I le taumafaiga a le Toe Fuata’i Fa’asamoa a le Polamalu Foundation i le tausaga nei, ua maua ai e nisi e to’atolu o le fanau talavou a le atunu’u ni avanoa fa’asikolasipi mo le taumafanafana.

O i latou ua fa’amanuiaina mai ituaiga aoaoga sa auai ai:

• John Ma’a mai le a’oga maualuga a Leone High. O ia lea sa auai i aoaoga (academic clinic) e pei ona fa’atautaia i potu aoga o le Samoana i le vaiaso atoa lea na auai mai ai le Fa’asamoa Initiative iinei. O kosi nei e fa’atautaia i a’oga ia, sa fa’ailoa mai, e a’oa’o ai le fa’aperetania, ma kosi tau Leadership i potu a’oga. Ese mai lea i a’oa’oga tau ta’aloga Volley Ball, Football ma Basketball sa fa’atautaia e nisi vasega o le fanau.

O John ua mae’a lana vasega 11 ae o le a ulufale i le vasega 12 i le tausaga a’oga fou.  O lana GPA e 3.90 ma sa fa’ailoa ia te ia e o’o ane i le Ofisa o A’oga i Utulei, se’i taua’ao atu e Polamalu le avanoa matagofie ua ia maua nei. O le avanoa lea ua tu’uina mai o le Plaque ua tusia ai le fa’ailoga ua ia maua, le mitiafu e ofu atu e ia pe a malaga atu ma le lana malaga e masi’i atu ai i Pittsburg mo ana kosi tau tomai fa’apitoa e fa’alautele atili ai lona silafia.”

O John o se alo e fa’asino ia Isa’ako ma Malama Ma’a o Mesepa, ma ua ia faailoa mai, “O a’u e matua si’i a’e le fa’afetai mo lenei avanoa ua ou mauaina, atonu e to’atele na’ua alo o Amerika Samoa sa auai fa’atasi i matou i nei a’oa’oga, ae fa’afetaia e a’u lava ia, ua ou maua le vala’au ou te sau i le ofisa o a’oga,  ma ua taua’aoina mai lenei fa’ailoga mo a’u. Fa’afetai tele ia Troy Polamalu ma le faletua ma le Fa’asamoa Initiative mo lenei avanoa ou te o’o ai i Pittsburg e fa’alautele a’u a’oga.”

• Agape Mafua mai Fagaitua High. O le tama’ita’i talavou ua fa’ato’a mae’a lana vasega 10 i Fagaitua High ua fa’amau fa’ailogaina fo’i e le Fa’asamoa Initiative na te mauaina le avanoa e malaga sa’o atu ai e a’otau mai e le ali’i faia’oga volleyball lauiloa i Spokane Washington, Allen S. Allen.

Ina ua fa’atalanoa le tama’ita’i o Agape i sona lagona i lenei fa’aeaga a le Fa’asamoa Initiative mo ia, sa ia fa’ailoa mai, “E makua ke’i lava a’u, e le’i i ai se fuafuaga a lo’u talavou, o le a ou mauaina lea avanoa. Ua fa’ailoa mai o le a ou alu e a’oa’o pea a’u e Allen S. Allen.”

Na taua’ao fo’i ia te ia lea o lana fa’ailoga e fa’amau ai lona avanoa lelei ua maua fa’atasi ma lona mitiafu e ofuina atu i le va’alele, pe a alu atu ina fa’afaigofie ona iloa patino mai o ia.

Sa auai matua o lenei tama’ita’i i le sauniga na taua’ao ai nei faailoga mo le fanau a’oga, ma sa fa’afiafiaina o la’ua agaga ona o lenei foa’i mo le la’ua alo tama’ita’i. O le GPA a Agape e 3.3, ma ua tula’i mai e lelei fo’i lana ta’alo i le volleyball. O Agape o se alo e fa’asino ia Tamali’i Tuinei ma Reupena Mafua mai le motu o Aunu’u.

• Iuliano Falaniko mai Leone High School. O le aso Lua na taua’aoina ai e Troy Polamalu o le fa’ailoga mo Iuliano Falaniko, mo le ta’aloga o le Football. O lo ua maua fo’i e ia o le fa’ailoga ma le Mitiafu fa’apea ma le malaga i le Setete o Utah ina ia a’oa’oina ai o ia e le ali’i lauiloa ia Alema Te’o i lana A’oga Football o le “All Poly.”

O nei avanoa uma o lo’o fa’atalia e le fanau le toe vala’au mai o le Fa’asamoa Initiative pe a toe taliu i fafo, ina ia sauni atu mo a latou malaga, a’o le’i o’o mai le toe a’e o a’oga i le tausaga a’oga fou.