E to’atolu sui o le aufusu a Amerika Samoa lea o loo filifilia mai i lalo o le Kalapu Fusu a le ‘American Samoa Boxing Federation’ (ASBF), ua sauni e fai ma sui o Amerika Samoa i le ta’amilosaga o Fusuaga a le Pasefika (2015 Oceania Confederation Boxing Championship-OCBC), lea ua fa’amoemoe e faia i Canberra i Ausetalia i le amataga o le masina fou.

O ali’i fusu ua fa’amoemoe e fai ma sui o Amerika Samoa i lea ta’amilosaga e aofia ai Robert Toilolo ma Pasefika Ikitau, lea o loo koleni i lalo o le fa’amalu a le ASBF, ma le susuga ia George Tanoa Jr, lea o loo koleni i lalo o le fu’a a le Kalapu Fusu a le ‘American Samoa Amateur Boxing Federation’ (ASABF).

I se fa’atalatalanoaga ma le faiaoga o le aufusu, le afioga a Sala Sanele Etuale, sa ia fa’amaonia mai ai tulaga ua oo i ai tapenaga a le au fusu i le taimi nei, faapea ai ma le avanoa ua mafai ai ona ofi atu i totonu le susuga a Tanoa Jr e koleni fa’atasi ma le ‘au mo Austalia.

Na taua e Sala i le Samoa News tulaga lelei ua i ai tapenaga a le ‘au mo le taimi nei, e le gata ua umi masina o koleni mai, ae ua lava fo’i le tomai i le fa’atinoina o le ta’aloga.

“O loo taumafai lava e fesoasoani i mafaufau o tama fusu ina ia tapena le mafaufau i soo se taimi e sauni ai mo le ta’aloga, ou te iloa fo’i ua lava tapena Ikitau ma Toilolo ma le ta’amilosaga sa malaga atu ai i Samoa i le masina na te’a nei, lea na mafai ai ona matou manumalo i le Ipu a le AIBA lea sa matou tausinio ai ma ‘au fusu ma Samoa, ou te iloa la, ua avea le ta’amilosaga lena ua fai ma auala e saga fa’aleleia atili ai sauniuniga a le ‘au mo Ausetalia,” o le saunoaga lea a Sala.

E ese mai ai le susuga a Tanoa Jr, o lea fa’atoa taliu mai i Ta’aloga a le Pasefika sa faia i Papua Niu Kini, e pei ona avea ai o ia ma sui o Amerika Samoa i ta’aloga fusuaga sa faia ai, e ui e le’i manuia lana taumafaiga mo se pine, ina ua faiaina i le ali’i mai Papua i ‘ai i se ta’aloga mataina ma le finau, ae na taua e Sala e fa’apea, e i ai lona talitonuga ua sauni fo’i Tanoa Jr mo le ta’amilosaga i Ausetalia.

E talitonu le Samoa News, o le susuga a Tanoa Jr, o loo koleni o ia i lalo o le fa’amalumaluga a lana faiaoga, le afioga a Toleafoa Henry Tavake, o ia fo’i lea o le peresetene o le  ASABF.