“Aua le tulia i latou e tunu kofe pe fai feau a le ofisa ia a’oa’o i auala faatino ai galuega”

O le taeao ananafi na tatala aloaia ai le polokalama a le malo mo fanau talavou e a’oa’o ma faamasani ai i auala e faatino ai galuega i totonu o ofisa e pei ona sa fautuaina ai e le Kovana le tumau ia Lemanu Peleti Mauga, ia faatonusili ma faauluuluga o ofisa ma pisinisi tua, ina ia a’oa’o fanau ia iloa faatino galuega ae aua le tulia e fai kofe po o isi feau i totonu o le ofisa.

Na faatumulia le Fale Laumei i fanau aoga; matua; faatonusili o matagaluega ma ofisa a le malo, aemaise ai sui o pisinisi tua ma sa auai ai fo’i sui o le Fono Faitulafono i le tatala aloaia o lenei polokalame taua mo fanau aoga i le tuua ai o aoga i lenei vaitaimi o le tausaga.

O se sauniga lotu puupuu na taitaia e le afioga Patele Kolio Etuale sosoo ai ma le saunoaga faapitoa a le Kovana le tumau o le malo.

Na taua e Lemanu e faapea, o le ofoina atu e le malo o lenei polokalama mo fanau talavou, o se faaputugatupe lelei lea mo le malo ma pisinisi tua mo le lumana’i.

Fai mai Lemanu, e ui o lo o i ai tulaga pagatia i le itu tau tupe a le malo i le taimi nei, ua manatu lava le malo e saili auala ina ia faatinoina ai lenei polokalame taua mo fanau talavou.

Ua fautuaina foi faatonusili ina ia faaaoga fanau talavou nei i taimi o fonotaga a le ofisa, faailoa i ai auala e fai ai faaiuga mo le manuia o le ofisa, ma ia aoao i latou ina ia malamalama i galuega eseese o lo o faatinoina i totonu o ofisa a le malo.

“A’oa’o i latou ina ia iloa auala o lo o faatinoina ai galuega a le malo e pei o le tutu faatasi, tutusa tagata uma, faia o faaiuga faamaoni ma ia faailoa mea uma ae aua le taumafai e ufiufi, ma ia aoao foi i latou ina ia avea ma totino faatuatuaina o ofisa ma matagaluega a le malo i le lumana’i,” o le saunoaga lea a Lemanu.

Mo le fanau aoga, ua fautuaina i latou ina ia avea le avanoa ua latou maua e faailoa ai lo latou faamaoni ma le usiusita’i i e o le a avea ma o latou ta’ita’i.

“Aua le fefe e fesili i se mea e te fia malamalama ai, faamaoni i le taimi faigaluega ma ia avea oe o se tagata faigaluega moni lava a le malo ma pisinisi tua,” o le faamalosi lea a Lemanu i fanau aoga.

Na faaiu le saunoga a Lemanu i lona faafetaia o ofisa uma a le malo faapea ai pisinisi tua, ona o le avanoa ua mafai ai ona tutu faatasi e lagolago lenei faamoemoe.

Na taua e le Faatonusili o le Matagaluega a Tagata Faigaluega a le malo ia Le’i Sonny Thompson lona fiafia tele e faalauiloa le taumafai malosi o le malo e saili avanoa faigaluega e 300 mo fanau aoga, ina ia toatele i latou e maua le avanoa e aoaoina ai lenei tomai faaopoopo i o latou olaga.

O i latou e 14 tausaga e oo atu i le 16 tausaga le matutua, o le a auai i latou i ni aoaoga faapitoa e faia i le fale aoga a le aoga maualuga a Samoana mo le vaiaso atoa lenei, ona faatoa tufatufaina atu ai loa lea o i latou i ofisa ma matagaluega a le malo o le a galulue ai, ae mo i latou uma e 17 tausaga le matutua e oo atu i le 21, o le taeao nei lea ua faamoemoe e amata tufatufa atu ai i ofisa, pisinisi ma matagaluega a le malo mo le amataina o la latou galuega.

O lo o aofia ai i fanau sa lesitalaina ananafi le toa 37 o tama ma teine aoga mai Manu’a na malaga mai e auai i lenei polokalame.