O alo nei o le atun’u e toafa i latou ua mae’a fa’au’uina mai i le Fort Jackson i Columbus, South Carolina, i le vaiaso na te’a nei, Iulai 23, 2015. Ma ua fa’ailoa mai fo’i o latou agaga fiafia i o latou aiga, ona ua i’u manuia taumafaiga i vaega a le militeri ma ua fa’asolo atu nei e fa’atino o latou tiute i nofoaga ua tofia i ai.

PFC Lauofo, Britney

O le tasi o tama’ita’i Samoa o lo’o alaala tumau i Hawaii ma lona tina o Jennifer Lauofo, ua mae’a nei lana BCT sa auai mo le 3 masina, ona soso’o lea ma lana AIT sa aotauina ai mo le isi 10 vaiaso lea ua fa’ai’u ma le manuia taumafaiga, ma ua pasi lelei ma fa’au’u ai ia Iulai 23, 2015 i le fa’au’uga tele sa faia i Fort Jackson i Columbus, South Carolina.

O lana tala mai, “Fa’afetai i si o’u tina peleina mo lau tapua’iga mau. Fa’afetai i tatalo sa e si’itia fa’atasi ai ma o’u aiga uma i Samoa se’ia pa’ia Hawaii ma fa’asolo mai ai i le Iunaite Setete. Ua matou maua le malosi fa’aletino ae maise le fa’aleagaga e tumau ai, tapena ma a’otauina mo nei faiva ua tofia ai, ona o lo outou fa’amalosi’au mai. Fa’afetai i le Atua mo le Ola ma le Malosi. O la outou pule lea.”

SPC Afuola, Germaine

O le tama’ita’i fitafita o SPC Afuola, Germaine, o lo’o galulue ona matua o le Fa’afeagaiga ia Manino Afuola ma le faletua o Tofa Afuola, lea fo’i ua fa’au’u mai, ina ua mae’a lana BCT mo le tolu masina, soso’o ai ma lan AIT mo le 10 masina i Fort Jackson i Columbus, South Carolina.