Ua manino i le ripoti a le faigamalo lea ua tauaao e le Fono Faitulafono, le fa’atupulaia o le aofa’i o pisinisi ma tagata lautele o le atunu’u ua fa’amanuiaina i le polokalame a le “American Samoa Nutrition Assistance Program” (ASNAP), lea o lo o i lalo o le Matagaluega o Auaunaga ma Tautua Lautele (DHSS), o lo o fa’atupe mai e le malo feterale.

Mo se fa’ata’ita’iga e pei ona taua e le afioga i le ali’i kovana ia Lolo Matalasi Moliga i lana ripoti, e le gata sa fa’aopoopo e le feterale fa’amanuiaga tau tupe mo le lata i le to’a 5,000 o tagata o lo o agava’a i le polokalame mo le tausaga e 2014 na te’a nei, ao lea fo’i ua fa’amaonia le fa’aopoopo o le isi $160,000 i le vaega tupe o le polokalame mo le tausaga tupe lenei 2015.

E tusa ma le $6.5 miliona le vaega tupe sa fa’atupe ai e le feterale le polokalame o lo o fa’atautaia e le ASNAP i le 2014 mo le aofa’i e 4,483 tagata, peita’i o le tausaga tupe lenei 2015, ua si’itia atu ai i le $7.8 miliona le vaega tupe atoa ai ma le lata i le to’a 5,000 tagata o le atunu’u ua fa’amanuiaina ai i vaega eseese o lenei polokalame.

O i latou o lo o agava’a i lalo o le polokalame e aofia ai tagata matutua, tagata e maualalo le tamaoaiga, atoa ai ma i latou e i ai manaoga fa’apitoa o le tino ma le mafaufau, lea e tatau ona avea i latou ma sitiseni o le malo tele, Nesionale o le Iunaite Setete, po o ni isi fo’i mai fafo ua agava’a i lalo o le tulafono lo latou aumau i Amerika Samoa, e pei ona taua i le ripoti a le ali’i kovana.

“O le tausaga fo’i na te’a nei na fa’aopoopo ai e le feterale ponesi ta’i $90 i luga o fa’amanuiaga o pepa taumafa (food stamp coupon) e masani ona maua e i latou o lo o agava’a i le polokalame a le ASNAP, o le ata va’aia lea o le tele o fa’amanuiaga o lo o agava’a ai nai o tatou tagatanu’u”, o le saunoaga lea a le ali’i kovana.

I lalo o le polokalame a le ASNAP, e 114 pisinisi lotoifale ua mae’a ona fa’amaonia le agava’a ai, mo le talaina ai lea o pepa taumafa, i le mae’a ai lea ona fa’amaonia e le polokalame aiaiga ma tu’utu’uga uma o le fa’atautaia o le latou auaunaga.

E ese mai i le polokalame a le ASNAP, e silia fo’i i le 6,000 le aofa’i o le mamalu o le atunu’u o lo o agava’a i lalo o le polokalame a le “American Samoa Women, Infants and Children Program” (ASWIC).

O le polokalame lea e pei ona lau silafia e le atunu’u, o lo o i lalo o le fa’atautaiga a le DHSS, o se polokalame fo’i e 100% lona fa’atupeina e le vaega a le “United States Department of Agriculture” (USDA).

I le tausaga tupe na te’a nei 2014, e to’a 6,500 i latou sa fa’amanuiaina ai, ma o lo o fuafua e ono fa’aopoopo le aofa’i o i latou e agava’a i lalo o le polokalame i le tausaga tupe lenei 2015.

E $6.3 miliona le vaega tupe sa fa’aalu i taumafa ma oloa sa fa’atau mai i pisinisi e 34 ua lautogia i lalo o le polokalame i le 2014, ma ua fa’amoemoe e ono fa’aopoopo le aofa’i o pisinisi e agava’a i le polokalame i le tausaga lenei.

O le polokalame lona tolu o lo o fa’atupe e le feterale ua to’atele ai fo’i le atunu’u ua faamanuiaina ai, o le polokalame a le “Child Care Services”, lea ua silia i le 13 tausaga talu ona fa’amanuiaina ai Amerika Samoa, e fesoasoani ai i aiga e vaivai le tamaoaiga e avatu ai a latou fanau e tausia i nofoaga fa’apitoa, ae o matua e faigaluega.

O ni isi o auala ua fa’amanuiaina ai le atunu’u i lalo o le polokalame lea, e le gata o lo o ofo atu e le Ofisa o le DHSS aoaoga mo i latou o lo o galulue i le tausiga o fanau, ae o se avanoa fo’i lea e maua ai e fanau le avanoa e a’oa’oina ai i latou a’o laiti, ina ia vave ai ona latou silafia aoaoga eseese ao lei ulufale atu i faleaoga.

I le tausaga e 2014, e to’a 802 fanau aoga mai aoga e to’a 492 na auai i le polokalame lenei, lea sa aoaoina ma tausia i nofoaga eseese e 34 i totonu o le atunu’u, ma e toa 220 i latou o lo o faa faigaluegaina nei.