Na togi i fafo e ni isi o le atunu’u o lo o fai ma a latou vaisu le ulaula tapa’a lapataiga ma fautuaga mai le Vaega o le Soifua Maloloina ina ia taofi le ulaula tapa’a, atoa ai ma taumafaiga a le malo e fa’amuta le ulaula tapa’a o le atunu’u, e ala i le si’i maualuga o le lafoga o le sikaleti e pei ona pasia e le Fono i le masina o Aperila na te’a nei.

Na taua e le to’atele o i latou e ulaula tapa’a i le Samoa News, ina ua fesiligia ina o latou lagona e tusa ai o nei taumafaiga uma, “o le ulaula tapa’a, o le latou aia tatau lea na aumai e le Atua e filifili ai i so se fa’aiuga matou te faia i le olaga nei.”

“Ou te fiafia ou te ulaula tapa’a, na ou ulaula mai lava fa’atoa 19 o’u tausaga, o lenei ua 42 o’u tausaga o lea lava ou te ulaula, ma o se gaioiga ou te fiafia i ai, e fa’apasi ai le taimi faigaluega ma aso o le olaga.” o le saunoaga lea a se tina e galue i se tasi o pisinisi i le Samoa News.

Ina ua fesiligia o ia pe le o popole i lona soifua maloloina, aemaise ai gasegase e pei o le Kanesa lea ua valoia e foma’i, e mafua mai ona o le vailaau oona o loo i totonu o le sikaleti, na soisoi le tina ma fa’apea mai i le Samoa News, “ua ou fiu e taofi la’u ulaula tapa’a - pau lava o se mea ua ou fiafia e fai i lenei olaga, o la’u aia tatau fo’i lea.”

E to’alua isi ali’i e faigaluega i Ofisa eseese a le malo sa la fa’ailoa i le Samoa News ananafi e fa’apea, poo fea lava e sii i ai e le malo le tau o le sikaleti, la te ulaula pea lava.”

“Ou te fiafia ou te ulaula, o se gaioiga ua fiafia i ai lo’u loto, o le mafua’aga fo’i lena ou te faigaluega ai e saili se tupe mo lo’u aiga ma fa’atino ai mea uma ou te mana’o ai e aofia ai ma le fa’atauina o la’u pepa sikaleti,” o le saunoaga lea a se tama e le’i finagalo e fa’ailoa lona suafa.

Ae ina ua fesiligia e le Samoa News le isi o i laua nei, i sona lagona e fa’atatau i se tasi o talitonuga fai mai, a si'i le tau o le sikeleti ua to’alaiti le aofa’i o tagata ulaula tapa’a, na taua e lea ali’i e fa’apea, o lea talitonuga e matua leai lava se fa’avae.

“Tusa lava pe sii le tau o le sikaleti e ulaula pea lava tagata, e le tatau i le malo ona latou fausia ni tulafono e taofia ai aia tatau o tagata, o loo tatou i ai i se faigamalo sa’oloto,” o le molimau lea a lea ali’i.

Ae ina ua fesiligia pe faapefea lona soifua maloloina lea o loo naunau mai ai le malo e si'i le tau o le sikaleti, ina ia fa’aitiitia ai le au ulaula tapa’a, na tali le molimau, “o la’u lava filifiliga ma la’u aia tatau lea ou te ulaula ai.”

E ui o lea ua amata ona si’i le tau o le pepa sikaleti i ni isi o faleoloa i le atunu’u, ae foliga mai e le o fa’avaivai lava ni isi o le atunu’u mai lo latou fa’atauina o le silaleti.

Na taua e ni isi o sui Sinia o le Matagaluega o le Soifua Maloloina i le Samoa News e fa’apea, o le agaga atoa o le malo ma le Soifua Maloloina, e le o taumafai e taofia faaiuga saoloto e fiafia i ai tagata, ae o le manatu ina ia soifua maloloina tagata uma o le atunu’u.

“Afai e to’atele tagata ulaula tapa’a, lona uiga o le a to’atele fo’i tagata e a’afia i gasegase eseese, ma tele ai galuega a foma’i e fai, tele atu ai ma tupe a le malo e alu i le fa’atauina mai o vailaau, ae a ola soifua maloloina tagata uma, ona sefe fo’i lea o tupe e fa’atino ai isi manaoga aoga mo le atunu’u,” o le saunoaga lea a Iutia Luatua i le Samoa News, o se sui lea o le Vaega o le Tete’e atu i le Ulaula Tapa’a i le atunu’u.