O le tina o Viktoria Fenech, lea ua fa’apu’upu’uina o Viki, ua i ai nei i le, ma ua molimau mai, “Amerika Samoa, o se motuitiiti sa ou ola a’e ai, o lo’u nu’u moni, ia te a’u lava ia. O le tele o mea ou te manatua, ua ou toe va’aia, ma e maligi ai o’u loimata, sa ou fa’apea ou te le toe o’o mai i’inei.”

O lona mana’oga fa’apitoa i aso uma, sa ia talanoa i le tele o taimi i lana fanau, fa’ailoa i ai mea e latou te faia ma ana uo, ae maise uo a lona uso matua o Toni Fenech ma lona tuagane o Skipper Fenech.

O le lisi o nei uo sa maua ane ai suafa nei: Joan Latasi Galea’i-Holland o Leone, Joseph Iuli, Betty Spencer-Brittle, Snooky Reid o Pago Pago, Francis Pace ma le tina matua e matua manino lelei lona fa’aleoga o le igoa, “Fa’auila” sa faigaluega e va’aia i latou, fa’atasi ma le fanau a Mabel ma Peter Reid Sr.

O le atoaga lenei o le 70 tausaga o Viki Fenech, ua manatu ai lana tama matua, David Fenech, e toe fa’ao’o mai Viki i le motu o lo’o moemiti i ai i lona olaga atoa. “Ou te le’i moemiti o le a faia e la’u tama lenei meaalofa, i le atoaga o lo’u 70 tausaga, ua mafai ai ona ou toe tuvae i le nu’u o a’u miti a’o o’u la’ititi, e fili e Fa’auila mai Aua, ma lona uso o Sera, o lo’u ulu e fililua lava e Sera ma ua avea ma mea e maitau ai a’u e le to’atele o tagata.”

O matua o Viki, Toni ma Skipper o Dr. Nicholas Fenech, o se tagata Italia, ma lona to’alua o Patricia Fenech e mumu lona lauulu ma e to’atele tagata Amerika Samoa latou te matauina o ia i lona lauulu lea. O ia o le tama’ita’i tausima’i i le falema’i lea e foma’i ai lona to’alua i Utulei.

Ua maua le so’otaga o lana malaga, ina ua talanoa mai Viki i le Samoa News, sa iloga ai nei uo mamae lea na te lisia mai. O Joseph Iuli ua maliu peita’i ua maua le avanoa e talanoa ai ma le tama’ita’i o Trudy Iuli, lona tuafafine. Ua maua fo’i le avanoa e talanoa ai ma Joan Galea’i Holland, o se tasi o uo mamae a lona uso o Toni i lena vaitaimi, ma ua tele nisi fa’amaumauga ua ia maua e tusa o tagata sa ia iloa mai lona la’ititi a’o tuputupu a’e iinei.

“Ou te ta’ele i le sami o Alega, ina ua ou tu i le Tisa’s Barefoot Bar i Alega, sa ou fai lava i la’u tama, o iinei sa matou ta’e’ele ai ma le fanau a Peter Reid ma Mable. Na toetoe lava a tafea mamao ai lo’u tama i gatai i le a’ave tele o le sami,” o sana tala lea ma le fiafia.

“O le mea muamua na fa’afeiloa’ia a’u i lo’u aga’i mai i totonu o le taulaga mai le malae va’alele, o le motu e pei o se teufugala’au o Fatu ma Futi. O le pine fa’amau e le’i ave’esea mai lo’u mafaufau, aua o lo’o o’u nofo lava ma le ata o ia motu i lo’u tusi ata uma o Amerika Samoa,” o lana tala lea a’o maligiligi ifo ona loimata o le fiafia.

Ua mae’a talanoa fo’i ma Betty Spencer-Brittle, ma ua fa’ailoa i ai e Betty e sili ona sau i le Samoa News e fa’ao’o mai i ai ana ata e fa’asalalau ai, ma ia maua vave ai se so’otaga.

“Ou te le misia Amerika Samoa i ni oa se tele sa ou ola ane ai, po’o ni taulaga fe’emoemoa’i ona moli felanulanua’i, ae o le alofa ma le fa’amasani gofie, o le ola fiafia, e leai se aso e galo ai ia te a’u, lo’u toe fia sau. Sa ou iloa lelei, lo’u fale sa nofo ai, o lo’o i lalo tonu lava o le fale o le Kovana sili, ae tuafale i le Uafu,” o se tala lea a Viki.

Sa ia fa’asino mai, o le nofoaga lea ua i ai nei le ECE Center, ma sa soso’o lava le latou fale, ma o falea’oga, e na’o le to’a valu, to’a 12 pe to’aono fo’i tamaiti a’oga i aso ta’itasi.

I lenei vaitaimi, ma le suiga tele ua i ai nei, sa ia fa’apea ai, “E le o suia ina ia leaga ai, ae ua suia ina ia fa’aleleia atili ai, ae le o avea ai lava le agalelei, fa’amasani, soifua fiafia, soifua fa’atasi o lo’o ua ou va’aia pea i lo’u nu’u, ou te ta’ua o lo’u aiga lava lenei,” o se ta’utinoga mautu lea a Viki ma lana tala, “Ou te toe sau fo’i, a o lenei tausaga, o le tausaga fou, ua avea lenei malaga, o se ta’imua i ni a’u malaga asiasi i tausaga o totoe o le soifua.”

Ua ia te ia le taleni matagofie o le oti ulu o tama’ita’i, ma teuteuga o foliga ia momosi atili, o lana pisinisi lea o lo’o ola sa’oloto ai, ma e to’atolu si ana fanau, ae tumau pea lona igoa, Viktoria Fenech, le tama’ita’i Amerika Samoa, “I lo’u fatu e le avea lea manulauti!”

I se tasi o ata o lo’o ia malaga mai ma ia, ua fa’aalia ai se ata o le ‘aiga o le fa’aipoipoga a le tama’ita’i Samoa o Mili Tau’ave, le afafine o le faife’au ma le ali’i papalagi Niu Sila, sa faigaluega i le Faletuitoto o le Falema’i o Dave.