Mai le sailiga sa fa’atautaia e le “Charlie’s Heart to Heart - Save a Child’s heart” a le Starkist Samoa mo le fa’amoemoe e auina mai ai ni Foma’i Fa’apitoa mo gasegase o le Fatu mai Oregon Health Services University, e faia talavai ma toe a’otauina foma’i ua faigaluega i le Potu o le Piliaki a Tamaiti i le LBJ Medical Center, ua taua’aoina ai e le ali’i Pule Brett Butler ma le au taupulega a le Star Kist Samoa le meaalofa tupe e $15,000 i le aso ananafi i se fa’atasiga sa faia fa’apitoa i le LBJ Chapel i le itula e 10:00 i le taeao lava.

O le meaalofa lenei sa tufaina atigi pusa e mafai ona e fa’ao’o i ai sau meaalofa i nisi o nofoaga e masani ona fa’atau ai tagata, peita’i, afai ae maua lea aotelega, ona fa’aluaina lea e Charlie Star Kist e fa’ailoa ai lona agaga alofa i le fanauiti ma ia fa’aleleia gasegase o le fatu ua fa’ailoa mai, ua afaina ai nisi e to’a 247 ua mae’a va’aia i le tatou falema’i tele i Faga’alu i le potu Piliaki.

Ina ua tula’i le ali’i pule sili o le Star Kist, Brett Butler ma ia saunoa, “O lenei galuega alofa ua faia e Charlie mo fanau uma ua ma’i fatu, ua fa’ao’o atu ai fo’i se agaga alofa o le Star Kist Samoa i o tatou fanau, e fa’amau fa’ailoga ai le atoaga o le matou 50 tausga talu mai ona fa’atautaia pisinisi i totonu o laufanua o Amerika Samoa.”

“Ae muamua lava, e silisili le alofa o Charlie Star Kist Samoa i alo o Amerika Samoa o lo’o ua maua i nei gasegase fita, ma e loto o ia e fia fa’aleleia le soifua maloloina o i latou uma nei. O le aumaiga o Foma’i ma latou meafaigaluega fa’atasi ai ma le a’otauina o foma’i i’inei ia mafai ona vave togafitia fatu o fanauiti o Amerika Samoa, o se fa’amuamua e fa’amanatu ai le atoaga o le 50 tausaga o tautua Star Kist Samoa i lo tatou atunu’u.”

I se saunoaga a le ali’i foma’i fatu o le piliaki, Mike Favazza,MD. sa ia fa’ailoa ai, o le gasegase o le fatu ua matauina le fa’ateleina i tausaga ta’itasi o le maua ai o fanau a le atunu’u o le “Rheumatic Heart Disease” ma e mafua ona ua inifeti se vaega ole pa’u o le tino po’o le fa’ai.

O se isi ana fa’amatalaga auiliili, ua fa’ailoa ai, e le o mama ona fa’ata’ele le fanau i le tele o taimi, e ala ai ona tutupu maneso po’o p’ou ma inifeti ai, ae o le fa’ai ona o lo’o fa’ateleina le siama e ta’ua o le “strep” ma o lenei fo’i gasegase e fa’ateleina i atunu’u e vaivai le tamaoaiga e tausia lelei ai ona tagatanu’u.

“O lo’o i ai fo’i nisi e maua i le congenital heart disease ma e sailia uma lava ma togafitia e le vasega o foma’i nei mai fafo gasegase nei, ma toe faia ma a’oa’oga a i matou o foma’i fa’apitoa a a tamaiti i’inei.”

O le afuaga o le mo’omia ona malaga mai o nei foma’i fa’apitoa o le fatu, ina ia mafai ona tau le fa’afaigaluegaina tumau i’inei se tasi o nei ituaiga o foma’i, aua e taugata tele mo le tatou falema’i le totogi o nei foma’i fa’apitoa. Ae o le lelei lea o le aumai o foma’i nei ma faia aoga a foma’i o va’aia fanau i le piliaki i le taimi nei.

O le susuga le ali’i Foma’i Dr Ladua sa ia taua’aoina le siaki mai le Star Kist ma sa ia fa’afetaia fo’i le agalelei o lea Kamupani i le taumafaiga vaivai ina ia fa’afo’ia lea gasegase leaga mai le fanau.

“O lo ua avea nei le Rheumatic Heart Disease ma se tasi o ituaiga o ma’i e le pepesi ua taumafai atili le vasega o foma’i i le LBJ ma le DOH ina ia fa’aitiitia le aofaiga o le fanauiti e toe a’afia ai i le isi tausaga o lumana’i.” Ose fa’amatalaga lea a Dr. Ladua mo le lau silafia a le atunu’u lautele.

E to’atele foma’i ma tama’ita’i tausima’i ae maise o le Pulega a le tatou LBJ Medical Center sa auai i le taua’aoina o lenei meaalofa aoga tele, ma sa latou fa’asili le agaga o le fa’afetai ona o mea fa’apenei e faia e le mamalu o pisinisi ina ia fa’atino ai galuega lelei ma le alofa mo le fanauiti.

O isi Kamupani e tele sa aofia i le lisi o i latou na fesoasoani e tu’ufa’atasia nei meaalofa e aofia ai le Ace Hardware, McDonalds, Koko Bean, Cost-U-Less, Laufou Shopping Center, KS Mart, Blue Sky, Carl’s Jr, Samoa News ma le Star Kist Packing Room fo’i lea sa latou tu’ufa’atasia mai le $5,000.+ o le seleni na aoina mai atigi pusa.