo se isi avanoa mo a’u, se’i o’u toe fo’i atu ai e tausi lo’u aiga, aemaise ai o lea ua ou iloa ua i ai isi o’u matafaioi faatama, ou te tausi ai i si o’u atali’i,” o le talosaga lea a Pulou i le alii faamasino sili lagolago ia Lyle L. Richmond  ma Mamea Sala Jr.

O le moliaga ua ta’usala ai Pulou na afua mai i se faalavelave na tulai mai i le  2010 ao galue o se faiaoga i le aoga tulaga muamua i Alofau, ma i’u ina ma’itaga ai se teineititi e 13 tausaga le matua.

Na sola o ia i Ausetalia ma nofo ai mo le silia i le tausaga, peitai ina ua toe agai atu i Hawaii e tafao ai i nisi o ona aiga ma uo, na pu’e faapagota ai o ia e FBI ma toe faafo’i mai ai i le teritori ia Oketopa 2011.

O le taimi nei, o lo o taofia pea o ia i le toese e aunoa ma se tupe ua faatulaga e tatala ai o ia i tua.