I le tapunia ai o le Fonotaga lona 28 a atumotu o le Pasefika i le aso ananafi, lea sa talanoaina ai mataupu eseese e fa’atatau i puipuiga o le siosiomaga, na mafai ai ona fa’apupula e ni isi o Matua o Faiva mataupu e fa’atatau i le faigofie lea ona a’afia atumotu o le Pasefika i Fa’alavelave Fa’alenatura.

Na taua e Espen Ronneberg i lana folasaga e faapea, o ni isi o a’afiaga o loo fa’aauau pea ona fetaia’i ma atumotu eseese o le Pasefika i tausaga ta’itasi, o le a’afia lea o i latou i fa’alavelave fa’alenatura, ma avea ai ma itu e umi ai se taimi o feagai pea atumotu na aafia ma faafitauli i o latou siosiomaga, fa’atoaga ma atina’e.

Mo se fa’ata’ita’iga o lenei talitonuga e pei ona fa’amanino atili e Ronneberg e fa’apea, afai ae tula’i mai se afa ma a’afia ai se atunu’u, e le gata o le a a’afia ai se vaega tele o ana fa’atoaga, ae faapena fo’i i lona siosiomaga, e oo lava fo’i i le palapala o le a tafea i le sami i le malosi o tafega ma lologa.

“O le mea moni, soo se afa lava e o mai fa’atasi ma timuga, lologa ma tafega tetele, ona aafia ai loa lea o se vaega tele o le siosiomaga e aofia ai ma le soifua o le tagata,” o se vaega lea o le saunoaga a Ronneberg i lana folasaga.

Na taua e David Helweg, PhD i lana folasaga e fa’apea, talu ai e eseese foliga o atumotu o le Pasefika, e foliga mai ai o atumotu pito maualalalo, o i latou ia e muamua lava ona latou lagonaina le matuia o suiga o le tau.

O ni isi o ia suiga e aofia ai le siisii i luga o le maualuga o le suasami, fa’atupulaia o le vevela o le sami, atoa ai ma a’afiaga e mafua mai i galuega o loo faatinoina e tagata.

Ae na fa’amanino e le susuga a Henk Rogers e faapea, o suiga o le tau e mafua mai i le fesuisuia’i o foliga vaaia o le natura ua i ai, talu ai le tele o aafiaga o le siosiomaga ua i ai ona o galuega sa faatinoina e tagata soifua.

E talitonu le susuga a Rogers, afai ae fa’atupulaia pea galuega e fa’atinoina e tagata soifua i luga o le laueleele, o le a fa’aauau pea ona fetaia’i atumotu o le Pasefika ma a’afiaga i fesuiaiga o le tau, ea ma le siosiomaga.

O le aso ananafi na fa’amuta aloaia ai lenei fonotaga, ma ua amata nei ona toe taliu atu i fanua sui usufono sa maua le avanoa e mafuta mai ai e auai i lenei fonotaga.