E 12 Aoga eseese i le atunu’u ua fa’asala e le Matagaluega o le Soifua Maloloina ina ua maitauina le tele o fa’aletonu, ma ua faia ai fo’i ma le fa’aiuga, o le a le mafai ona tatala faleaoga ia mo le toe a’e mai o le fanau aoga, pe afai e le mafai ona foia fa’aletonu o loo tula’i mai ai.

O aoga e 12 ua taofi le tatalaina i le taimi e toe a’e ai aoga i le vaiaso fou e aofia ai aoga maualuluga e tolu e pei o Samoana, Pacific Horizon ma le South Pacific Academy, faapea ai aoga Tulaga Muamua e pei o Leone, Tafuna, Olomoana, Lupelele, Le’atele i Fagasa, St. Theresa, Peteli Academy, South Pacific Academy ma le aoga a Pago Pago.

E na o le lua lava aoga o loo tulaga lelei vaega uma, e pei ona fa’alauiloa e le Matagaluega o le Soifua Maloloina i luma o le Kapeneta i le vaiaso na te’a nei, o le Aoga Maualuga a le Nuuuli Votech fa’apea ai ma le aoga tulaga muamua a le SPICC i Fatu ma Futi.

O le tulai mai ai o lenei tulaga fa’aletonu i le tele o aoga a le malo faapea ai aoga tua, a o lea ua toe lua vaiaso a’e le tausaga aoga fou, ua talosagaina ai loa e le afioga i le ali’i kovana ia Lolo Matalasi Moliga ia Fa’atonusili ma Pulesili o Matagaluega ma Vaega Tumaoti uma a le malo, ina ia galulue i le vaiaso atoa lenei e fa’amama vaega o loo fa’aletonu i aoga ua taua i le ripoti a le Soifua Maloloina.

Na toe fa’atepa e Lolo lana Kapeneta e fa’apea, o le polokalame lea na ia fa’atula’i o le Fa’atama Fai e Ofisa o le malo o Aoga ta’itasi, o se polokalame e sili ona aoga mo fanau aoga, ae o lana asiasiga i le vaiaso na te’a nei i le tele o Faleaoga i le Tualauta, sa ia molimauina ai le tele o fa’aletonu o loo tula’i mai ai, e oo lava fo’i i Puleaoga ma Faiaoga, e leai sa latou galuega o faia e fesoasoani ai i le fa’aleleia o faleaoga ma potu aoga.

Saunoa atili le alii kovana i luma o lana kapeneta e fa’apea, ina ua ia fesiligia se tasi o Puleaoga pe aisea ua le teuina ai le faleaoga ma le lotoa, ae tali le Puleaoga, ua fai atu le Ofisa a le malo o loo gafa ma le fa’amamaina o le latou faleaoga, ua fa’asa mai e le Ofisa o le malo a le Feterale o loo aumaia tupe e totogi ma fa’atupe ai galuega a le matagaluega, ona toe o atu ni isi o le aufaigaluega e fa’amama le lotoa ma le faleaoga, ona e le o galuega ia na mafua ai ona aumai tupe e totogi latou e fai.

Na fa’ailoa e Lolo i le Kapeneta e fa’apea, e i ai lona talitonuga e le o se sui o le Ofisa mai Amerika sa faia le fa’atonuga lea i tagata faigaluega, ae ai lava o mafaufau ia o le Fa’atonusili o lea Ofisa, ma e ofo ai lona loto i le sese o mea o loo mafaufau i ai le Fa’atonu o le Ofisa lea.

“O le Faatonusili sa ia faia le tala lea, na te le o lagolagoina fuafuaga o loo taumafai atu e le malo mo fanau aoga, ae o mea ia o loo faia mo le lumana’i manuia of anau aoga a le atunu’u,” o le sauoaga lea a Lolo, ma ia fa’ailoa ai loa aoga e 12 ua taofi e le Soifua Maloloina ona tatala, ona o le tele o fa’aletonu o loo i ai.

Na fa’ailoa e Lolo i le Kapeneta e fa’apea, e i ai lona taofi talu lava ona amata mai le polokalame o le Fa’atamafai o Aoga, e i ai lava le Fa’atonusili e lei alu e vaai i le Faleaoga o loo galulue ai lona Ofisa.

Na fa’amalosi ‘au Lolo i lana Kapeneta ina ia galulue faatasi e fai se galuega lelei mo aoga a le fanau.

I ripoti mai le Matagaluega o le Soifua Maloloina sa fa’alauiloa i luma o le Kapeneta, sa taua ai le tele o fa’aletonu i totonu o faleaoga ua taofia nei ona tatala, ma o ni isi o ia fa’aletonu e aofia ai Faletaele, potu aoga, atoa ai ma Fale’ai mo fanau.

Ua i ai le faanaunauga o le ali’i kovana e tatau ona mae’a atu le vaiaso atoa lenei, ua mae’a ona foia faafitauli i aoga o loo fa’aletonu, ina ia mafai ona tatala aoga mo le fanau i le vaiaso fou.