I le sauniga fa’apitoa na fa’atautaia i le Maota o le Veterans Memorial Hall i Tafuna i le taeao ananafi, na taua’aoina aloaia ai e fitafita Amerika Samoa e 47 pepa fa’amaonia o le avea o i latou ma “Sitiseni o Amerika.”

E ui ina e le o nisi mai nisi atunu’u ua malaga mai ma aumau iinei, aua o i latou na soifua mai o nesionale o Amerika, ae o le avea ai o i latou ma sitiseni o Amerika, o se isi lea sitepu aoga i le latou soifua tautua i le vaega au a le Malo Tele.

I le sauniga mamalu sa fa’atautaia le tatalo e le ali’i Faife’au a le US Army Reserve COL Charles Lynde, sa ia mua’i fa’ailoa ai, le aoga tele o le fili fa’apitoa o nisi e avea ma sitiseni o se atunu’u. “O i latou ia e malu ai lea atunu’u, ma e tautuaina fo’i o latou tagatanu’u ma le loto atoa i so’o se faiva ua tofia ma agava’a ai.” O sana lea fa’amamafa mai i le aoga o le avea ma sitiseni.

Na tulai fo’i le fa’atonu  sinia o le Ofisa o le malo tele e gafa ma sitiseni, o Sitiseni David Gulick ma ia ta’ita’ia le vasega o i latou o le a umia sitiseni Amerika i le Tautinoga ma le Tautoga, ina ia latou faia mea uma e tusa o se tasi ua umia le sitiseni o Amerika - “fa’amaoni i fiute, fiafia e fesoasoani atu i nisi ua i ai se mana’omia, ia tausia tulafono uma o le Malo Amerika, ia agaalofa ma ia faia ona tiute e pei ona a’otauina ai, ma ua agava’a ai fo’i.”

Ina ua mae’a lea, sa fa’aalia loa le ata video na saunoa fa’apitoa mai ai le Peresetene o Amerika, Barrack H. Obama, lea sa ia fa’ailoa ai, so’o se tasi lava  e ausia lea la’asaga fou, “ua mausali le lua osigafeagaiga ma le malo o Amerika, ina ia e fa’ata’ita’i e avea ma tagata amio lelei, ia faia galuega lelei mo isi, ma ia to’aga ma le fa’amaoni e faia ou tiute e pei ona e galue ai i totonu o Amerika ma alaalata’i ai.”

Na usuina fo’i le pese, “God Bless America” ma tula’i ai loa le afioga i le Sui Kovana Lemanu Peleti Mauga mo sana upu fa’amalosi i le vasega o Sitiseni fou o Amerika.

I lana tautalaga, sa ia fa’apa’i malu ane ai i le vasega o le ofisa Autu o Sitiseni o Amerika sa latou fa’atulagaina le polokalama, ona o le tautalaga o lo’o i ai i le sauniga sa fa’atautaia, ua fa’ailo mai ai o i latou nei ua taua’aoina i ai sitiseni o lenei sauniga, o nisi mai fafo ua aumau mai i totonu o Amerika, peita’i, “O tagata o Amerika Samoa o tagatanu’u moni lava o Amerika, ae o nesionale, e le o ni sitiseni i lo latou fanau mai, ma ua talosaga ai nei i latou mo le avea ai o i latou ma sitiseni o Amerika, o se isi la’asaga lelei mo le latou auaunaga ma o latou fo’i agava’a e tatau ona fa’asifo mai e le malo tele o Amerika mo i latou.”

Sa ia talosagaina ai, le toe fa’asa’o lelei o lea fa’aupuga mo fa’amaumauga a le US Army Reserve ma le US Army fo’i mo se isi fo’i sauniga o i le lumana’i. Sa fa’amanuia fo’i le Lemanu i le mamalu o sitiseni fou o Amerika, ma talosaga atu mo i latou, “Aua tou te tu’ua foi le US Army Reserve ina ua outou maua o outou sitiseni, o nisi ua faia lea penefiti ma ala e fia tautua ai i le Reserve. Ae nonofo pea e fa’aauau la outou auaunaga i le malo tele fa’apea ma le puipuiga o le tatou atunu’u nei.”

Na soso’o lea ma le tautalaga a le tama’ita’i mai le Ofisa o Sitiseni ia Col. Twanda Young,  ma sa ia fa’ailoa lona fiafia e fa’atautaia lenei sauniga mamalu i Amerika Samoa. “E mamao na’ua South Carolina sa ou ola ane ai, ae ua ou o’o mai mo lenei fa’amoemoe, fa’afetai i le lagolagosua a le USArmy Reserve i Tafuna mo le fesoasoani tele, ma i latou uma sa matou gapatia fa’atasi ia mae’a fa’atautaia lenei polokalama aoga mo le fanau ua mae’a lautogia nei e avea ma sitiseni o Amerika.”

Sa ia toe fa’aopoopo mai, “E talafeagai lelei lenei si’itaga ua outou ausia i le aso nei, ma le manulauti tau’ave a le Army i so’o se taimi, ia lototele, fa’amaoni i tiute, fa’aaloalo i tagata uma o so’o se ituaiga e le fa’aituau fo’i lau tautua, ma ia e galue malosi i ou tiute i taimi uma ma puipuimalu lou atunu’u.”

O le mae’a ai o le vaega taua o le polokalama ona fa’ato’a faia lea o le tautoga a le vasega sitiseni fou o Amerika ma mae’a ai le sauniga i se ‘aiga mama na saunia mo aiga, sui mamalu o le Malo ma le USArmy Reserve.

I nisi o le fanau ua avea ma sitiseni e pei o  Genesis Uta’i sa ia fa’apea, “Ou te fiafia, aua o lea fa’ato’a atoatoa nei le avea ai o a’u ma tagata Amerika A’ia’i, lava ai fo’i le sapaia o ita e lenei malo tele o lo’o tautua ai.”

I le taofi na fa’aalia e Saipale Lee Vaouli, “O se fa’aeaga ma o se fa’amanuiaga le umia o lota sitiseni Amerika a’o e tautua, e i ai lona fa’alagona, o se mea lelei, aua ua matua sapaia atoatoa ita o le fitafita e tau mo le saolotoga o tatou tagata ma Amerika atoa i lenei fa’ailo.”