Ads by Google Ads by Google

TO’ATELE SUI TA’ITO’A 7 SAMOA TAALO KALAPU FAFO

E toatele sui o le au taitoa 7 a Samoa ua maua avanoa e taalo ai i kalapu lakapi i vaega eseese o le lalolagi, e pei o Niu Sila, Europa faapea ai ma Aferika i Saute.

O ni isi o i latou nei sa tulimata’i i ai le toatele ina ia toe auai i le au taitoa 7 a le atunuu, peitai ua maua avanoa e taalo ai i a latou kalapu fou e aofia ai Faatoina Autagavai lea ua taalo nei mo le kalapu a Northland, Niu Sila, o Mikaele Pesamino i le kalapu a Sales Shark i Europa, o Fautua Otto ma Alafoti Faosiliva i le kalapu a Bristol i Europa, Ofisa Treviranus i le kalapu a le London Irish, ma Paul Perez i le kalapu a le Eastern Province i Aferika i Saute.

O ni isi o sui tuai o le au e le’i mafai ona filifilia i le ulua’i taamilosaga a le IRB mo lenei tausaga i Ausetalia, e mafua mai i manu’a o lo o aafia ai i latou.

ALAFOTI FAOSILIVA

E lua tausaga le umi o le konekarate a le susuga Faosiliva lea ua saini nei ma lana kalapu fou o le Bristol. O lana ulua’i taaloga e pei ona ripotia mai i se pepa o faamatalaga mai le kalapu lakapi, na sikoa ai Faosiliva.

O lo o taalo o ia i le tulaga o le numera 8 mo lana au i le taamilosaga o lo o faagasolo i le taimi nei.

Na taua e le faiaoga o le au ia Liam Middleton i se pepa o faamatalaga e faapea, o Faosiliva na filifilia mai i le tulaga mataina o lana taalo i le au taitoa 7 a Samoa.

FAUTUA OTTO

Ua toe sainia nei e Fautua Otto ma le kalapu a le Bristol i Peretania le isi lua tausaga e taalo ai Otto mo lana kalapu.

O Otto o lo o taalo i le tulaga o le center, o lo o taalo faatasi ma le susuga ia Alafoti Faosiliva. E ui i le tulaga mataina o lana taalo i le au taitoa 7 a Samoa, ae o le taamilosaga o le Ipu o le Lalolagi i Niu Sila i le tausaga na te’a nei, na filifilia mai ai o ia e le alii faiaoga o Liam Middleton e taalo mo lana kalapu.

MIKAELE PESAMINO

Ua sainia nei se konekarate a le kalapu lakapi o le Sales Sharks i Peretania ma le uigi saoasaoa a le au taitoa 7 a Samoa, le susuga ia Mikaele Pesamino.

O Pesamino na avea ma tama taalo o le taamilosaga taitoa 7 a le IRB World Series i le 2009/2010, o le tausaga foi lea na siamupini ai Samoa i lea taamilosaga, ina ua ia maua sikoa e 56 i le taamilosaga atoa.

Na taua e le faiaoga a Sales o Mike Brewer i se pepa o faamatalaga e faapea, o le aofia ai o Pesamino i le lisi o lana kalapu, o se laasaga lelei lea mo le siitia o le tulaga lelei sa i ai lana au i taamilosaga ua mavae atu.

PAUL PEREZ

O le masina na te’a nei na saini ai le konekarate a le alii o Paul Perez ma lana kalapu lakapi fou i Aferika i Saute, le Eastern Province, ma ua taalo ai nei mo le tulaga o le uigi.

O lana ulua’i taaloga mo lana au na ia maua ai le ulua’i sikoa o le taaloga i le ulua’i 3 minute talu ona amata le taaloga, ma manumalo ai lana au i ai e 49-6 a le kalapu a le Boarder.

Na maua le avanoa e taalo ai Perez ma le kalapu a Toulon i Farani, peitai o le faaletonu i lona visa na le mafai ai ona malaga o ia, ae valaaulia mai loa e lana kalapu fou i Aferika i Saute.

Na faaalia e Perez i vaega faasalalau e faapea, e mata’utia atu le tulaga o lo o i ai le lakapi i Aferika i Saute nai lo Niu Sila, le nofoaga sa taalo lakapi muamua ai mo lana kalapu o Taranaki.

FAATOINA AUTAGAVAIA

O le susuga ia Faatoina Autagavaia ua taalo nei mo le kalapu lakapi a Northland i Niu Sila i le tulaga o le fulupeki, i le maea ai lea ona sainia o sana konekarate e 2 tausaga.

E ui o Autagavaia sa taalo i le laina i luma mo le au taitoa 7 a Samoa, peitai o le filifilia ai o ia i le au a le atunuu na malaga i le Ipu o le Lalolagi ma taalo ai i le tulaga o le fulupeki, na mafua ai loa ona filifilia o ia e lana kalapu ua taalo ai nei.