Ads by Google Ads by Google

“SBIRT” - Polokalama Fesoasoani Fa’aaogaina

Toe Fa’aouina Tagata mai le Tagofia o Ava O’ona  ma Fuala’au Fa’asaina

Pe afai e te talavai i le falema’i i Tafuna, Leone po’o Amouli ma Faga’alu fo’i, pe a mae’a ona totogia lau talavai, ona e sau lea e fa’atalitali lou suafa e vala’au mai, o i’ina tonu lava e mua’i fa’afeiloa’ia oe e sui lautogia e fa’atalatalanoaina oe i se polokalame fou, “SBIRT” e fia maua ai ni fa’amaumauga muamua e uiga ia te oe, ma mea sa e taumafaina, pe le o se mea lea ua afaina ai oe, ua afua ai ona e asia le falema’i mo se talavai.

E le o se mea leaga le iloa patino e foma’i o mea uma lava na e faia, na e inumia ma e tausamia, ona o le taumafaiga ia sa’o lelei ona faia ou togafitiga, ia mautinoa e le o se mea fo’i o afaina ai lou loto ma lou mafaufau, ua afua ai ona e fa’alogoina se gagau o lou tino.

Peita’i o le polokalama lenei ua afua ona sapaia lelei e le Matagaluega o Tautua Lautele mo Alamanuia mo tagata o le atunu’u, DHSS, le Matagaluega o le Soifua Maloloina, Le vaega o Tautua mo le Fanauiti, le matagaluega o A’oga ae maise le Matagaluega o le Puipuiga o le Saogalemu Lautele, ona ua iloga mai, e ao lava ona mua’i faia lea ituaiga o su’esu’ega i le soifua o le tagata fa’ato’a taumafai ai se fesoasoani tau fautuaga mo ia, pe o se togafitiga fo’i mo ia, pe fa’asino fo’i ia te ia se isi vaega o tautua e agava’a ai, e toe fa’aleleia ni fa’aletonu o a’afia  ai lona tagata soifua.

Na fa’ataunu’u le Semina mo lea Polokalama Aoga tele i le aso Lulu i le Fale Laumei e afua mai le itula e 8:00 i le taeao se’ia pa’ia le itula e 3:00 i le afiafi, ma sa iloga ai, le talafeagai o lea polokalama ma le taumafaiga a le tatou malo i ona matagaluega o i luga, e tau fa’anofo filemu ma le saogalemu tagata uma o lo’o alaalata’i i le teritori o Amerika Samoa. 
“O lenei polokalama e mafai ona maua ai fa’amaumauga aoga tele, e mafai ai ona togafitia tonu lava gasegase o afaina ai tagata, ma iloa ai fo’i ni afuaga o fa’afitauli i totonu o aiga, ae maise o le maua ai fo’i e i latou o i ai a’afiaga tau le tagofia maumaua’i o le pia ma le ‘ava malosi ia tulaga, ma fa’aletonu ai le mafutaga fa’aleaiga i le tele o taimi e ala i misa, fe’ese’esea’iga ma tete’aga o mafutaga mafana i totonu o aiga.” O se tala lea a le tama’ita’i leoleo, sa avea ma sui o le matagaluega o le Puipuiga o le Saogalemu Lautele o le tatou atunu’u.

Sa i ai sui mai le Fono Faitulafono o le atunu’u i le Semina lenei, ua iloga mai, ua latou ta’utino, o le tagofia fa’alausoso’o o le ava malosi ma pia, fa’atasi atu ai ma le ulaula tapa’a, i le vaitaimi o talavou lava le soifuaga, ua avea ma afuaga o ma’i fita ua maua ai i lenei vaitau ua tagata matua, ua manatu e fia maua le malosi atoatoa sa i ai, ae ua fa’ato’a fa’aeteete ane, ae ua tele le afaina o le tino ma le soifua maloloina o mea sa faia a’o talavou ma o nofo a’oga.

“O lea ua outou va’aia foliga o le faia o lea tulaga, e le motumotu ae ua fa’alausoso’o, tuli le ‘ai a’o malosi ma ua avea ma mea ua vave po’ia ai tino i ma’i fita, ae o lo’o i ai pea le fia tautua male malosi atoatoa i le tatou atunu’u. Fa’afetai ua maua pea se avanoa, ae le o toe atoatoa le malosi sa tatau ona i ai.”

O nisi ua molimau fo’i, e moni lelei le polokalama, o nisi taimi e le fiafia ai pe su’esu’e atu pe tagofia le ava ma le sikaleti, ae pepelo i le foma’i ma e taumafai e saili le tonu o gasegase ma lona fa’apogai, ona sese ai lea o mea e togafitia e foma’i, ae o le sasi o ai? O oe lava!

E i ai sui o le fonotaga lenei sa avea ma fitafita o taua a le taotu malo i le Militeri, ua latou fa’amatala le soifuaga i totonu o le vaega au, e fa’amaoni i mea uma i totonu o tiute e fai mo le avea ai ma fitafita, ae maua loa se masele o le soifuaga ua malolo mai galuega, “O ia lava lena, oso loa le inuga latou, o nisi ua i’u lava ina motu ai ma le taula o le galuega, ma le maua uma ai ana mea na fa’amoemoe e maua i lona soifua galue i le militeri, aisea ua le mafai ona talia fautuaga, ua maumaua’i mana’oga sese i le tagofia so’o o le ava o’ona ma le pia, ae maise fuala’au fa’asaina.”

O le a’oa’oga fa’apitoa lenei, na auvasa mamao mai i latou e autu i ai lenei polokalama ina ia latou fa’aa’oa’o mai le latou sailiiliga o sou afaina, tapena se ala e mafai ona fa’afo’ia ai ou fa’afitauli po’o lou olaga po’o lou soifua maloloina, po’o lau amio ma sau masani fo’i, ia fa’ailoa ia te oe ni ala e fesoasoani ai e toe fa’aleleia atili sou mana’omia o i ai, ma ia e iloa, e tatau ona e soifua fuafua fa’atasi ma i latou uma e soifua feso’ota’i ma oe i so’o se mea, aiga, lotu, nu’u, ekalesia ma lau galuega.

O le susuga Paul Seale, MD o se ali’i foma’i fa’apitoa mo Aiga ma e faigaluega o ia i le falema’i i Georgia ma le Iunivesite o Mercer School of Medicine, o ia lea sa talanoa mai i mea e afua ai ona fa’aletonu mafutaga fa’aleaiga, ona o le ‘ese o le mea e fa’amuamua i ou mana’oga tutonu i lou loto e faia mo lou aiga.

O le ava malosi ma ona uiga tau fa’asese, e afaina ai le tele o totoga o le tino o le tagata, ma e a’afia ai au fa’ai’uga e faia, ma o le tele o taimi e maua ane le taunu’uga moni o au fa’ai’uga sese, e i’u lava i le ta’uvalea o lou tagata ma mamasagia ai si ou aiga!

O le tama’ita’i o Jennifer Kasten PhD o le SBIRT, o ia lea sa ia fa’apupula le tele o mea e mafai ona fa’atino e lea Polokalama mo tatou matagaluega uma lava o le a latou fa’aaogaina ta’iala mautu ma le aoga e mafai ai ona tau fa’amama mai afaina o tagata ta’ito’atasi ae maise mafuaga fa’aleaiga, ona o a’afiaga o le tagofia o le ava malosi, pia ma le ulaula fo’i.

Read English version of this story in 'More Healdines'