O le taeao ananafi na taualuga ai aoaoga sa feagai ma tina ma tama’ita’i e to’a 35 mo le umi e 10 vaiaso, e ala i le aoaoina o i latou i auala eseese e tui ai teu, i le Aoga Tui Teu lona lima ua fa’atautaia ma fa’atupeina e le Matagaluega o Tupulaga Talavou, Tina & Tama’ita’i.

O le to’atele o i latou nei e pei ona taua e le sui Fa’atonusili o le Matagaluega, le afioga Pa’u Roy Taito Ausage, e le na o se tasi se aoaoga ua fa’amanuiaina ai i latou, ae ua mae’a fo’i ona latou maua tusi pasi mai isi aoaoga e pei o aoga kuka, aoga i le faiga o le Elei atoa ma aoga su’isu’i.

O le faletua ia Sofia Taituave, o le faletua o le susuga a Rev. Taituave o le Ekalesia Metotisi na taitaia lenei sauniga puupuu i se tatalo, faapea ai ma se upu fa’amalosi mai le tusi paia, e unaia ai tina ina ia fa’aaoga tatau pea taimi ma avanoa ua tu’uina atu e le Atua ia te i latou, ina ia mafai ai ona fa’aopoopo le taleni ma le tomai e fa’atino ai galuega e tausi ai aiga, tautua le nuu ma le ekalesia.

“O tatou tina, ua pae ma auli i totonu o aiga, e fa’alagolago foi le manuia o tatou aiga i lona atina’eina i a tatou galuega fa’atino”, o le saunoaga lea a Taituave ma ia fa’afetaia ai i latou mafai ona latou ausia lenei tausinioga fita, e ala i le fa’aopoopo o le tomai e tui ai teu e maua ai le isi alaga tupe fa’aopoopo mo latou aiga, i tomai eseese ua latou maua.

Saunoa Pa’u e fa’apea, so o se tina lava i le lalolagi lenei e aofia ai ma tina Samoa, sa tu’uina i ai e le Atua le mafaufau ola e atina’e ma fa’aleleia ai lona aiga, ae mafua ona le sogasoga le tina e sailiili i auala eseese e atina’e ai lona aiga, latou te le o maua aoaoga e fesoasoani ai i le loto filiga o lo o ia te i latou.

“O le taeao lenei (taeao ananafi), ua tatou molimauina ai le moni o lea manatu, ina ua mafai e i latou nei ona ausia le isi tulaga mataina i o latou olaga fa’a tina tausi aiga, e ala i lo latou iloa tui teu ina ia fa’amatagofie ai totonu o aiga, malumalu, taimi o fa’aipoipoga, po o le faatuina ai fo’i o se pisinisi tui teu e saili ai se tupe mo le aiga”, o le saunoaga lea a Pa’u.

Saunoa Pa’u e fa’apea, o le finagalo autu o lo o naunau i ai le Matagaluega, ina tele agava’a eseese e fa’amanuiaina ai tagata o le atunuu, ina ia mafai ai ona fa’alautele lo latou iloa i isi taleni, e mafai ai ona atina’e o latou aiga pe fesoasoani atu ai fo’i i isi tagata.

Sa ia taua fo’i e fa’apea, o le galuega o le tui ina o le teu, e foliga o se galuega e faigofie i le manatu o le isi tagata, ae a tui loa e se tagata ua i ai le agavaa faapitoa se teu, o iina e iloa ai le matagofie ma le manaia i le silasila, e eseese mamao fo’i ma le teu o lo o tui i le mafaufau lava ia o le tina.

Na fa’afetaia e le Matua o Faiva ia Maria Masalosalo sa gafa ma le fa’atautaia o lenei aoaoga, i latou uma ua mafai ona fa’ai’uina ma le manuia le aoaoga sa latou galulue mai ai mo le 10 vaiaso, i lo latou onosa’i ma le filiga ao feagai ai ma aoaoga.

“E taua le fa’aaoga tatau o tatou taimi aemaise ai o taimi ua tuuina mai e le Atua ia te i tatou, ina ia tatou fa’atinoina ai galuega lelei mo nai o tatou aiga,” o le saunoaga lea a Masalosalo, ma ia fa’amatala ai se tala na tali e ai le aofia e fa’atatau i lona to’alua, ina ua o atu le isi aulotu e piki mai le latou oka o Teu mo le malumalu e 4 ua uma ona fa’atonu na te tuiina, peita’i o lona pisi tele na mafua ai ia te ia ona galo le tuiina o teu.

Ae o le itu na te’i ai ina ua fa’ailoa atu e lona to’alua ia te ia, e aua le popole ua uma ona piki le oka o teu a le aulotu, ina ua ia nofo lava ia ma tui teu lapopo’a e fa.

“E ui e lei maua se tusi pasi a si o’u to’alua i le tuiina o teu, ae o lona manatu e fa’aaoga tatau lona taimi mo le ma aiga, na mafua ai loa ona tago ma tui teu e fa a le aulotu, pau le itu e malie ai, e le i o o mai se tau o teu ia te a’u, na teu lava e ia,” o le saunoaga fa’a ‘ata ‘ata lea a Masalosalo na fa’ate’i ai le au fa’au’u.

O ni isi o auala na faavae ai i luga aoaoga a Masalosalo e pei ona ia taua, o le taumafai lea e faaaoga mea o lo o maua lava i le siosiomaga e tui ai teu, nai lo le naunau e su’e mai mea taugata ma tele tupe e alu ai.

Na taua e le tina o Tuna Tafeamali’i e fa’apea, talu ona soifua mai i lenei lalolagi, faatoa ia iloa lea e mafai fo’i ona fa’aaoga le taumi ma le au loso loso o lo o taatitia solo i lalo o niu e tui ai le teu.

“O a’u ua ofo i le aoga lenei, ua o o lava i vaega tatou te manatu e le mafai ona tui ai se teu, a o lea ua ou iloa nei e mafai lava ona maua mai ai se teu fugalaau matagofie,” o le saunoaga lea a Tafeamalii e fai ai o ia ma sui o le vasega faauu e fa’afetaia ai le faiaoga ma le matagaluega, e tusa ai o lenei aoaoga taua ua mafai ai ona latou maua isi agavaa faaopoopo, e maua ai galuega e tausi ai aiga ma maua ai tupe e ala i le faatutu o ni pisinisi.