Ua mae’a tapena, fa’atonutonu ma fautuaina le vasega o ‘ave pasi e to’alima ua mae’a fa’atulaga e le Fa’atonu Tifimalae Ale ma le taupulega a le Ofisa o Tagata Matutua (TAOA) ina ia latou fa’afoea feoa’iga a tama ma tina matutua i pasi a le TAOA, pe a mae’a ona fa’atalosaga, fa’amau ma lesitala le avanoa mo lea tautua e le ofisa ulu.

Ua fa’alauiloa mai e le TAOA e faapea, ua mafai nei ona amata talia talosaga e fa’amautu ai le o’o atu o le pasi po’o le van a le TAOA ua fa’aagaaga mo feoa’iga a tagata matutua i le aso Gafua ma aso Faraile o vaiaso ta’itasi, e piki mai le tagata matua, ma fa’ao’o i ana talavai fa’atulaga i le falema’i. E tatau ona ta’i lua vaiaso a’o lumana’i le talavai, e ao ai ina lesitala lou avanoa lea.

O se fa’amatalaga ma’oti lea mo le tapenaga amata o le tautua ua toe fa’aauau nei, le feoa’iga a tagata matutua i pasi a le TAOA e aunoa ma se totogi. “O se fesoasoani sa fa’atautaia muamua, peita’i, sa taofi teisi lava se’i mautu muamua le fa’atamo’ega o le polokalama o mea’ai vela, ona toe fa’aauau loa lea, peita’i o lea la ua talafeagai lea tulaga i le taimi nei,” o le saunoaga lea a Lorelei F. Haleck -Fifita, le sui fa’atonu pulega o tupe a le TAOA.

O i latou e to’alima ua avea ma ave ta’avale o: Nu’umia Sopi; Sa Fiu; Aputi Etuale; Taegogo Leoso ma Tumuatasi Mulitauaopele. Peita’i, ina ne’i fa’aletonu ma le faigaluega nisi o le to’alima lea, ua fa’aagaaga fo’i tama’ita’i ua galulue i lea itu o le tautua i le Ofisa o Cynthia Nomura ma Taelupe Aetonu, e avea ma ave ta’avale i aso fa’apena.

I le Ofisa autu ua fa’auluulu ai lenei auaunaga ia Virginia Le’aupepe o le Program Director ma e va’aia toto’a mai galuega fa’atino uma e le susuga Lorelei Haleck - Fifita ma le faatonusili, pe a i ai ni mea e fia fa’aleleia atili pe faia fo’i ni fa’ai’uga tatau.

“Ua matua lava tapena lea itu o le auaunaga, e le o fa’avaivai le ola taumafai o le matagaluega, ia fa’ao’o atu nisi o tautua aoga mo le vaega o tagata matutua, aua e agaga uma lava le tatou atunu’u i le tausiga lelei o tatou Matua matutua,” o le fa’amatalaga lea a Haleck-Fifita.

Ua fa’ailoa mai fo’i, e i ai nisi mea e mafai lava ona talia, ae muamua lava ona feutaga’i le Ofisa i le telefoni 633-1253 ma talanoa ia Leaupepe.

“O isi tautua e i ai nisi o tagata matutua e ao ina aumaia fa’atasi ma latou nofoa fa’ata’avalevale i a latou talavai ma e fa’atulaga muamua lava ma le ofisa nei lea auaunaga, e ao ina mua’i vili mai pea ma fa’atalanoa e fa’atumau ai le taimi ma le aso e fa’ao’o ai lea auaunaga,” o le tala lea a Leaupepe.

O le isi fo’i mea e mafai ona ofoina atu, ua fa’ailoa mai, “E i ai taimi e mae’a ai ona tu’u tagata matutua ua mae’a talavai pe a toe taliu i aiga, afai ae toe fo’i mai ta’avale nei a’o tutu nisi o tagata matutua ua mae’a lisia i le polokalama e fa’atali auala mai i totonu i le taulaga, e mafai fo’i ona aumaia, ae le toe maua la le toe fo’i i aiga. E tatau fo’i ona i ai ID e fa’ailoa ai, o sui nei ua aofia i le lesitala a le TAOA,” o se fa’amalamalamaga atili lea a Leaupepe.

O le pikiina mai o tagata i le alatele i le taimi nei, e aga’i le isi ta’avale i Amanave, ae aga’i le tasi i Tula. O tagata matutua uma e mamao atu nai lo nei afio’aga e fa’atalosaga ina ia fa’ao’o ane uma i latou i nu’u na e piki mai ai. Ua le afe i tua le alu a nei pasi, ae ua fa’asasa’o lava i nofoaga fa’atali pasi i le alatele a le malo. Sei vagana talosaga ia e fa’ao’o mai i ma’i ua tausia i luga o nofoa fa’ata’avalevale ma moega.

Afai e le’i lisia le suafa TAOA, e ao ina faia loa, ina ia mafai ai ona agava’a i nei auaunaga.

O itula ua fa’atulaga e o ese ai i le taeao mai le ofisa ta’avale nei e lua, o le 6:30 peita’i, e toe o atu e piki tagata sa talavai e fa’ao’o i aiga i le itula e 10:30 i le 11:00. O le taimi mulimuli lava e fa’ataga ai ona toe fa’afo’ia se gasegase tagata matua i lona aiga pe afai na aumaia e le polokalama i le talavai, o le itulae 1:00 i le 2:00 ile aoauli.