Ua i ai i le tatou atunu’u le vasega o Saeanisi Su’esu’e a le US Forestry mo latou galuega sa’iliili mo fa’amaumauga aoga i tulaga o le lauolaola, pe o le afaina o la’au, ae maise po’o ituaiga mafuaga e le o ola lelei ai la’au i le tatou atunu’u.

O le ulua’i o’o mai o nei ituaiga o saeanisi o la’au o le vaomatua, o le tausaga e 1987, ona soso’o lea ma le latou toe asiasi mai i le tausaga 2001, peita’i, o le latou toe asiga lenei i le tausaga 2012.

Ina ia mafai ona matauina ni fa’afitauli o alia’i i le ola o la’au i le vaomatua, e ao ina fa’avava mamao taimi e toe asia mai ai nei nofoaga sa mua’i su’esu’ea ma fa’amaumau le maualuga, le mafala ma le lauolaola pe o mama’i fo’i o la’au o lo’o ola ai.

O nofoaga e 17 i Tutuila sa sa’iliilia i le tausaga 2001, ua toe asia nei, ae ua fa’aopoopo i ai le isi 9 o nofoaga fou e toe asia mai i le isi 10 tausaga o lumana’i. Mai le Manu’atele, na su’esu’eina ai nofoaga e 4 i le 2001, ae ua fa’aopoopo nei i ai le 6 ma ua atoa ai le 10 o nofoaga o le a suesueina ma fa’amaumau e aofia ai ma nofoaga e ono mai le Laufanua Fa’asao {National Park} i le Manu’atele.

O i latou e to’atolu na malaga mai le US Forestry a le USDA, ae to’alua sui mai le Folesi a le Setete o Hawaii o lo’o latou malaga fa’atasi mai ai, Ms. Lori Tango ma le ali’i talavou o Joe. I le fa’ai’uga o le vaiaso nei o le a malaga atu le to’a ono o sui mai le US Forestry Services ma le to’a 6 o ali’i ma tama’ita’i talavou o le tatou Vaega o Folesi a le Land Grant ASCC e asia nofoaga va’ava’aia e 4 i manu’a ma toe fa’atulaga le isi ono nofoaga fou mo le isi a latou asiasiga pe tusa fo’i ma le 10 tausaga o lumana’i nei.

I lea malaga fa’apitoa mo fa’amaumauga o nei sailiga aoga i ola o la’au o tatou vaomatua i Manu’a ua mae’a fa’ailoa mai ai, e totogia taimi o nei fanau e faigaluega ai, totogia o latou ovataimi, totogi o latou pasese ma nofoaga e alaalata’i ai i Manu’a. O le a va’ava’aia toto’a fo’i le latou saogalemu, peita’i, afai o le a i ai se mea e ono tupu mai ma afaina ai se tasi o le aumalaga lea mai le tatou lotoifale, o le a totogia fo’i e le vaega o le Folesi a le feterale.

O fa’amaumauga mai nei su’esu’ega o le a mafai ona fa’aaoga e so’o se tasi lava o matagaluega ae maise o a’oa’oga i totonu o le tatou teritori, ae o le a fa’amautuina lea i le ofisa o Vaega o Folesi a le Land Grant i le Kolisi Tu’ufa’atasi.

I le aso Lulu fo’i sa auai ane ai le Fa’atonu o le Land Grant o le Kolisi Tu’ufa’atasi, susuga Tapa’au Dr Daniel Aga ma le Susuga Aufa’i Apulu Areta o le Polokalama 4H/FCS i le fonotaga sa toe fa’amanatu ai le gaoioiga e ao ina fa’atautaia ma va’aia toto’a i lenei toe asiga o Nofoaga e 21 na mua’i fa’amauina muamua i le 2001.

O le a’oa’oga lea sa fa’atautaia e le susuga Seth Ayotte ma Misha Yatskov mai Ukraine lea ua avea ma saeanisi o la’au i le Folesi a le Iunaite Setete. Na fa’ailoa e i latou, e ao ina va’aia toto’a ituaiga o suiga va’aia i le tino mai o le lauolaola, pe o fa’ama’ia le la’au, talu mai le va’aiga mulimuli sa i ai.

“Ia tatou va’aia toto’a e tusa ai o tusi lapata’i ua mae’a taua’aoina atu, e iloga ai le ata mai o le ola a le la’au, pe mata ua afaina ona lau, pe ua i ai fo’i ni lala ua mamago, ae o lo’o ola pea le la’au.”

Pe afai e tupu lea ituaiga o fa’afitauli i le la’au, e ao fo’i ina va’ai toto’a pe mata o ola le la’au i se a’ega, po’o tumau le la’au i se eleele laugatasi?

Ina ia tautalagia lea ituaiga o mea, sa fa’aalia e le ali’i Fa’atonu o le Land Grant/ASCC, “E ao fo’i ina outou mautinoa, e tele na’ua afa ma matagi malolosi, ae le gata i lea o le tele o le galulolo sa afaina ai le atunu’u i le 10 tausaga lea va ai la outou asiga talu ai, ma lenei tausaga ua toe asia ai la’au nei.”

Ona e na’o le Land Grant o lo’o i ai le tatou lala o le Folesi, o lea ua aoga tonu lava lea matagaluega i le fa’afaigaluegaina ai o talavou o le atunu’u e latou te nafa taulimaina lea fo’i sosia o fa’amanuiaga i le Si’omaga o Amerika Samoa.