E 40 masina lea ua fa’asala ai e le fa’amasinoga maualuga le ali’i o Nu’usila Suani i le taeao ananafi, ina ua tausala o ia i le moliaga o lona umia faasolitulafono o vaega o le laau fa’asaina o le mariuana, ma le fa’amoemoe e tulei ma fa’atau atu i isi tagata.

O pepa mariuana e 5 lea e tusa ma le 6.6 pauna le mamafa, na maua i totonu o ni kalone se lua na alu Suani e piki mai i le ofisa o le Tiute i Fagatogo, o mariuana na fuafua e ula ma latou ma ana uo, e pei ona taua e Suani i se vaega o lana fa’atoesega i luma o le fa’amasinoga maualuga.

Na ulua’i tuuaia e le malo ia Suani i moliaga mamafa e lua, o lona umia faasolitulafono o mariuana ma le fa’amoemoe e tulei ma fa’atau atu i isi tagata, faapea ai ma le moliaga o lona umia fa’asolitulafono o mariuana, ae i lalo o se maliliega na sainia e le ua molia ma le malo ma talia fo’i e le fa’amasinoga, na tali ioe ai i le moliaga muamua, ae solofua e le faamasinoga le isi moliaga.

Na taua e le fa’amasinoga i sana folasaga ao lumana’i ai le tu’uina mai o le fa’asalaga mo Suani e fa’apea, o le aso 10 Oketopa 2013 na taofia fa’apagota ai e leoleo ia Suani, ona o le fa’alavelave lea na tula’i mai i le aso 8 Oketopa, ina ua alu atu e piki mai ni kalone se lua mai le Ofisa teu oloa a le Tiute na fa’a tuatusi mai i lona igoa, ae masalomia ai loa o ia e ali’i Ofisa o le Tiute i lona umia fa’asolitulafono o fualaau fa’asaina, i le mae’a ai lea ona sosogi e se ta’ifau mai le K-9 o fualaau faasaina mai totonu o ia kalone.

Ina ua sailia e sui o le Ofisa o Tiute totonu o kalone tetele nei e lua, sa maua i ai ni taga pepa iila lapopo’a se lima na nana i totonu o fagu e utu i ai pauta ta mea, o lo o i ai vaega o le laau fa’asaina o le mariuana.

I su’esu’ega sa faia i fualaau faasaina nei na fa’amaonia ai, o vaega ia o le laau fa’asaina o le mariuana.

Na fa’atoese le ua molia i le fa’amasinoga e tusa ai o lana solitulafono, ma ia talosagaina ai se isi avanoa mo ia sei toe fo’i atu ai i lona aiga, e toe afua se isi taeao fou mo lona olaga.

Na talosaga fo’i lana loia fautua ia Karen Shelly i le fa’amasinoga, mo se fa’asalaga nofovaavaaia, ina ia mafai ai ona maua le avanoa e aoao ai e Suani se isi lesona mai le solitulafono sa ia faia, e ui na finau le loia a le malo ia Tony Graf mo se fa’asalaga fa’a falepuipui

E 10 tausaga i le toese ma le salatupe e $5,000 na manatu le fa’amasinoga e fa’asala ai Suani, peita’i o le a fa’amalumalu lona tuliina o le 10 tausaga i le toese, ae o le a nofovaavaaia o ia mo le 10 tausaga i lalo o poloaiga a le fa’amasinoga.

O ni isi o ia poloaiga e aofia ai lona totogi o le salatupe e $5,000, tuli masina e 40 i le toese i Tafuna, ma aua ne’i ona toe tagofia ni fualaau faasaina po o le ava malosi i totonu o le 10 tausaga o lana nofovaavaaia.

Ua poloaina foi le faia o ni suega i lona tino ina ia faamaonia ai na te le o toe tagofia le ava malosi po o fualaau faasaina.

Sa poloaina foi e le faamasinoga le fa’atamaia o fualaau faasaina na maua mai i lenei mataupu, i lalo o le faamalumaluga a le Ta’ita’i Leoleo faapea ai ma le Masela o le Fa’amasinoga.

O le afioga i le ali’i fa’amasino sili ia Michael Kruse, ma le afioga i le fa’amasino lagolago ia Logoai Siaki na iloiloina le fa’aiuga o lenei mataupu.