E to’a 23 i latou na fai kerisimasi i le falepuipui i Tafuna, ina ua taofia fa’apagota i latou e leoleo i le po o le kerisimasi fa’apea ai ma le aso atoa o le kerisimasi na soso’o ai, ona o tu’uaiga i solitulafono eseese e mafua mai i le ‘ava malosi.

O i latou na taofia e leoleo e aofia ai ma ni ali’i se to’alua e laiti i lalo o le tulafono, faapea ai tama’ita’i e to’atolu.

E tusa ai ma fa’amaumauga a le Samoa News i le aso o le kerisimasi o le tausaga na te’a nei, e na o le to’afitu i latou na taofia i le falepuipui i Tafuna, ona o tu’uaiga i le fa’atupu vevesi i nofoaga faitele, ave ta’avale ‘ona atoa ai ma isi solitulafono mama eseese.

O ni isi o i latou na taofia fa’apagota e leoleo talu mai le vaiaso na te’a nei ina ua amata le latou poloka masani, seia o o mai i le aso o le kerisimasi na te’a nei, sa taofia mai lea i le taimi o le poloka a leoleo o lo o fa’agasolo i luma o le faleoloa o le CBT i Nu’uuli, ae o isi o lo o taofia mai lava i vaega eseese o le atunu’u e aofia ai ma luga o le auala tele a le malo.

Na matua fa’atumulia le fale fa’amasino fa’aitumalo i le taeao ananafi ia i latou uma na taofia i le falepuipui i le aso o le kerisimasi, aemaise ai o latou aiga na aga’i atu e molimau ma fa’afofoga i taualumaga o a latou mataupu.

O le to’atele lava o i latou na taofia faapagota sa toe tatala i tua i o latou aiga, i lalo o tuutuuga a le fa’amasinoga e ao ona usita’i ma tausisi i ai, ao fa’atalitali ai taimi ma aso ua fa’atulaga e toe valaau ai a latou mataupu i luma o le fa’amasinoga, sei vagana ai se vaega to’aitiiti sa fa’atulaga e le fa’amasinoga sina vaega tupe e totogi ona fa’atoa mafai lea ona tatala i latou i tua mai le toese i Tafuna, ona o ni isi e le o se taimi muamua lea ua molia ai i luma o le fa’amasinoga, ae o isi fo’i e matuia tu’uaiga na mafua ai ona taofia i le toese i Tafuna.

O ali’i e laiti i lalo o le tulafono e to’alua lea na taofia e leoleo i le falepuipui o tamaiti, o lo o tu’uaia uma i laua i le inupia ae le i atoa le 21 tausaga le matutua.

O le isi o i laua fa’atoa solitulafono lava lea, ae o le isi to’atasi na fa’atoa tatala atu i tua i le aso Lulu na te’a nei, ae toe loka mai ai e leoleo i le po o le aso Lulu lava lea i le inu pia ma le fa’atupu vevesi i nofoaga faitele.

Ina ua lau le fa’asalaga a le ali’i laititi lea i le aso Lulu na te’a nei, sa tu’u atu ai e le afioga i le ali’i fa’amasino ia Elvis P. Patea tuutuuga malolosi e ao ona ia usita’i i ai, e pei o le fa’asa lea ona ia toe tuua le latou aiga i po o aso ta’itasi, amata mai i le itula e 6:00 i le afiafi seia o o atu i le itula e 6:00 i le vaveao, se’i vagana lava ua la o to’alua ma ni isi o ona matua ona fa’atoa mafai lea.

Ina ua toe valaau le mataupu a le ali’i lea i le taeao ananafi, sa faia ai loa e le afioga i le ali’i fa’amasino ia Patea le fa’aiuga, ina ia taofia o ia i le falepuipui o tamaiti mo le umi e 2 vaiaso, ina ua faamaonia lona le usitaia o tuutuuga a le faamasinoga sa tuuina atu ia te ia.

Na taua e le loia a le malo o lo o gafa ma le taulimaina o mataupu a fanau laiti ia Terri Bullinger e fa’apea, o se tasi o itu o lo o vaavaai i ai le malo i mataupu o lo o molia ai fanau laiti, o le taumafai lea e saili po o ai sa tuuina atu le ‘ava malosi i fanau laiti nei ua mafua ai ona a’afia i laua i le tulafono.

Na taua e le loia e fa’apea, o se tasi lena o vaega o lo o mamafa i ai galuega a le matagaluega o leoleo ao fa’atinoina ai a latou poloka mo aso fiafia o lo o fa’agasolo i le taimi nei, e le gata o le sailia o tagata o lo o feoa’i ‘onana i luga o le auala tele, ae o lo o taumafai fo’i e faamalosia tulafono mo fanau laiti e tagofia le ava malosi, ina ia faaitiitia le aafia o i latou i soligatulafono eseese.

E to’alua isi ali’i na taofia mai e leoleo i le Bowling Alley i le po o le kerisimasi na te’a nei, ina ua ova le ‘onana ma la faia ai amioga e save’u ai le nonofo filemu o tagata.

O le isi o i laua na fa’aumuumu i fafo o le vaega e paka ai ta’avale ina ua ita i Leoleo po a le fale kalapu, ae o le isi na taumafai e fa’aleaga le tioata o se tasi o ta’avale sa paka ai i totonu o le Bowlling Alley.

O le isi ali’i na taofia mai e leoleo i Leone, ina ua fiu leoleo e taofi lana ta’avale ae alu i le atoa, ma fai ai loa a latou tuliga ta’avale ma leoleo.

Na taua i fa’amaumauga a le fa’amasinoga e fa’apea, na so’a e le ta’avale a le ali’i lea le isi ta’avale a leoleo i le taimi o tuliga sa faia.

O lea ali’i ua leva ona tau sailia e le fa’amasinoga maualuga, ona o sana mataupu o lo o taoto ai i luma o ali’i fa’amasino e le i mae’a lona taualumaga, ae ua fiu le fa’amasinoga e toe saili mai ua le mafai lava ona toe maua, ma sainia ai loa e le fa’amasino sili sana poloaiga e pu’e fa’a pagota ai o ia pe a toe maua.

O le taeao ananafi na fa’ataunu’u ai e le Masela o le fa’amasinoga le poloaiga e pu’e fa’apagota ai lea ali’i, ina ia mafai ona taofia i le toese i Tafuna ma auina atu ai loa i luma o le fa’amasinoga maualuga mo lana iloiloga o lo o fa’atali mai ai.

E leai se kalena a le fa'amasinoga maualuga i le aso ananafi, sei vagana ai ana galuega masani mo le vaiaso fou lea ua mae'a ona fa'atulaga, ma le fa'amoemoe e toe amata ai le iloiloina o ana mataupu masani, e pei o mataupu savili atoa ai ma mataupu tau i solitulafono mamafa.