Ua taunu’u i le teritori ‘au soka malolosi a le Atu Solomona ma Vanuatu mo le ta’amilosaga Soka U17, lea ua saili mai iinei le siamupini fa’avaomalo a le Oceania. Ma ua fa’atulaga e talimalo ai Samoa na lua.

O le vaega muamua o le ta’amilosaga ua vaelua lelei i ai ‘au soka fa’avaomalo a atumotu e 11 ua aofia i lenei ta’amilosaga, lea o le a tausinio i Samoa Tuto’atasi e aofia ai: Niu Sila, Papua Niu Kini, Fiti, Atu Kuki ma Samoa.

O le Vaega Lua o le ta’amilosaga o le a tausinio ai ‘au nei i Amerika Samoa: Vanuatu, Solomona, Tahiti, Tonga ma Amerika Samoa.

O ta’aloga uma e faia iinei toe ta’aloga o le sailiga o le siamupini, lona uiga, a mae’a tala’oga amata i Samoa, ona malaga mai lea o ‘au e lua pito i luga taumafaiga e sailia le siamupini i le teritori.

O ta’aloga uma e amatalia ia Ianuari 13, ae fa’ai’u uma ia Ianuari 26, 2015. O lona uiga o ta’aloga o le sailiga o siamupini e toe tatalia ai ‘au e lua pitoaluga e ulufale mai Samoa, ae faia ai ta’aloga o le siamupini i le aso 24 i le fa ‘au pitoaluga, ae 25 mo le sailiga sa’o o le siamupini o le Soka U17.

O nisi ‘au o le a vave tuua Amerika Samoa pe tusa o le aso 22 o Ianuari, pe a mae’a ta’aloga ae le manuia le latou taumafaiga i le fa’agasologa o le taamilosaga.

Mai nei ‘au uma e tauva, na mulimuli lava ofi i totonu Amerika Samoa i le Soka ma avea ma totino o le FIFA.

O lo’o fa’amautu uma  ‘au soka tauva i le faletalimalo a le Tradewinds i Ottoville, ae o sui o le FIFA OFC o le a alaala uma i le Sadies By The Sea i Utulei. O koleniga e faia i malae i Kanana Fou e fetogia’i ai latou fa’ata’ita’iga fa’apea ai ma le Stadium i Tafuna aua o lo’o tulata i lo latou nofoaga o alaala ai.

O aso ma taimi e to’ai taunu’u mai ai ‘au soka ua mae’a fa’ailoa mai mo ‘au soka o totoe; Tahiti o le taeao o le aso Sa itula e 10:00 ae o le ‘au mai Tonga e taunu’u  i le  taeao o le aso Gafua i le itula e 8:00.

O ‘au e lua e malaga mai Samoa mo le toe vae o le ta’amilosaga ma o ta’aloga fo’i ia e saili ai le Siamupini U17 OFC Soccer e tatau ona o’o mai ia Ianuari 21, 2015.

I le taliga o le taunu’u mai a Vanuatu, sa fa’atasi sui o le Ofisa Autu o le FIFA i Amerika Samoa i le malae va’alele, sa fa’aula i latou ma tufa atu le niu malulu e fa’ailoa ai le agaga talimalo lelei.

Ina ua talanoa atu i le ali’i Fa’atonu o le ‘au soka a Vanuatu ia Mermer Etienne, i sona lagona e tusa ai o le taamilosaga, ae ata ma fai mai, “Su’e ane se isi ‘au ma te pigi i le ta’aloga faitaulia o le siamupini! E le o fa’ataga sau Vanuatu, e fili i le afi le ‘auro i nei ituaiga o fa’agatama.”

“Afai e moni lau tala, e le fa’avaivai fo’i le matou ‘au i Amerika Samoa nei, o lona uiga e uma lava i’inei le sailiga o le siamupini,” o se fetufa’iga pu’upu’u lea i le va o le tatou nusipepa ma le ali’i fa’atonu o le ‘au a Vanuatu.

Ua fa’alauiloa mai e ia, e le mafai ona ia fa’ailoa maia ni ana tama fa’amoemoeina, leaga o ana tama uma lava e 20 ua ‘aumaia, e fa’amoemoeina uma lava, “E lelei uma fo’i i so’o se tulaga o le soka e ta’alo mai ai, po’o le kiki fa’asikoa po’o le ulu e fa’asikoa ai le polo, e tutusa uma lava le 20 lea ua aumaia mo le siamupini ia toe fo’i atu ma Vanuatu.”

I le au a Vanuatu sa taunu’u i le aso ananafi ae o Solomona i le aso Lulu.