O le tina talavou lea na ta’usala e le fa’amasinoga maualuga i le moliaga mamafa o le fa’ao’olima i le tulaga lua, ona o le fa’alavelave lea na ia togiina ai foliga o se isi tama’ita’i i se ipu malamalama ma manu’a ai o ia, ua poloaina e le fa’amasinoga e taofia o ia i le toese mo le umi e 261, o le umi fo’i lea e oo mai i le aso na lau ai lona faasalaga talu ona taofia ai o ia i le toese.

E 5 tausaga na manatu le fa’amasinoga maualuga e faasala ai Etevise Tomasi i le toese i Tafuna, e pei ona fofogaina e le afioga i le ali’i fa’amasino sili ia Michael Kruse, peita’i ua finagalo ali’i fa’amasino o le a fa’amalumalu le tuliina e Tomasi o lea fa’asalaga, ae o le a nofovaavaaia o ia mo le 5 tausaga i lalo o poloaiga a le fa’amasinoga.

A o le i tuuina atu le faasalaga a le faamasinoga mo Tomasi, sa maua le avanoa e faatoese ai o ia i luma o le faamasinoga e tusa ai o lana solitulafono sa faia, ma ia tautino ai lona salamo moni e tusa ai o lana solitulafono sa faia.

Na taua e Tomasi i luma o le faamasinoga e faapea, talu mai aso e 261 na taofia ai o ia i le toese i Tafuna, sa ia a’oa’oina mai ai se lesona taua mo ia, ma ua ia manatu e taua lea lesona mo ia i le lumana’i.

Sa ia tautino i le faamasinoga, na te le toe solia se tulafono i le lumana’i, ae ua aoga le lesona ua ia aoaoina e toe tima’i ai se isi taeao fou mo ia.

Sa ia talosagaina foi alii faamasino mo se avanoa sei toe fo’i atu ai i lona aiga e tausi ona matua, ma tausi si ana fanau laiti e to’atolu o lo o tausi e ona matua i le taimi nei. Sa ia tautino fo’i ua ia lagona lona salamo ma ua ia iloa fo’i lona sese i le mea sa tupu.

Sa ia faatoese foi i le faigamalo a Amerika Samoa faapea ai ma le tama’ita’i na a’afia, ina ia fa’amagalo sona sese i lo la va. Na faaiu le faatoesega a Tomasi i le faamasinoga i lona faafetaia lea o alii faamasino, ona o le avanoa sa latou faataga ai o ia e tatala i tua i le taimi na tuu eseeseina ai i laua e le Atua ma lana pepe, ina ia maua ai le avanoa la te mafuta ai pea ma fafaga ia te ia ina ia malosi ma tupu.

Na maua foi le avanoa e faafofoga ai le faamasinoga i se molimau mai le tama o le tina talavou na tausala, ma ia talosagaina ai alii faamasino mo se avanoa sei toe foi atu ai lona afafine e tausi si ana fanau e toatolu o lo o la tausia ma le tina o le aiga, aemaise ai o lana pepa lea na fanau a’o taofia ai o ia i le toese i le amataga o le tausaga nei.

Na tautino le tama e faapea, afai ae tatala atu i tua lona fafine, o le a la galulue malosi ma le tina o le aiga e fesoasoani ma fautua ia te ia, ina ia mautinoa e le toe tafao o ia i fale kalapu pe na te toe tagofia fo’i le ava malosi.

Na taua e le loia a Tomasi o Joel Shiver, e taofia e leoleo ia Tomasi i le so 28 Iulai 2013 o lo o ma’itaga o ia i lana pepa lona fa, ma o le masina o Ianuari 2014 na tuu eseeseina ai i laua e le Atua ma le pepe fou, ma ua atoa ai le toafa o lana fanau.

Na finau Shiver i le faamasinoga ina ia nofovaavaaia Tomasi ae aua nei toe tuuina atu i ai se isi faasalaga faafalepuipui, ina ia maua ai le avanoa e alu ai i tua e saili sana galuega e tausi ai lana fanau laiti.

E ui na lagolagoina fo’i e le loia a le malo ia Tiffany Oldfield le faafinauga a Shiver ina ia nofovaavaaia Tomasi mo le 5 tausaga, ae sa ia talosagaina lava sina faasalaga faa falepuipui i le toese i Tafuna, ina ia mafai ai ona aoao e le ua molia se lesona mo ia mai le mea sa tupu.

Na taua e Oldfield e faapea, o le tamaitai lea na aafia i le solitulafono a Tomasi, o lo o i ai o ia i atunuu i fafo mo le faia o se isi togafiti e fesoasoani ai i le faaleleia atili o maila na aafia ai ona foliga ona o le taimi lea a togi ai o ia e Tomasi i le ipu malamalama.

Na taua foi e le malo i lana faafinauga e faapea, afai e le manatu le faamasinoga e tuuina atu se isi faasalaga faa falepuipui mo Tomasi, e tatau lava ona malu puipuia poloaiga mo lana nofovaavaaia, ina ia mautinoa e le toe tafao o ia i fale kalapu, e le toe tagofia le ava malosi pe toe tafafo ma ana uo, a ia auai o ia i ni aoaoga fau fau tua e fesoasoani ai i le tulaga o le ita ma le ava malosi.

Na umi se taimi o iloilo e alii faamasino se faasalaga mo Tomasi, mafua lea ona sa manatu alii faamasino e tatau ona mautu poloaiga e usitai i ai le ua molia ao nofovaavaaia o ia.

O se tasi o poloaiga o le nofovaavaaia a Tomasi na poloa’i e le fa’amasinoga, o le taofia moi lea o ia i le toese i Tafuna mo le 20 masina, peitai o le a faamalumalu lona tuliina o lea faasalaga, ae ua lava aso e 261 lea e oo mai i le aso na lau ai lona faasalaga i le vaiaso na te’a nei ua maea ona ia tuliina i le toese, o le umi o le a totoe ai o le a taofi lona tuliina, fuafua lava i lona usitaia o poloaiga.

Ua faasa foi o ia e le faamasinoga ona toe tafao i ni fale kalapu ae tia’i lana fanau i le fale, pe na te toe teena fo’i ni faatonuga po o ni fautuaga e avatu e lona tama, a ia avea lona tama o le ulu lea o le latou aiga, e tatau fo’i ona ia usita’i i so o se faatonuga e avatu e lona tama ia te ia.

Ua poloaina foi le tatau lea ona saili sana galuega e tausi ai lana fanau e toafa ua i ai, e le aofia ai lona faigaluega i se fale kalapu po o se faatoaga a lona aiga, a ia saili sana galuega tumau e tausi ai lou aiga.

O Tomasi na ulua’i tuuaia e le malo i le moliaga mamafa o le faaoolima i le tulaga muamua, ae i lalo o le maliliega sa latou faia ma le malo, na toe suia ai loa le mamafa o le moliaga mai le tulaga muamua i le tulaga lua.

O se tafaoga a Tomasi ma se tasi o ana uo teine i le fale kalapu o le Bowling Alley i le masina o Iulai 2013, na tula’i mai ai se faalavelave lea na ia togiina ai foliga o le tamaitai na aafia i se ipu malamalama ma manu’a tigaina ai.

I faamaumauga sa tuuina atu e le malo i luma o le faamasinoga e tusa ai o le talaaga a Tomasi i faamaumauga a le faamasinoga faaitumalo, o lo o atagia mai ai, e le o se taimi muamua lea ua tuuaia ai o ia i ni faalavelave e aafia ai le faatupu veves i nofoaga faitele, aemaise lava pe a aafia ai le ‘avamalosi.