Ina ua usuia le ulua’i fonotaga lautogia e fa’aulu ai le talosaga mo le fa’atula’ia o le FirstNet, sa fa’ailo ai e i latou, le aotelega o le latou tupe fa’asoa mo le fa’atula’ia o lea galuega, e $7Piliona mo teritori ma setete uma o le Malo Amerika atoa, ina ia gafatia e tagata uma i setete uma ma teritori ona talanoa vavalalata ma fesoota’i i taimi fa’aletonu i so’o se vaipanoa o Amerika atoa.

O le FirstNet o le polokalama feso’ota’i ai le vaega e ta’imua atu mo suesuega ma galuega lavea’i mo le saogalemu lautele o le atunu’u i vaitaimi o fa’alavelave fa’afuase’i i le atunu’u, sa fa’ailo ai e i latou, le aotelega o le latou tupe fa’asoa mo le fa’atula’ia o lea galuega, e $7Piliona mo teritori ma setete uma o le Malo Amerika.

“O lenei fo’i polokalama, e le mafai ona fa’amatu’u atu mo le vasega o pisinisi tumaoti, tagata lautele ma isi uma vaega e le feso’ota’i i latou ma le tausia o le saogalemu lautele ma galuega lavea’i mo le mamalu lautele o le atunu’u.” O se fa’amalamalamaga maoti lava lea na fa’ailoa mai e Richard Reed, fa’atonu o le fuafuaga fa’ataoto mo Setete uma ma teritori o Amerika atoa.

O le aumalaga a le FirstNet e to’a ono sa auai uma lava i le uluai fonotaga ina ia mafai ona fa’amae’a le ulua’i fonotaga fa’alaua’itele i le tatou nei teritori, ma taumafai ai ona fa’ao’o le latou mataupu i luma o Kovana Lolo Moliga mo lana filifiliga pe auai le tatou Malo i lea polokalama o feso’ota’iga i taimi e tutupu ai fa’alavelave fa’afuase’i, pe leai.