Ua toe taliu mai i fanua le ‘au malaga a Tama Tamomo’e Saoasaoa a le Track & Field sa auina atu i Tahiti mo tu’uga lautogia a le Polynesian Oceania Championships i le lua vaiaso talu ai.

O le tala fiafia ua toe taliu mai ma i latou e to’atolu na o e to’atolu fo’i ua maua pine: Tasi le Auro, Tasi le Siliva ma le Pine Apamemea, ae sa ta’ita’i malaga ai le susuga Valusia Talataina, o se tasi fo’i o lo’o galue i le Matagaluega o A’oga o se faia’oga o ta’aloga Afeleti mo a’oga maualuluga ma a’oga tulaga muamua.

I se tala mai a Valusia Talataina, sa ia fa’ailoa ai lona lagona fa’agae’etia i le taimi o taumafaiga a nei fanau sa latou malaga, “E le’i faigofie lagona ina ua va’aia le matua malosi o le taumafaiga a le fanau, sa taumafai i ai, ma sa latou fa’aaogaina, o le malosi fo’i sa latou tu’uina atoatoa i a latou tamo’ega, fa’afetai ua i’u manuia ma o se fiafiaga e faigata ona fa’agalo aua ua fai fo’i si umi o tausaga o taumafai lava le tatou Malo ina ia lelei ta’aloga o tamo’ega i totonu o le tatou atunu’u.”

“Na ou va’aia le motu mamao mai o Leti Pa’aga ma e le’i faigofie ona tutu lelei, ua ese lota naunau ina ia maimoaina e le mamalu lautele o matua ma aiga ae maise le tatou malo nei ituaiga o taumafaiga ua alia’i mai i le fanau i ta’aloga afeleti,” o se tala lea a Valusia e tusa o le taimi na ia pu’ea ai ata o lea tu’uga ma fa’auia mai i le Samoa News.

O le tu’uga ua fa’amau nei e Amerika Samoa le Pine Auro o le tu’uga lea o le 100 mita a tama. Na toe tulaga lua fo’i Leti Pa’aga i le tu’uga o le 200 mita, ae maua e Luteru Ah Loe le Pine Apamemea o le tu’uga 100 mita a tama.

“Fa’afetai lava i nei alo o le atunu’u i lo latou naunau i lenei fa’agatama, aua o lea ua iloa nei, e i ai le taleni i tatou fanau, ae o le fa’atamala lava e tapena lelei ma koleni fa’alelei le fanau e ala ai ona le maua ni tatou pine fa’avaomalo fa’apenei i taimi uma. Ia toe tapena fo’i nei ali’i talavou i se taimi o i luma mo nisi tauvaga fa’avaomalo fa’apenei, ina ia mautu pea se tatou sao i nei ta’aloga afeleti,” o se isi toe fa’amalosi mai lea a Talataina.

O i latou na malaga e fai ma sui tauva o Amerika Samoa e aofia ai Pa’aga mai le a’oga maualuga a Tafuna High, ma ua tausaga fa’ai’uaso nei o ia i le Laumua o le Toa. O Ah Loe o se tasi o talavou e a’oa’oina i le a’oga maualuga a Leone ma ua i ai nei i le vasega 11 ae o Falaniko Vagas o se tasi e a’oga i le A’oga Maualuga a Fa’asao Malisi ma ua i ai nei i le vasega 10.

I lenei taumafaiga ua silia le taimi ua mua ai nei Paaga i le tu’uga o le 100 mita nai lo le taimi na tamo’e ai le ali’i talavou sa fai ma sui o Niu Sila i le vasega o fanau tutu’u e i lalo ane o le 18 tausaga le matutua.

O se mea fa’afiafia agaga lea fo’i matati’a ua tatou tamauina i lenei tausaga i le Tahiti Oceania 2016 in Track & Fields.

“Fa’amalo atu le tapua’iga mau a le atunu’u, aiga ma matua fa’apea ma uo ma e masani i le aumalaga ua latou si’ia le fale o Asomua i le mauga e tusa o le latou taumafaiga i ta’aloga afeleti i le Ocenia Track & Fields,” o se toe fa’apipi’i mai lea aTalataina i lana toe saunoaga.