O le mae’a ai o le ulua’i aso lea na tufatufa ai taumafa vela a le Ofisa o Tagata Matutua mo tina ma tama matutua i le atunu’u, ua talosagaina ai loa e ni isi o i latou le tatau lea i le Ofisa ona va’ava’ai lelei i auala e tausi lelei ai tagata matutua, ina ia mautinoa le tulaga lelei pea o lo latou soifua maloloina.

Na taua e se tasi o tama matua e fa’apea, o le auala lea na faaaoga e kiliva atu ai taumafa ma toe tufatufa ai taumafa mo tagata matutua i le aso muamua o le polokalame, e le lelei i lana vaai.

“O a’u sa masani ona ‘ai i polokalame nei e tagata matutua pe a alu i Hawaii ma Amerika, e le fa’apea le auala e tufatufa ai taumafa mo tama ma tina matutua, e i ai lava tagata faigaluega ma fale’aiga e lautogia mo le fa’atinoina o le galuega, o le aoga lena o tupe na aumai e fa’atupe ai le polokalame, ae o le la’u mai o meaai i tua o pikiapu, toe lulu’u solo i lima o loomatutua ma toeaiina o lo o galulue i le TAOA meaai mo tama ma tina matutua, o se vaaiga e le lelei i lo’u mafaufau, ua tatau ai i le Ofisa o le TAOA ona toe va’ava’ai i auala e fa’aleleia ai le tausiaina o tagata matutua, ae afai e le mafai ona fa’atino, e sili ai loa pe a tu’u meaai vela ae toe fo’i i le pepa ai e $40”, o le saunoaga lea a se tasi o tama matua e le i finagalo e fa’ailoa lona suafa.

E talitonu ni isi o tama ma tina matutua, e tatau ona lelei ta’avale e kiliva ai taumafa i nofoaga ua lautogia mo le polokalame, ina ia mautinoa le saogalemu ma lelei mo tagata matutua.

“E tatau ona tofu le fale’aiga o lo o kukaina taumafa ma ta’avale lelei e pei o Van e kiliva lelei ai meaai, ae le o le kiliva i tua o keli o gei pikiapu e le o iloa atu po o toulu i ai ni pefu po o tulioso ai fo’i i totonu ni lago,” o le tomumu lea a le isi olomatua.

Fai mai ni isi o tagata matutua, afai o le polokalame lenei o lo o fa’atupe mai e le malo tele o Amerika, e tatau fo’i ona mulimulita’i Amerika Samoa i ta’iala uma o lo o aumai e fa’atino ai le polokalame, e pei o le mautu o tagata faigaluega e fa’atinoina le galuega, ma ia lelei fo’i le tautuaina o tagata matutua.

Ae na taua e le isi tina sa i ai i le nofoaga lea na tufatufa ai taumafa i Matu’u ma Faganeanea, e sili atu le lelei o taumafa sa tufa i le nofoaga autu i Pago Pago nai lo meaai sa tufa i le latou nofoaga.

“Sa ou vaai i le ata o le ipu meaai lea na sau i le nusipepa (ananafi) ma ou vaai ai, e sili atu ona lelei meai sa tufa i Pago Pago nai lo matou i Matu’u ma Faganeanea, e na o le 2 meetballs, alaisa, afa itu moli ma kapisi,” o le molimau lea a le tina.

O se tasi tina sa i le nofoaga i Matu’u sa ia fa’amaonia mai foi lea tulaga i ipu meaai, ma ia taua ai lona ofo i lea tulaga.

E le i maua se avanoa e feiloa’i atu ai i le Fa’atonusili o le TAOA ia Ale Tifimalae i le aso ananafi, ona sa pisi o ia i sana fonotaga ma sui o fale’aiga o lo o latou kukaina taumafa mo tagata matutua, e pei ona fa’ailoa mai e se tama’ita’i na taliina mai le telefoni a le Ofisa i le taeao ananafi.