E to’atele ni isi o tagata faigaluega i pisinisi ma kamupani tua i le atunu’u ua latou fa’aalia i le Samoa News o latou lagona le fiafia, ona o taumafaiga a ni isi o ta’ita’i o le atunu’u e fa’amautu fuafuaga e taofi ai le si’i o le isi .50sene i totogi amata, lea e pei ona fuafuaina i le aso 30 Setema 2015.

O finagalo o ni isi o tagata faigaluega e pei ona faailoa mai i le Samoa News, na fa’avae mai lea i luga o le feiloaiga a le Senate ma le Tama’ita’i Faipule mai Uosigitone i le vaiaso ua te’a, lea na fa’aalia ai e Aumua Amata lona lagolagoina o le manatu e tatau ona si’i totogi amata, peita’i e i ai lona talitonuga e le tatau ona vavevave i ai le malo i lea tulaga, ae tatau ona fa’ateletelegese, fuafua lea i le tulaga malosi o loo i ai le tamaoaiga a le malo.

E fa’apena fo’i i finagalo o le to’atele o afioga i Senatoa sa maua le avanoa e tulei saunoa ai i lea feiloaiga, sa latou taua ai lo latou lagolagoina o le finagalo o Aumua, ina ia fa’ateletelegese le si’iina o totogi amata.

Na taua e ni isi o tagata faigaluega i le atunu’u, “e le o se alofa moni i tagata faigaluega o le atunu’u” le fa’apea mai, “e tatau ona si’i totogi ae le o le taimi lenei.”

“Afai e le finagalo ta’ita’i o le atunuu e sii totogi amata i le taimi lenei, o afea la e manatu ai e sii i luga totogi amata. Afai fo’i e le mafai e ta’ita’i o loo tula’i mai i le taimi nei ona latou faia lea tulaga o le faataga o siitaga o totogi amata, o ai la se isi ta’ita’i e mafai ona ia faia lea tulaga mo Amerika Samoa,” o ni isi ia o manatu sa mafai ona fa’aalia e nai tagata faigaluega i le atunuu o loo totogi i totogi amata e fa’atatau i lenei mataupu.

Na taua e le tina o Maletina Ifopo, ua 15 tausaga o galuega i se tasi o kamupani i le atunu’u e fa’apea, e le taitai lagolagoina e ta’ita’i o le atunu’u le si’i o totogi amata, ona e le o latou ma latou aiga ia e a’afia ai.

“O lenei lava e matitiva ma pagatia tagata lima vaivai e pei o a’u lenei, tele tausaga o o’u faigaluega i le kamupani i lenei lava tama’i totogi, ae o le kamupani lea e fa’alagolago malosi i ai le malo mo tupe maua,” o le saunoaga lea a Ifopo.

“E fa’afefea ona fai mai e le gafatia e le tamaoaiga o le malo ona totogi siitaga o totogi amata, ae se’i vaai i totogi o le to’atele o Fa’atonusili, tagata faigaluega maualuluga a le malo faapea ai ma tagata faigaluega a le Fono Faitulafono o loo totogi i tupe lotoifale, afai e moni le manatu e tatau ona sii totogi amata, ua tatau i le malo ona fai se isi auala e sii ai totogi amata mo i matou nei o loo fa’atinoina galuega mamafa i le kamupani,” o le finagalo fa’aalia lea o Ifopo.

Na taua e le tama e 54 tausaga le matua o lona soifua, ae ua 22 tausaga le umi o lana tautua i se tasi o kamupani tua i le atunu’u e fa’apea, talu mai lava le ulua’i taimi na pasia ai e le Konekeresi a le malo tele le tatau lea ona si’i totogi amata i Amerika Samoa e oo mai i le taimi nei, e le o fa’amaoni lava ta’ita’i o le atunu’u i a latou fa’aupuga e fa’atatau i le sii o totogi amata.

Sa ia taua e fa’apea, “pau le tulaga lea e maitauina e matou o loo totogi i totogi amata, e na o folafolaga ma fa’aupuga fa’alele fai mai se’i vaavaai le malo poo le a se auala e mafai ai ona fesoasoani i totogi amata, ae e oo mai lava i le taimi nei e leai ma se gaioiga a le malo o faia.”

“Ana ua gaioi le malo e fai sana gaioiga e fa’asao ai tupe lotoifale mai le soona fa’aaoga i auala le tatau, ae fa’asao sina vaega tupe e totogi ai siitaga o totogi amata, ua leva ona manuia tagata lima vaivai,” o le saunoaga lea a Mark Utulaelae, o se tama ua 12 tausaga o galue i se tasi o kamupani tua i le atunu’u.

Na fesiligia o ia e le Samoa News e fa’alautele lona finagalo, poo auala na te manatu e tatau ona faia e le malo e fa’asao ai tupe lotoifale mai le soona fa’aaoga le tatau, ae na tali le susuga a Utulaelae, e tele naua auala e mafai ona faia e le malo.

“Mo se fa’ata’ita’iga, taofi le toe soona fa’aalu o tupe lotoifale i polokalame le aoga e pei o tupe o loo tufa i ausiva i le taimi o le fu’a, tupe o loo ave mo tuuga fautasi, ta’aloga kirikiti, e leai ma se lumana’i o le malo e maua mai i polokalame ia,” o le saunoaga lea a Utulaelae.

Ae na taua e isi tina e to’alima (5) e galulue i se tasi o kamupani i’a e fa’apea, afai e le gafatia e le malo ona fa’atupe totogi amata mo tagata faigaluega uma o loo aofia i totogi maualalo, e manaia fo’i ae amata mai le sii o totogi amata i nai tagata faigaluega ua silia i le ta’i 10 tausaga ma luga atu o galulue i kamupani tua, atonu e faigofie atu ai lena i le malo ona fa’atupe, nai lo le vaavaai i tagata faigaluega uma lava o loo totogi i totogi maualalo, ona latou fa’aaoga lea o le numera e fai mai alofaga e faapea e le gafatia e le malo ona saili mai se fia miliona e fa’atupe ai totogi o tagata nei.

Na taua e Aumua Amata i luma o le Senate e fa’apea, i lona talitonuga, e sili atu le maua o si tama’i siaki nai lo le leai o se totogi e maua.